Read Bawm Chin 2 CHRONICLES 8 Bible Online

2 CHRONICLES 8 - Bawm Chin bible

2 CHRONICLES 8

¹Solomon nih Biakin leh a lal in saknâk kum kul â tâwk.

²Lalchem Huram nih a pêk mi khua khawm a remh le, chunah Israel mi tla a umtir na.

³Hamat leh Zobah ram khawm a lâk le,

⁴palmira ramkaro ah mi kulhnei khuapi khawm a remh. Hamat ram ah khuapi, thil zeizawng siahnâk khuapi khawm a remh.

⁵Solomon nih hi bang khuapi tla khawm a remh: Tlûn dauh mi Beth Horon leh a tang dauh mi Beth Horon (kulhnei khuapi renh kho mi tla),

⁶Baalat khuapi leh thil siahnâk khuapi zawzawng, rang siahnâk leh kari siahnâk tla hen. A thiltum Jerusalem ah in sak ding mi, Lebanon ah in sak ding mi leh a lâirêlnâk ram ah a sak ding mi vial chu a ti vima.

⁷Solomon nih Kanaan minung thlâk tla Israel tla nih ram an lâk liauah an thah na lo mi zawng tla chu rianṭuantu ah zângran hen a mang na. Chu lakah Hit mi tla, Amor mi tla, Periz mi tla, Hiv mi tla, Jebus mi tla anna tel hep. Chu thlâk tla chu tutiang sal hâwi an um vima.

⁹Israel tla chu zângnâwr hen rianṭuannâk ah anna tel lo. Sikhawmsele kawrsen leikâng, kari hotu, rang tlûn chuantu leikângah mang an si.

¹⁰Chubang in dang dang saktu tla lakah zângran hen rianṭuan tla hotu tla chu zanih sâwmnga an si.

¹¹Solomon nih a nupi Pharo fanu David khuapi mi chu a rangah in a sak piak mi leiah a ṭhial. “LALPA Thudântuk Bâwm umnâk chu â thenhlimh ruangah ka nupi chu Israel lalchem David in ah a um ding asi lo,” a ti.

¹²Solomon nih Biakin a sak mi tualmâi ah mâichâm tlûnah LALPA sinah bâwlnâk a ap.

¹³Ni thenhlimh ni kipah Mosi dân ah a herh zia hâwi vima hen duah mi thil chu a ap: Dinhni, Thla Thar Kût, kum siar hen kût pathum, Sang Thilnu Telhlo Kût, Fângzûn Kût, leh Basâ Kût tla an si.

¹⁴A pa David nih a siam mi zûl hen nisiar bâwlpu tla rianṭuan leh bâwlpu tla ṭangpitu Levi tla chu lasak leikâng leh rianṭuan leikângah a titir vima na. Pathian mi David thupêk hen kulh kawtkâ vêngtu leh Biakin ngâktu nisiar hen a ruat na.

¹⁵David nih bâwlpu tla rangah thil siahnak leikang ah a sîntirnâk mi leh thil dang herh chu tling tak hen a um vima.

¹⁶Hi vial hi Solomon nih a thilti a limnâk chu asi. LALPA Biakin lungphûm a dirhnâk thawk hen a lim tiang hen rianṭuan zawzawng a zawh hep.

¹⁷Solomon chu Edom ram ah mi Agaba Likâwlneng kapah lawng umnâk mun Eziongeber leh Elat ah a va kal.

¹⁸Lalchem Hiram nih amah thupêk hen lawng khalhtu thiam tak mang hen meilawng a kuat. Ophir ram lei chun Solomon minung tla hen an kal le, ngûn kilogramme sâng leinga ngâk a tam Solomon sinah an tlungpi.