Read Bawm Chin 2 CHRONICLES 5 Bible Online

2 CHRONICLES 5 - Bawm Chin bible

2 CHRONICLES 5

¹Lalchem Solomon nih Biakin rianṭuan zawzawng a lîm rawh chun a pa David nih LALPA sinah a ap rawh mi tangka, ngûn leh thil dang tla chu Biakin ah thilsiahnâk kardang sungah a siah.

²Lalchem Solomon nih Israel phun lakah ruitu leh Israel chi lakah ruitu zawzawng chu LALPA Thudântuk Bâwm chu Zion David khuapi mi Biakin ah siah ding hen Jerusalem ah hawng a pûm ver ding hen a kawh na.

³Israel mi zawzawng chu Basâ Kût ah an hawng a pûm hep.

⁴Ruitu zawzawng an hawng hep rawh chun, Levi tla nih Thudântuk Bâwm chu an hawng châwi.

⁵Biakin leiah an zawnh rawh, bâwlpu leh Levi tla nih LALPA umnâk Puanin leh a thuamthil tla chu an ṭhial rawh.

⁶Lalchem Solomon leh Israel mi zawzawng tla chu Thudântuk Bâwm mâika ah anna pûm le, dawrâ tla leh ranrual rêl châwk lo rê hen bâwlnâk an ap.

⁷Churawhchun bâwlpu tla nih LALPA Thudântuk Bâwm chu Biakin ah an lûtpi le, thilsiam tla thla tangah an siah rawh.

⁸An thlazâr nih bâwm leh a zawnhnâk fung chu an khuh.

⁹Mun Thenhlimh zâwn ah dîr hen a zawnhnâk fung chu âuzawng nih muh kho asi, mun dang thawk hen chun a lang lo. (chu zawnh fung chu tutiang a um ko rih.)

¹⁰Israel mi tla Aigupta ram thawk hen an suak liauah LALPA nih Sinai Tlâng ah Israel tla sinah thudântuk a siam mi lungtlêp panih cho lo chu Thudântuk Bâwm lakah zeikhawm a um lo.

¹¹Bâwlpu zawzawng an tling hep, a murui ah siam lêmlo hen anna thenhlimhtir le, an ektê hen an um hep. Levi tumphung leikâng mi zawzawng Asap, Heman, leh Jeduthun leh anmah chi tla puan mangṭhia anna aih. Levi tla chu mâichâm saklei sîrah chêngchêng leh ṭingṭang hen an dîr le, an sinah bâwlpu tâwtawrâwt tumtu zâ leh kul an um. La saktu tla chu nuam tak hen tâwtawrâwt tumtu leh chêngchêng tumtu leh thil dang tla tumtu nih zûl hen LALPA sawr hen la an sak: “LALPA chu a ṭha ruangah sawr hen um seh, A dâwtnâk chu zungzâl hen a um kumza,” ti hen. Bâwlpu tla Biakin ah mi an suak kâ hen lâkkhatko ah sûm mit ser rê mi chêu hen. LALPA umnâk Biakin a hawng khat le, Pathian sawnhnâk rianṭuan kho asi lo rawh.