Read Bawm Chin 2 CHRONICLES 6 Bible Online

2 CHRONICLES 6 - Bawm Chin bible

2 CHRONICLES 6

¹Lalchem Solomon nih thla a cham, “LALPA, nangnih sûm leh mûi lakah um ding na thîm.

²Tuah na rangah Biakin rokual tak na um kumzanâk ding mun ding chu ka nan sak piak rawh,” a ti.

³Chunah chun Israel mi zawzawng chu an dîr pung. Anmah lei hawi hen lalchem nih Pathian sinah malsâwmnâk a deih piak na.

⁴“LALPA Israel Pathian chu sawr hen um seh! Anih nih chun ka pa David sinah thu a tiamh mi chu a theihkumza le, hi hâwi hen thu a sim,

⁵‘Aigupta ram thawk hen ka lâk na mi thawk hen tutiang keimah sawnhnâk ah Biakin sak ding hen Israel ram ah zei khuapi khawm ka thîm lo, ka mi Israel ruitu rangah âukhawm ka thîm lo.

⁶Sikhawmsele tuah Jerusalem mun chu keimah sawnhnâk mun dingah ka thîm le, David chu ka mi le lakah lâirêltu ah ka thîm asi.’”

⁷Chun, Solomon nih a sim vima le, “Ka pa David nih LALPA Israel Pathian sawnhnâk ding in sak a tum le,

⁸sikhawmsele LALPA nih a sinah, ‘Ka rangah Biakin sak na tum mi hi a dik asi.

⁹Sikhawmsele nang lam nih chun na sak lai loh, ka Biakin saktu ding chu na fapa nangmah sungsuak mi asi lai.

¹⁰“Tuah LALPA nih a thutiam chu a theihkumza: Ka pa ruangrûl ah kei chu Israel lal ka hawng si le, LALPA Israel Pathian sawnhnâk rangah Biakin chu ka sak rawh.

¹¹Israel mi tla sinah Thudântuk a siam mi rînnâk lungtlêp tla chu Biakin ah mi Thudântuk Bâwm ah ka siah rawh,” a ti.

¹²Solomon chu zapi mâika ah mâichâm kiangah a dîr le, a bân phar hen thla a cham.

¹³(Solomon nih dâr dawhkân a siam le, kulhsung lâi ah a siah. A dung a vâng tia cho hen feet 7.5 asi, a sânglei feet 5 asi. Chu dawnh tlûnah chun a kâi le, zapi mitmuh hen a siksidîr le, vân leiah a bân a phar.)

¹⁴“LALPA, Israel Pathian, tual leh vân ah nang hâwi mi zei Pathian khawm a um lo. Na sinah ê-aw ngâi hen na sinah an um liau chun Israel tla sinah thudân na tuk mi hâwi hen na dâwt kumza na.

¹⁵Ka pa sinah na thutiam khawm na theihkumza le, tusûn ni ah hin thu zeizawng chu a tling rawh.

¹⁶Tuah, LALPA Israel Pathian, thutiam dang ka pa sinah thu na tiamh mi, a thlâk tla lakah pakhat chu Israel lakah lâirêltu ding hen lal um kumza ding hen na simh mi chu ka pa nih ê-aw ngâi tak hen a ti mi hâwi hen na dân thupêk an ngâi chun pêk na rawh:

¹⁷Churuang chun tuah Israel tla LALPA Pathian, na to-aw David sinah thu na tiamh mi chu dik tak hen hawng zulh peh vima.

¹⁸“Sikhawmsele, Pathian, hi tual ah hin nunau leh mipa sinah hin na um kho tak awt men maw? Nang chu vân khawm nih an tlum lo mi, hi ka sak mi Biakin hi zeitin a kâu tâwk lai?

¹⁹LALPA Pathian, kei chu na to-aw ka si. Ka thlachamnâk hi hawng ka ngâi piak le, ka nan deih mi tla hawng ka siang piak rawh.

²⁰Hi Biakin hi a sûn a zân hen vêng rawh. Nangnih nangmah sawnhnâk mun ah na ruat mi asi ruangah, churuangah hi Biakin lei hawi hen thla ka cham chun ngâi rawh.

²¹Ka thlachamnâk leh Israel mi tla thlachamnâk khawm, hi leikâng hawi mi vial chu ngâi rawh. Na vân in thawk hen hawng kan ngâi le, hawng kan ngaihdam rawh.

