Read Bawm Chin 2 CHRONICLES 32 Bible Online

2 CHRONICLES 32 - Bawm Chin bible

2 CHRONICLES 32

¹Chubang hâwi thil a hawng um nûn chun, Hezekiah nih LALPA rian zumhkâi tak hen a ṭuan liauah lal lianchem Senakerib nih Juda ram a rûn. Khuapi kulhnei tla a hual le, lûtnâk dingah kulh vâm tla siat ding hen thu a pêk na.

²Hezekiah nih Jerusalem khawm a do awt ti a muh le,

³amah leh a rianṭuantu tla hen Jerusalem kiang an hawng tlung tikah tî din ding an tawng lonâk ding hen khuapi lênglei mi tî lâknâk tla chu sah ver ding hen thu an thlûk. Rianṭuantu tla nih mi cherkhet an kalpi na le, tî suaknâk chu suak kho lo hen an phih hep.

⁵Lal nih khuapi humnâk ding hen kulh tla a remh le, a tlûnah in a sak le, a lênglei khawmah. Chu lo khawmah ram lakah vêngnâk in Jerusalem a li mi saklei kâng mun khawm khat zat hen in a sak. Phaw leh fei tamtak a nei.

⁶Mi tla kawrsen hotu thuneihnâk tangah khuapi ah a siah na, khuapi kulh kawtkâ mun ah hawng a pûm ver ding hen thu a pêk na le, an sinah,

⁷“Tumnâk bir tak leh zumh thlir hen um ule, Asiria lal lianchem leh a kawrsen rui tla chu ṭih rîlmâl lah na u. Anih leikâng mi ngâk hen kannih lei thil kan ti kho dauh.

⁸Annih chu minung thiltikhonâk an nei le, kannih lam chu LALPA kan Pathian nih râl kan do ding mi hawng kan ṭangpi ding hen kan nei,” a ti. Zapi minung tla chu an lalchem thusim ruangah râlṭhatnâk an nei.

⁹Chu nehnûn chun, lal lianchem Senakerib chu a kawrsen tla hen Lakis kiangkam ah an um le, Hezekiah leh Jerusalem ah Juda um mi tla sinah hi bang thu tla hi a thanh:

¹⁰“Kei, Senakerib Asiria lal lianchem nih Jerusalem ka hual rawh mi hi zeitin thlangam hen um kho ding nanna ruat?

¹¹Hezekiah nih chun LALPA nan Pathian nih an hum kho na ding hen an simh na le, sikhawmsele Hezekiah nih tîhâl leh sungvâng hen thi ding hen an perpet na mi asi.

¹²Anih chu LALPA sawnhnâk leh mâichâm râwk hen Jerusalem leh Juda mi tla chu rimthâw duah hen mâichâm pakhat ah cho sawnh ding titu asi.

¹³Hawng ka thlâktu leh kei nih phun dang tla lakah thil ka ti dân tla nan theih lo rih ma? Âu phun pathian khawm nih Siria lal lianchem lakah mi chu a mi tla a hum kho dah loh.

¹⁴An lakah mi zeiliau me chubang ram pathian nih a hum dah tâwn? Chu hâwi mi lakah zeitin nan pathian nih an hum na kho ding hen nan ruat nget rih.

¹⁵Tuah Hezekiah chu a perpettir hen mah lo leiah a ruitir lah u. Anih chu zumh lah ule, zei phun pathian khawm nih Asiria lal lianchem lakah mi hum kho ding hen ruat lah u. Churuangah kha nan pathian nih chun an hum kho na ding asi lo rerêng!” a ti na.

¹⁶Asiria lal rianṭuantu tla nih LALPA Pathian leh Hezekiah rangah chu ngâk fâk dauh hen an sâwi.

¹⁷Asiria lal lianchem lasuikuat nih LALPA Israel Pathian chu a zuam. Hi hâwi hen, “Zei phun pathian khawm nih ka thiltikhonâk lakah mi chu an mi tla a hum kho na ding asi lo, Hezekiah Pathian khawm nih kei lakah mi chu a mi tla a hum kho na ding asi lo,” a ti.

¹⁸Asiria lal minung tla nih chun Jerusalem khuapi mi tla lauh hen âwl dek an lâk khonâk ding hen Hebrai hawlh hen thu an sim.

¹⁹Jerusalem Pathian khawm an sim, chu hâwi hen phun dang tla pathian minung kut hen siam mi tla thu khawm an sim.

²⁰Lalchem Hezekiah leh khuavâng Isai Amos fapa nih Pathian sinah ṭangpi deih hen thla an cham le, an auh rawh. Churawhchun,

²¹LALPA nih Asiria kawrsen leh an hotu tla thah ding hen vânmifial a fial. Churawhchun Asiria lal lianchem chu ningzâk bû hen a kîr rawh. Ni khat chu a pathian biakin ah a um liauah a fapa zeimaw mi tla nih an pa Asiria lal lianchem chu an thah rawh.

²²Hi hâwi hen LALPA nih Asiria lal lianchem Senakerib thiltikhonâk leh an mêlma dang lakah mi chu Lalchem Hezekiah leh Jerusalem ah mi tla ruang a suah na. Mi tla chu an kiangkam ram mi tla hen rem tak hen a umtir na.

²³Mi tamtak LALPA sinah thil ap leh Hezekiah sinah lâwmman pêk ding hen Jerusalem ah an hawng, chu thawk hen phun zawzawng nih Hezekiah rangah phun zawzawng nih Hezekiah chu an zah rawh.

²⁴Chu liau chun Hezekiah chu thi viviar hen a damlo. LALPA sinah thla a cham le, a dam nawlhnâk ding mi theihtirnâk a pêk.

²⁵Sikhawmsele Hezekiah chu LALPA sinah a rangah leh Juda leh Jerusalem ruangah a lâwmnâk zauhtir lo hen â zûm tuk ruangah tuarnâk a hawng um.

²⁶A nehnûn chun Hezekiah leh Jerusalem mi tla chu thinlung nautak hen an um ruangah Hezekiah thih tiang hen rêpnâk an tlûnah a tlungtir lo.

²⁷Hezekiah chu thungâi a nei le, mikip nih an zah. Thil siahnâk in kardang tla a siam le, chunah chun ngûn, tangka, lungsung, rimthâw, phaw tla leh thil dang sung tak tla a siah.

²⁸Chu lo khawmah thil siahnâk in tla a sak le, fâng, uain, oliv sariak, ran in tla, ranrâwl siahnâk in,

²⁹chubang lo khawm chu Pathian nih dawrâ tla leh chawchal tla, neih-leh-siahnâk tamtak a pêk mi khuapi tamtak ah a um.

³⁰Hezekiah nih Gihon tiva a dil le, Jerusalem leiah a luangtir. Hezekiah chu a thilti zeizawng ah a dingchang le,

³¹Babulon ram ruangrûl ah hawng kal mi nih thâwngthâng tla, thil um dahlo mi a deih le, Hezekiah chu amah thinlung niknâk ding hen Pathian nih a ngâichâng.

³²Lalchem Hezekiah thilti dân zawzawng leh LALPA sinah â pumpêk zia tla chu Amos fapa khuavâng Isai muhnâk leh Juda leh Israel lal tla thâwngthâng rînnâk bu ah rîn asi.

³³Hezekiah chu a thi le, lal thlân mun tlûn dauh mi tlûnah an phûm. A thih ni ah chun Juda leh Jerusalem mi zawzawng nih zah tak hen ruak an râl. A fapa Manaseh chu a ruangrûl ah a lal.