Read Bawm Chin 2 CHRONICLES 7 Bible Online

2 CHRONICLES 7 - Bawm Chin bible

2 CHRONICLES 7

¹Lalchem Solomon nih thla a cham mi a lîm rawh chun, vân thawk hen mei a hawng tlâ mi nih bâwlnâk ap mi chu a khangh hep le, LALPA umnâk mit ser rê hen a chêu mi chu Biakin a khat rawh.

²Chu hâwi hen mit ser rê chêu a hawng khat rawh chun bâwlpu tla chu an lût kho lo rawh.

³Israel mi tla nih vân thawk hen mei a hawng tlâ mi leh Biakin ah chêu an muh rawh chun lungphah tlûnah an tlû le, an kûn le, Pathian chu a dâwtnâk leh a ṭhatnâk ruangah an sawnh le, an sawr.

⁴Churawhchun Solomon leh mi zapi tla nih bâwlnâk an ap.

⁵Chaw ran rual 22,000, Dawrâ 120,000 kawmhnâk bâwlnâk ah ân mang. Churawhchun amah leh mi zawzawng nih Biakin chu an ap rawh.

⁶Bâwlpu tla chu an dîrmun ruat mi lakah an dîr le, Levi tla khawm anmah lei hawi hen Lalchem David nih a ruat rawh mi tumphung hen la an sak le, LALPA chu an sawr, “A Dâwtnâk Chu Zungzâl Asi,” ti hen David nih thu a pêk mi hâwi hen an sak. Zapi minung an dîr pung liauah bâwlpu tla nih tâwtawrâwt an tum.

⁷Solomon nih Biakin kulh sung a tualmâi chu a ap le, chunah chun duah hep mi bâwlnâk, sangvut thil ap, kawmhnâk thil ap, thâu tla a ap. Hi zawng bâwlnâk rang dingah dâr mâichâm a siam mi a mê tuk ruangah hi bang thil hi a ti mi asi.

⁸Solomon leh Israel mi zawng nih Basâ Kût chu ni sarih an mang. Zapi tamtak marlei kângah Hamat Liamnâk thawk hen mi tla, Simlei kângah Aigupta ramri thawk hen mi tla an hawng a pûm.

⁹Ni sarih chu mâichâm apnâk ah an mang le, ni sarih dang chu kûtnâk ah an mang. A ni dawngh chem ah an kût mang chu an khâr le,

¹⁰a thâituan chun a thla sarihnâk a ni kul leh ni thum ni ah Solomon nih mi zapi tla chu in leiah a tlungtir na rawh. LALPA nih a mi Israel tla, David leh Solomon rangah mal a sâwm na mi ruangah thungâi anna lâwm.

¹¹Lalchem Solomon nih Biakin leh a lal in sak a lîm rawh chun, a thiltum zawzawng chu a tlinh ver rawh.

¹²Chun, LALPA a sinah zân ah â langh le, a sinah, “Na thlachamnâk chu ka theih le, hi Biakin khawm ka sinah bâwlnâk mun rang dingah ka pâwm asi.

¹³Zeiliau zawngah ruah ka sûrtir hen mawh thlâi eitu dingah khâubawk ka fial hen mawh, ka mi le lakah râi ka veitir na hen mawh,

¹⁴ka sinah thla an cham hen an thilsual ti bâng hen an rim chun vân thawk hen ka ngâi lai le, an sual tla ka ngaihdam lai le, an ram chu ṭha hen ka siam nawlh lai.

¹⁵Hi Biakin hi zeiliau zawngah keimah sawnhnâk mun rangah ka ruat hen ka thîm rawh mi asi ruangah

¹⁶hinah thla an cham mi zawzawng chu ngâi ding hen ka tîm kumza lai. Hi Biakin hi ka zauhkhenh hen ka vêng lai.

¹⁷Na pa David nih a ti mi hâwi hen zumhkâi tak hen ka rian na ṭuan hen ka dân tla na zûl hen thu ka nan pêk mi hâwi hen zeizawng na ti mi asi chun,

¹⁸na pa David sinah thu ka tiamh mi Israel lakah mi a thlâk tla chu lâirêltu an si kumza lai ka ti mi kha ka zulh vima lai.

¹⁹Sikhawmsele nang leh na mi tla nih ka dân thu leh ka thupêk tla nan zûl lo hen, pathian dang tla nan sawnh mi asi chun,

²⁰hi ram kan pêk na mi lakah hin kan ṭhial ving lai le, hi Biakin keimah sawnhnâk dingah ka ruat mi khawm hi ka kaltâk ving awt. Mun kip mi nih siarlo leh zauhnawmh hen nan um lai.

²¹“Tu lam chun Biakin chu zahkâi tak hen a um le, chu tikah mikip a paltu nih chê an ti lai le, ‘Zeirangah LALPA nih hi bang ram hi hi hâwi hen a ti le?’ an ti lai.

²²Mi nih anna thawh lai le, ‘LALPA an Pathian Aigupta ram ah mi an thlâktu tla suaktirtu an kaltâk ruangah leh pathian dang leiah an kawptâk le, an sawnh ruangah asi. Hi hâwi hen LALPA nih siat-le-râwknâk a tlungtir mi hi, an ti lai,’” a ti.