Read Bawm Chin 2 CHRONICLES 36 Bible Online

2 CHRONICLES 36 - Bawm Chin bible

2 CHRONICLES 36

¹Juda mi tla nih Josiah fapa Joahaz chu lal si ding hen Jerusalem ah sariak an thuh.

²Joahaz chu lal asi liauah kum kul leh kum thum mi asi, Jerusalem ah thla thum lâi a rêl.

³Aigupta lalchem Neko nih a tleih le, Juda mi tla chu tangka kilogramme 3,400, ngûn kilogramme 34 siah rang dingah a lâk.

⁴Neko nih Joahaz unaupa Eliakim chu Juda lal ah a siam le, Jehoiakim ti hen min dang a phuah. Joahaz chu Neko nih Aigupta ah a kalpi ving.

⁵Jehoiakim chu Juda lal asi liauah kum kul leh kum nga asi le, Jerusalem ah kum leikhat lâi a rêl. LALPA a Pathian lakah thilsual a ti.

⁶Babulon lalchem Nebukadnezar nih Juda ram a rûn le, Jehoiakim a tleih le, Babulon ah rêng khimh bû hen a kalpi.

⁷Nebukadnezar nih Biakin ah mi thil tla a lâk le, a Babulon ah a lal in ah a siah.

⁸Jehoiakim nih thil a ti mi zawzawng, thil fihnungkâi leh sualnâk a ti mi chu Israel leh Juda lal tla thâwngthâng rînnâk bu ah rîn asi. A ruangrûl ah a fapa Jehoiakin a lal.

⁹Jehoiakin chu Juda lal asi liauah kum leiriat mi asi, Jerusalem ah thla thum leh ni râ lâi a rêl. Anih khawm LALPA lakah thilsual a ti bâk.

¹⁰Tifûr a tlâk rawh chun Jehoiakin chu Nebukadnezar nih Babulon ah sal ah a put ving le, Biakin ah mi thil-le-rî khawm a kalpi hep. Nebukadnezar nih Jehoiakin patê Zedekiah chu Jerusalem leh Juda lal ah a siam.

¹¹Zedekiah chu Juda lal asi liauah kum kul leh kum khat mi asi le, Jerusalem ah kum leikhat lâi a rêl.

¹²LALPA tlûnah thilsual a ti le, LALPA thu khuavâng Jeremia nih a sim mi chu thinlung nâu tak hen a ngâi duh loh.

¹³Zedekiah chu Nebukadnezar nih zumhkâi tak hen Pathian min hen thutiamnâk nei êu ding a ti piak mi a êl. Lungkhung tak hen a ngâi duh lo le, LALPA Israel Pathian leiah kîr ding hen a rim duh lo.

¹⁴Chu lâwng khawm silo hen Juda tla lakah ruitu tla leh mi zapi tla khawm nih an kiangkam ah mi tla zûl hen milem tla an sawnh le, LALPA amah ngelchel nih a thenhlimhtir mi Biakin khawm an nawmh rawh.

¹⁵LALPA an thlâktu Pathian nih anmah leh Biakin chu zuah ding a duh ruangah anmah simhkanhtu khuavâng a fial vima.

¹⁶Sikhawmsele, Pathian mifial chu an do le, a thu tla siarlo hen khuavâng chu an nihsanh, a dawnghnâk ah chun LALPA thinthawknâk chu a fâk tuktarâi le, pakhat khawm a him mi an um lo.

¹⁷Churawhchun Babulon lal chu anmah a dotir na. An tlangvâl tla chu Biakin ah mi tiang a thah na. Âu lak khawmah upa leh ngâksia, nunau, mipa, a dam leh damlo mi tlûnah khuaruatnâk a nei lo. Pathian nih a kut lakah a pêk hep na.

¹⁸Babulon lal nih Biakin ah mi sum-le-pâi, lal neih-le-siah, a rianṭuantu tla thilneih zawzawng chu Babulon leiah a put hep.

¹⁹Biakin leh khuapi leh lal in leh mun zawzawng neih-le-siah zawng a duah hep le, khuapi kulh vâm tla a chimtir hep.

²⁰An thah bang tla chu Babulon ah an kalpi le, lal leh a thlâk tla sal ah Persia lal a hawng dîr tiang hen an um.

²¹Jeremia mang hen LALPA nih a sim mi kha a hawng tlung taktê rawh asi: “Dinhni manglo hen kum sâwm sarih kar chu ram chu lâwng tleng hen a um lai,” ti thu hâwi khan.

²²Persia lal lianchem Kirus a lal tîr kum ah LALPA nih Jeremia mang hen thu a sim mi kha a dik ti a lang. Hi bang thupêk tla hi khulrang tak hen a ram sung zawzawng ah rêl ding hen lasuirîn a kuat hep:

²³“Hi hi Kirus Persia lal lianchem thupêk asi: LALPA vân Pathian nih laikulh pumpi lâirêltu ah hawng ka siam le, Juda ram ah Jerusalem mi Biakin sak ding hen thu hawng ka pêk. Tuah Pathian mi zawzawng tla chu, chunah chun kal ule, nan sinah LALPA Pathian um seh,” ti hen.