Read Bawm Chin 2 CHRONICLES 31 Bible Online

2 CHRONICLES 31 - Bawm Chin bible

2 CHRONICLES 31

¹Chu Kût chu â lîm rawh chun Israel zapi tla chu Juda khuapi kipah an kal le, lungphun tla an râwk le, Aserah pathiannu lem tla chu an thlûk, lunglo tla pathian sawnhnâk mun ah mâichâm tla an râwk. Chu hâwi hen Juda ram Benjamin leh Efraim leh Manaseh ram ah mi khawm an râwk le, an in leiah an kîr rawh.

²Hezekiah nih bâwlpu leh Levi tla chu anmah rianṭuan dân hâwi vima hen siamṭhat nawlhnâk a neihpi na. Chubang tla chu duahphung thil al leh kawmhnâk thil ap, Biakin ah Pathian sawnhnâk rianṭuan, lâwmthu simnâk tla asi.

³Amah ranrual lakal mi ran tla chu zîng siar leh zân siar rangah duahphung thil ap rangah leh Dinhni ah ap ding mi tla, Thla Thar Kût ni rang dingah mi tla leh LALPA dân ah kût ni khua rang zawng a herh mi a pêk.

⁴Chu lo khawmah lal nih Jerusalem ah mi tla chu bâwlpu leh Levi ruat an si mi tla sinah thil ap tla hawng put ding hen a simh na. LALPA Dân ah a herh zia hâwi hen an hun tla chu an mang khonâk ding hen.

⁵Chu thupêk chu pêk an si kâ hen, Israel mi tla nih an fâng ṭha chem, uain oliv sariak, khuaitizû leh lo ah thilsuak dang leh an neih zawzawng lakah parâ lû pakhat tla an pêk.

⁶Juda ram khuapi tla ah um mi zawzawng nih an ranrual leh an dawrâ lakah mi parâ lû pakhat leh thilpêk tamtak khawm LALPA an Pathian sinah an hawng pêk.

⁷Thil pêk a thla thumnâk ah anna dawmh mi chu a thla linâk tiang an pawng vima.

⁸Lalchem Hezekiah leh a rianṭuantu tla nih an pêk tam zia an muh le, LALPA leh Israel tla chu an sawr.

⁹Lalchem nih bâwlpu leh Levi tla chu thilpêk thu leikâng chu a simh na.

¹⁰Bâwlpu a lianchem mi Azariah, Zadok thlâk nih a sinah, “Mi nih Biakin ah thil an hawng pêknâk thawk hen, ei ding tla khawm kanna khah nûnah cherkhet a lei ngengê rih, hi hi LALPA nih mi zapi rangah mal a sâwm na ruangah asi,” a ti.

¹¹Lalchem thupêk hen Biakin ah kardang an siam le,

¹²chunah chun parâ lû pakhat pêk mi vial chu an kil. A zauhkhenhtu dingah Levi a min Konaniah an siah le, a ṭangpitu ding ah a unaupa Shimei an siah.

¹³An tangah Levi parâ rianṭuantu ding an siah na. Jehiel, Azaziah, Nahath, Asahel, Jerimoth, Jozabad, Eliel, Ismakiah, Mahath leh Benaiah an si. Hi bang zawzawng hi Lalchem Hezekiah leh Bâwlpu Lianchem Azariah thu tangah rianṭuantu an si.

¹⁴Imnah fapa Kore, Levi mi, Biakin kulh saklei kawtkâ vêngtu chu LALPA sinah thilpêk lâktu leh ṭhentu ah ruat asi.

¹⁵Khuapi dang bâwlpu um mi leh Levi tla khawm nih chubang chu an ṭangpi; chubang tla chu, Eden, Miniamin, Jesua, Semaiah, Amariah leh Sekaniah tla an si. An rianṭuan ding hâwitê hen an hâwi Levi tla sinah eibâr bang rang hen an ṭhen le,

¹⁶a chi leikâng thu ah silo hen. Mipa kum sâwmthum mi mawh tlûnlei mi tla chu Biakin ah anmah mun ah um hen nisiar anmah mawhphurh tingtu tla chu anmah vo chiau an pêk na.

¹⁷Bâwlpu tla chu a chi leikângah ruat hen rianṭuannâk an pêk le, Levi tla kum kul mi leh a tlûnlei mi tla chu a murui hen rianṭuannâk an ruat piak na.

¹⁸An fa leh an nupi tla leh midang tla hen lasuibu ah rîn hep an si, zeiliau zawngah thil thenhlimh rian an ṭuan mi chu ṭuan a herh kumza ruangah.

¹⁹Khuapi lakah um mi bâwlpu tla lakah mi nih Aron thlâk tla mawh chu khuapi ran tlawngnâk mun ah mi, bâwlpu dâwngsung ah mipa zawzawng leh Levi chi min lamnâk bu ah rîn mi zawzawng sinah eibâr ṭhentu rang dingah mawhphurhnâk nei mi tla chu an ruat na.

²⁰Juda ram zawzawng ah lalchem Hezekiah nih LALPA a Pathian lawmhkâng hen thil dik a ti.

²¹Thil zeizawng Biakin leikângah mawh, dân zûl leikângah mawh, thinlung ah zumhkâi tak hen a ti mi leh a Pathian sinah a pêk mi ruangah dingchangnâk a nei.