Read Bawm Chin 2 CHRONICLES 35 Bible Online

2 CHRONICLES 35 - Bawm Chin bible

2 CHRONICLES 35

¹Lalchem nih LALPA zahnâk dingah Jerusalem ah Kalkanh Kût a mang, kûtnâk rang dingah a thla khatnâk a ni leilinâk ah ran tla an thah.

²Bâwlpu tla chu Biakin ah rianṭuan ding hen a ruat na le, ṭha tak ti ding hen thu a pêk na.

³LALPA sinah pumpêknâk nei mi tla sinah, Levi tla leh Israel lakah sîntirtu tla sin khawmah hi bang sîntirnâk tla hi a pêk na: “Hi Thudântuk Bâwm thenhlimh David fapa lalchem Solomon nih a sak mi Biakin sungah siah u. Mun dang dangah put lo rawh hen, LALPA nan Pathian leh Israel mi tla rian chu nan ṭuan rawh ding asi.

⁴A chi dân hâwi vima hen Biakin ah nan mun luah ule, David fapa lalchem Solomon nih mawhphurhnâk a ruat rawh mi hâwi hen.

⁵Khatlei khatlei, Israel dâwngsungkhur a ṭangpi tawnh kho ding hen a siam u.

⁶Kalkanh Kût kêl leh dawrâ fa tla thah u. Tuah dân hâwi hen a thenhlimh ule, nan hâwi Israel mi tla nih zûl ding hen LALPA nih Mosi sinah sîntirnâk a pêk mi chu.

⁷Lalchem Josiah nih Kalkanh Kût rangah mang dingah amah ranrual lakah mi dawrâ fa, kêl fa sâng sâwmthum leh chawchal sâng thum a pêk.

⁸A rianṭuantu tla khawm nih zapi minung bâwlpu leh Levi tla mang dingah an pêk na. Biakin rianṭuan zauhkhenhtu Hilkiah bâwlpu lianchem, Zekariah leh Jehiel nih bâwlpu tla rangah dawrâ fa leh kêl fa sâng nih leh saruk, rianṭuantu tla rangah chawchal zathum an pêk na.

⁹Levi tla lakah ruitu Konaniah, Semaiah leh a unaupa Nethanel, Hasabiah, Jeiel leh Jozabad nih Levi tla nih bâwlnâk ah an mang dingah dawrâ fa leh kêl fa sângnga leh chawchal zanga an pêk na.

¹⁰Thil zeizawng Kalkanh Kût rangah timhtuah thluh asi rawh chun, lalchem nih thu a pêk na mi hâwi hen bâwlpu leh Levi tla nih anmah mun chiau an luah rawh.

¹¹Dawrâ fa leh kêl fa an thah rawh chun Levi tla nih an vun an lîk le, bâwlpu tla nih a thisen chu mâichâm tlûn an theh.

¹²Churawhchun zapi tla chu duahphung rangah mang mi ran chu dâwngsungkhur ah a murui hâwi vima hen an ṭhenh na. Mosi Dân ah sîntirnâk hâwitê a ap asi khonâk ding hen.

¹³Levi tla nih Kalkanh Kût sâ chu dân hâwi hen mei ah an em le, thil ap mi thenhlimh sâ chu bêl nâ nei leh khêng ngiang nei ah an suang le, zapi tla sinah an ṭhenh sawm na.

¹⁴Chubang tla chu an ti thluh rawh chun, Levi tla nih sâ chu anmah leh Aron thlâk bâwlpu rangah leh bâwlpu tla nî tlâk tiang duahphung ran thâu zawzawng duah heptu tla sinah an ṭhenh na.

¹⁵Hi bang tumphung leikângah a mi Asap thlâk Levi tla, lalchem David sîntirnâk a ruat mi lakah umtu tla: Asap, Heman, lal khuavâng Jeduthun sin khawm an pêk na. Biakin kulh kawtkâ vêngtu tla lam chu an mun kaltâk ding asi loh, Levi dang tla chu Kalkanh Kût timhtuah an herh ruangah.

¹⁶Chu hâwi hen lalchem Josiah nih thu a pêk mi zawzawng, LALPA sawnh ding mi leh Kalkanh Kût mang ding mi tla, mâichâm ah thil ap duah mi tla, chu ni chun lîm asi rawh.

¹⁷A ni sarih kar chu Israel mi zawzawng chunah um mi tla chu Kalkanh Kût leh Sang Thilnu telh loh Kût chu an mang rawh.

¹⁸Khuavâng Samuel umnâk thawk hen chu hâwi hen Kalkanh Kût an mang dah loh.

¹⁹A lânah lal tla âukhawm nih Josiah nih lâi a rêl mi a kum leiriatnâk ah amah lalchem Josiah, bâwlpu tla, Levi tla, Juda leh Israel Jerusalem mi tla hen an mang mi hâwi hen Kalkanh Kût chu hâwi chu an mang lo.

²⁰Lalchem Josiah nih Biakin rangah a ti thluh rawh chun Aigupta lalchem Neko nih Eufretis Tiva mi Karkemis ah a do ding hen a kawrsen tla a kalpi na.

²¹Sikhawmsele Neko nih Josiah rangah hi thu hi a chah: “Hi tuknâk hi nang Juda lal rangah kan tum mi asi lo. Nang do ding hen hawng ka si lo le, ka mêlma mawhsareh do ding hen Pathian nih hawng ka simh mi asi. Pathian keimah leiah a ṭângṭawm ruangah hawng ka do lah, chu lo chun nangmah râwknâk lam asi lai,” a ti.

²²Sikhawmsele Pathian nih lalchem Neko mang hen thu a sim mi chu a ngâi duh lo le, dang tak hen â thuam le, Megido tuknâk phâi ah a va kal.

²³Râltuk liau takah lalchem Josiah chu Aigupta chanhtiang thalzum nih a dingh rawh. A to-aw sinah, “Hinah mi hi hawng ka kalpi, nganfâk fâk tak ka tawng,” a ti.

²⁴A kari lakah mi chu an châwi le, a kari dang lakah an siah le, Jerusalem ah an kalpi. Chunah a thi le, lal thlân ah an vûi rawh. Juda leh Jerusalem mi zawzawng nih an ulh.

²⁵Khuavâng Jeremia nih lalchem Josiah lakah lungfâknâk thu a phuah. Nunau khawm mipa khawm Josiah rangah lungfâknâk la an sak mi chu Israel ram ah dân hâwi hen an nei. Hi la hi sûnnâk la phuah mi tla lakah a um.

²⁶Josiah thilti zawzawng LALPA lakah â pêk zia, Dân a zûl zia,

²⁷a thâwngthâng a bul thawk hen a dawngh tiang Israel leh Juda lal tla thâwngthâng rînnâk bu ah rîn asi.