Read Bawm Chin 2 CHRONICLES 33 Bible Online

2 CHRONICLES 33 - Bawm Chin bible

2 CHRONICLES 33

¹Manaseh chu Juda lal asi liauah kum leinih mi asi. Jerusalem ah kum sâwmnga leh kum nga lâi a rêl.

²LALPA nih a mi tla an kalnâk kipah a nar na mi phun tla zûl hen LALPA tlûnah Manaseh nih thilsual a ti.

³A pa Hezekiah nih a râwk rawh mi lunglotu tla ruk sawnhnâk a siam nawlh. Baal sawnhnâk mâichâm tla a siam le, pathiannu Aserah lem leh ârfi tla a sawnh.

⁴LALPA nih amah sawnhnâk mun kumza ding a ruat rawh mi Biakin ah lunglotu mâichâm a siam.

⁵Biakin kulh mun nih ah ârfi sawnhnâk mâichâm a siam.

⁶A fapa tla chu Hinom Kuam ah duahphung bâwlnâk ah a mang na. Chamchawh thiam leh dâwithiam tla a mang na le, vânṭhatnâk simkantu leh mithi sawnhtu sinah thu a deih. LALPA lakah fâk tak hen thilsual a ti le, a thin a thawktir.

⁷Pathian nih David leh a fapa Solomon sinah a ruat rawh mi mun Biakin ah mi lem tla a siah, “Hi Jerusalem ah mi Biakin hi Israel phun leinih ram zawzawng ah keimah sawnhnâk mun rangah ka thîm mi chu asi.

⁸Israel mi tla nih ka thupêk zawzawng leh ka to-aw Mosi sinah Dân ka pêk mi zawzawng an zûl chun anmah thlâk natu sinah ka pêk na mi ram ah mi hi nar hen suah na ding ka siang na awt lo,” a ti rawh mi hâwi khan.

⁹Manaseh nih LALPA a mi tla kalnâk ah a nar na mi phun tla Israel nih thilsual an ti mi ngâk hen fâk dauh hen Juda mi tla a tipi na.

¹⁰LALPA nih Manaseh leh a mi tla chu simhkan na khawmsele a thu an ngâi duh loh.

¹¹Churuangah Siria kawrsen tla chu LALPA nih Juda tla a rûntir na. Manaseh chu an tleih le, rêng an khimh le, thîr chikchîn hen an khih le, Babulon ah an kalpi.

¹²Chu a tuarnâk ruangah chun thinlung ah naunâk a nei le, LALPA Pathian lei hâwi hen a sinah ṭangpi a ngiar.

¹³Pathian nih Manaseh deihnâk chu a pawm le, Jerusalem leiah a kîrtir le, lâi a rêl nawlh. Chu thawk hen Manaseh nih LALPA chu Pathian asi zia a theih rawh.

¹⁴Chu nehnûn chun Manaseh nih David khuapi saklei kângah kulh sâng tla a siam le, marlei Gihon Tinung vakuam thawk hen, Ngâ Kulh kawtkâ tiang leh Ophel an ti mi khuapi mun tiang hen a siam. Juda ram khuapi kulhnei kipah kawrsen murui a siah na.

¹⁵Biakin ah mi ram dang pathian tla, chu mun ah mi lem a siah mi tla, tlâng tlûnah lunglotu mâichâm biakin ah a siah mi leh Jerusalem mun dang dang mi tla chu khuapi lênglei ah a lawnh phin na.

¹⁶LALPA sawnhnâk mâichâm tla a tharh nawlh le, chunah chun kawmhnâk thil ap bâwlnâk tla leh lâwmthu simnâk tla a ap. Juda mi tla zawzawng chu LALPA Israel Pathian sawnh hep ding hen thu a pêk na.

¹⁷Mi tla nih mun dang tla ah bâwlnâk ap rawh khawmsele, mi tla nih chun LALPA Pathian sinah cho bâwlnâk an pêk rawh.

¹⁸Manaseh nih thil a ti mi dang tla, Pathian sinah thlachamnâk leh khuavâng nih LALPA Israel Pathian nih thu a sim mi zawzawng chu Israel lal tla thâwngthâng rînnâk bu ah rîn asi.

¹⁹Lal thlachamnâk leh Pathian nih a sângnâk, a rim lânah thilsual a ti mi tla, lunglo pathiannu Aserah lem leh a sâwnhnâk mun siam mi tla zawzawng chu khuavâng thâwngthâng rînnâk bu ah rîn asi.

²⁰Manaseh chu a thi le, lal in kiang thlân ah an vûi le, a fapa Amon chu a ruangrûl ah a lal rawh.

²¹Amon chu Juda lal asi liauah kum kul leh kum nih mi asi le, Jerusalem ah kum nih lâi a rêl.

²²A pa Manaseh hâwi hen LALPA tlûnah thilsual a ti le, a pa sawnh mi milem a sawnh.

²³Sikhawmsele, a pa hâwi hen nâu tak hen LALPA leiah a kîr duh loh, a pa ngâk hen a sual zia a zual dauh.

²⁴A rianṭuantu tla nih an phiar le, a lal in ah an thah.

²⁵Juda mi tla nih Amon thahtu tla chu an thah hep le, a fapa Josiah chu lal ah an siam.