²²“Mi diklo tak hen an phiar hen, hi na Biakin ah mi mâichâm ah a sual lo mi siat tleih ding hen an hawngpi chun,

²³LALPA vân thawk hen nang hawng le, na to-aw tla chu lâirêl piak na. A sual mipa chu rêp le, a sual lo mi chu âwltir.

²⁴“Na mi tla nih an lakah thilsual an ti ruangah mêlma tla nih neh na khawmsele an thinlung an lêt hen, thinlung nau tak hen hi Biakin ah ngaihdam deih hen thla an cham chun,

²⁵vân thawk hen ngâi piak na. Na mi tla sualnâk chu ngaihdam na le, anmah leh an thlâktu tla rangah na pêk mi ram ah kîrpi na.

²⁶“Na lakah thilsual an ti ruangah ruah na sûrtir lo khawmah hi na Biakin lei hawi hen nau tak hen thla an cham chun,

²⁷LALPA na to-aw Israel tla chu vân thawk hen ngâi le, an sual tla ngaihdam na le, thil dik ti ding hen sîntir na. Churawhchun LALPA, na mi le tla rangah ting kumza ding hen na pêk na mi na ram ah hin ruah hawng sûrtir.

²⁸“Hi ram ah hin pâmnâk a hawng tlung hen mawh, râi a lêng hen mawh, thli rumro nih mawh, khâubawk nih mawh, thlâi a râwk hen mawh, na mi tla mêlma nih an do hen mawh, an lakah damlonâk leh râi vawinâk a hawng um chun an thlachamnâk ngâi piak na.

²⁹Na mi Israel lakah thinlung fâk hen lawksawngnâk a hawng um hen hi Biakin leiah bân phar hen thla an cham chun, an thlachamnâk ngâi piak na.

³⁰Na vân in thawk hen ngâi le, ngaihdam piak na rawh. Nangmah cho nih minung thinlung ruat chu na theih.

³¹Mikip an thilti hâwi hen rêl piak na le, chu tikah na mi tla nih kan thlâktu sinah na pêk na mi ram ah a nan ṭih hen na thu an ngâi kumza khonâk ding hen.

³²“Ramdang mi lât tak ah um mi nih thil na tikho zia leh ti ding sek hen na um kumza zia theih hen hi Biakin ah hawng hen thla a hawng cham chun, a thlachamnâk chu ngâi piak rawh.

³³Nangnih vân ah na umnâk thawk hen ngâi le, a nan deih mi chu ti piak le, na mi Israel tla hâwi hen laikulh mi zawzawng nih a nan theih kho lai le, na thu an ngâi lai. Churawhchun hi Biakin ka sak mi hi nangmah sawnhnâk mun ding asi ti an theih lai rawh.

³⁴“Na mi tla an mêlma do ding hen na fial na tikah an umnâk zei mun tal thawk hen hi khuapi na thîm mi leh na rangah ka nan sak piak mi Biakin lei hawi hen thla an cham chun,

³⁵an thlachamnâk chu vân thawk hen ngâi piak na le, nehtirtu ah siam na.

³⁶“Na mi le tla, na lakah thilsual an ti hen, pakhat khawm sual lotu an um lo hen, na thinthawknâk ruangah an mêlma tla nih neh na hen ram dang lât takah sal ah an put na khawmsele, an thlachamnâk chu ngâi piak na.

³⁷LALPA, chu ram ah chun an rim hen na sinah misual an si ruangah thutluang an vâwr chun an thlachamnâk ngâi piak na.

³⁸Chu ram ah chun zumhkâi tak leh dik tak hen an rim hen hi ram hawng kan thlâktu tla rangah na pêk na mi sinah, hi khuapi na thîm mi, hi Biakin na rangah kan sak piak na mi lei hawi hen thla an cham chun ngâi piak na.

³⁹Na vân in thawk hen ngâi le, an lakah khuaruat le, na mi le sualnâk zawzawng chu ngaihdam na.

⁴⁰“Aw, ka Pathian, tuah hawng kan zauhnik le, hi mun ah thlachamnâk ka nan pêk mi ngâi.

⁴¹LALPA Pathian tuah thawk le, Thudântuk Bâwm na thiltikho zia zauhtirnâk hen hi Biakin ah hin lût le, um kumza rawh. Bâwlpu tla thilti zawzawng chu malsâwm le, an lakah na ṭhatnâk ruangah mi zawzawng anna lâwm khonâk ding hen.

⁴²LALPA Pathian, na thîm mi lal chu nawng lah. Na to-aw David rangah na dâwtnâk khawm theihkumza rawh,” a ti.