Read Bawm Chin 2 CHRONICLES 34 Bible Online

2 CHRONICLES 34 - Bawm Chin bible

2 CHRONICLES 34

¹Josiah chu Juda lal asi liauah kum riat mi asi, Jerusalem ah kum sâwmthum leh kum khat lâi a rêl.

²LALPA lawmhkâng hen thil a ti le, amah thlâktu lalchem David zia châwng hen Pathian dân zawzawng rep tak hen a zûl.

³Josiah chu kum riat mi asi liauah lal asi le, thungâi a ngâksia rih, amah thlâktu lalchem David Pathian sawnh a dawmh rawh. Kum li nûn chun lunglotu tla pathian sawnhnâk mun, pathiannu Aserah lem leh milem dang tla râwk a dawmh rawh.

⁴Amah thupêk hen a mi tla nih Baal sawnhnâk mâichâm leh a kiangah mi rimthâw duahnâk tla khawm an râwk hep. Aserah lem leh milem dang tla chu an rial dip le, milem sawnhtu tla thlân ah an vawrh.

⁵Lunglotu tla bâwlpu ruh tla chu an pathian sawnhnâk mâichâm ah a duah. Hi hâwi a ti ruang hin Juda leh Jerusalem chu a dân hâwitê hen a thenhlimhtir nawlh.

⁶Khuapi lakah mi khawm, chu hâwi hen a râwk le, Manaseh, Efraim, Simeon phun umnâk leh marlei kângah Naphtali tiang a râwk ver.

⁷Marlei kâng mi ram zawzawng ah mâichâm leh Aserah lem chu a rial dip le, rimthâw duahnâk mâichâm khawm a khuai dip. Churawhchun Jerusalem leiah a kîr nawlh rawh.

⁸A lâirêlnâk kum leiriat asi nûnah, ram leh lunglotu milem sawnhnâk veih dep hen Biakin chu a thenhlimhtir le, lalchem Josiah nih minung pathum Azaliah fapa Saphan, Jerusalem ah lâirêltu Maaseiah leh rianṭuan hotu lian tak Joahaz fapa Joah chu Biakin remh ding hen a fial na.

⁹Biakin thawhlâwm tangka Levi nih a kil mi chu bâwlpu lianchem Hilkiah sinah an pêk. (chu thawhlâwm chu Efraim leh Manaseh mi leh marlei ram ah mi leh Juda mi tla, Benjamin leh Jerusalem mi tla thawk hen khawlh mi asi.)

¹⁰Chu tangka chu Biakin remh hotu pathum sinah an pêk le,

¹¹annih nih a saktu tla sinah thing leh lung châwknâk ding hen an pêk na, Juda lalchem thupêk hen râwk mi tla tharh nawlh ding hen.

¹²Rianṭuantu tla chu thungâi zumh an kâi. Levi mi pali, Merari chi lakah mi Jahath leh Obadiah, Kohat chi lakah mi Zekariah leh Meshullam nih an zauhdik. (Levi tla chu tumphung leikângah thiam tak mi an si.)

¹³Levi dang tla chu mun dang ah thil kuat thu ah leh rianṭuan dang dang zauhdiktu tla an si le, a dang chu lasuirîn kiltu tla leh vêngtu tla an si.

¹⁴Hilkiah nih tangka chu a siahnâk mun ah mi a lâk liauah, LALPA Dân bu Pathian nih Mosi sinah a pêk mi chu a tawng.

¹⁵Hilkiah nih Saphan sinah, “Hi Biakin ah hin LALPA Dân bu ka tawng,” a ti le, lasuibu chu Saphan sinah a pêk.

¹⁶Saphan nih lalchem sinah a kalpi le, a sinah, “Na thupêk hâwi hen thil zeizawng kan ti rawh.

¹⁷Biakin mi tangka khawm kan lâk le, rianṭuantu tla leh zauhdiktu tla sinah kan pêk na.

¹⁸Hilkiah nih hawng ka pêk mi lasuibu hi,” a ti le, lalchem sinah fâkpi hen a rêl.

¹⁹Lalchem nih lasuibu rêl a hawng theih rawh chun, a thinlung fâk tuk ruangah a puan a thlêk le,

²⁰Hilkiah, Saphan fapa Ahikam, Mikaiah fapa Abdon, lasuirîntu Saphan, lal vêngtu Asaiah tla chu hi hâwi hen thu a pêk na:

²¹“Kal ule, Israel ram leh Juda ram ah mi leh ka rangah LALPA sinah thu va deih u. Hi lasuibu lakah sîntirnâk tla hi hâwl u. Hawng kan thlâktu tla nih LALPA thu zûl lo hen, hi lasuibu nih a sim hâwi hen thil an ti lo ruangah kan lakah LALPA chu a thinrun asi,” a ti.

²²Lalchem thupêk hen Hilkiah leh midang tla chu khuavâng nunau pakhat a min Huldah, Jerusalem an peh thar mi lakah um mi sinah thu deih ding hen an va kal. (A pasal chu Tikvah fapa Salum, Harhas tupa asi, Biakin ah mi kawrfual zauhkhenhtu asi.) Chu nunau sinah thil a hawng umdân tla an sim le,

²³anih nih LALPA sin thawk hen thu a theih mi tla chu lal va simh ding hen a kîrtir na.

²⁴“Jerusalem leh a mi tla chu lasuibu ah siat rîn mi tla an rêl mi chu lalchem sinah tlungtir hen ka rêp na awt.

²⁵An hawng ka duh lo le, pathian dang tla sinah bâwlnâk ap hen thil an ti mi zawzawng nih ka thin an runhtir. Jerusalem tlûnah ka thinthawknâk chu a reh ding asi lo.

²⁶Amah lalchem sin ngelchel ah kei Israel LALPA Pathian tak nih ka sim asi: Lasuibu ah rîn hen a um mi hi ngâi le,

²⁷Jerusalem leh a mi tla rêp ding hen thihnâk thu na theih rawh chun na nipuan thlêk hen leh ṭap hen ka mâika ah nâu tak hen na rim.

²⁸Kei nih nan thlachamnâk ka theih hen Jerusalem tlûnah rêpnâk ka hawng tlungtir ding mi chu na thih tiang tlunglo hen a um lai le, thlangamtê hen ka nan thihtir lai,” a ti. Chu thuchah hen chun lalchem Josiah sinah an kîr rawh.

²⁹Lalchem Josiah nih Juda leh Jerusalem ah mi ruitu zawzawng a pumh hep na le, a rual hen Biakin ah an kal le,

³⁰bâwlpu leh Levi tla leh zapi minung zawzawng a nei mi leh a pâm mi hen an zûl na. Lalchem nih Biakin ah an tawng mi Thudântuk Bu chu hâu fâk tak hen a rêl hep.

³¹A lal umnâk mun ah chun a dîr le, LALPA sinah a thu ngâi ding leh a thinlung zawzawng leh a thlarau zawzawng hen a dân thu leh a thupêk zûl ding hen thudântuk a siam, chu lasuibu ah thutiamnâk a nei mi zawzawng chu mang rawh ding hen.

³²Benjamin mi leh Jerusalem ah um mi tla chu thudântuk zûl rawh ding hen thu a tiam tir na. Jerusalem ah mi zapi tla khawm nih anmah thlâktu tla Pathian sinah thudântuk an siam mi tla chu anna âwi.

³³Lalchem Josiah nih Israel mi lakah milem fihnungkâi zawzawng chu a veih hep, a dam sung zawzawng ah LALPA an thlâktu Pathian rianṭuan ding hen zapi tla a ngiar na.