Read Bawm Chin 2 CHRONICLES 9 Bible Online

2 CHRONICLES 9 - Bawm Chin bible

2 CHRONICLES 9

¹Seba lalnu nih Solomon a minthang zia a theih le, amah niknâk ah thu har tatak va deih ding hen Jerusalem ah khualtlâwng a va kal. A sinah mi cherkhet a put na le, rimthâw tla, ngûn tla, lungmantam tla, sangâwngsâu tla tamtak a phurhtir. Solomon hen anna tawng rawh chun thu har tak hen a ruat mi tla chu a deih.

²A ektê hen a sâng piak hep; anih rangah simhfiang ding hen a har mi zeikhawm a um lo.

³Seba lalnu nih Solomon fingh dân leh a lal in sak dân tla a muh rawh.

⁴A rianṭuantu umnâk mun tla, a lal in ah rianṭuantu tla leh anna thuam dân tla, dawhkân ah buh timhtuahtu to-aw ni-le-puan thuam tla, Biakin ah bâwlnâk a ap mi tla a muh ver le, chê a ti le, a ruat dân a thiam lo rê.

⁵Lalchem sinah, “Ka ram thawk hen na finghnâk thu ka theih mi chu a dik thlo ngâk!

⁶Keimah ka hawng hen ka muh lân lo chu an hawng ka simh mi ka lung lo thlo. Na finghnâk khingkhuai khawm ka theih thluh lo mahi. Mi nih an sim mi ngâk hen na fing mahi.

⁷Na rianṭuantu tla na mâika ah an um kumza mi tla chu an vân a ṭha a, fing tak hen thu na sim mi khawm an theih phah awt!

⁸LALPA na Pathian chu sawr hen um seh! A min hen lâirêltu dingah lal ah a nan siam mi â lâwm asi ti a langh. A mi Israel tla chu a dâwt na hen anmah zauhkhenhtu rangah a nan duh le, dân leh diknâk na kil khonâk ding hen an lal ah a nan siam asi,” a ti.

⁹Lâwmman a hawng put mi tla chu lalchem Solomon rangah a pêk; ngûn kilogramme sâng li ngâk a tam leh rimthâw leh lungmantam tamtak khawm. Lalnu nih Solomon rangah lâwmman a pêk mi hâwi rimthâw ngâk hen a ṭha mi rimthâw dâng a um lo rawh.

¹⁰(Lalchem Hiram minung tla leh Solomon minung tla khawm nih Ophir ah mi lungmantam khawm an hawng put.

¹¹Solomon nih thing chu Biakin leilâk leh a lal in rangah leh ṭingṭang tumphung rang dingah a siam. Chu hâwi hen Juda ram ah a lânah zeikhawm muh asi dah loh.)

¹²Lalchem Solomon nih Seba lalnu nih a deih mi zawng chu a pêk hep. Lalnu nih lâwmman a pêk mi pêk rûlnâk bâk asi. Churawhchun a zûltu tla hen Seba ram leiah an tlung rawh.

¹³Kum siar hen Solomon nih sawlehtu tla thawk hen siah an pêk mi ngûn kilogramme sâng kul leh sâng thum ding tluk a tawng.

¹⁴Arabia lal tla leh Israel ram ah bial hotu tla khawm nih ngûn leh tangka an hawng pêk.

¹⁵Solomon nih phaw lian pipi zanih a siam, phaw pakhat lakah kilogramme sarih tluk ngûn hen dêng asi.

¹⁶Phaw a mê dauh mi zathum a siam, phaw pakhat lakah ngûn kilogramme thum dêng asi. Chu zawng chu Lebanon Thing Mun ah mi lal in ah siah asi.

¹⁷Lalchem nih laltophah lian tak siam mi a nei. Ngûn leh sâihâ hen thuamh mi asi.

¹⁸Lal tophah kâinâk chu bak ruk asi, kê thângnâk hen â tlâi le, ngûn hen thuamh asi. Khat lei sîr vevê ah a bân a um, kehlei vawrhlei hen chakeibaknei ruk a um.

¹⁹A leilâk dawng tlûn vevê ah a um, hi hâwi laltophah zei lalram khawm nih an nei dah lo.

²⁰Lalchem Solomon hâi zawzawng chu ngûn hep asi, Lebanon Tumun ah mi lal khêng leh bêl khawm ngûn hep asi. Solomon san ah chun tangkasa chu sung hen ngaih asi lo.

²¹Lalchem Hiram lawng murui hen an kal tâwn mi meilawng rual khawm a nei. Kum thum kipah a lawngrual tla chu ngûn, tangka, sâihâ, rimthâw leh mei neilo zâwng leh zâwng tla an hawng put tâwn.

²²Lalchem Solomon chu laikulh lal zawzawng ngâk hen fingh leh neih leikângah a chungnung dauh.

²³Pathian nih finghnâk a pêk mi ngâi ding hen thu an deih tâwn.

²⁴Chu bang tla zawzawng nih tangka leh ngûn, kawrfual, râlthuam, rimthâw, rang tla, sanatung tla an hawng put piak tâwn. Kum siar hen hi hâwi an ti kumza.

²⁵Lalchem Solomon nih kari leh rang siahnâk mun sângli a nei. Râltuknâk ah chuan ding mi rang sîng khat leh sâng nih a nei. A zeimaw zat chu Jerusalem ah a siah le, a dang tla chu khuapi dang dang ah a siah na.

²⁶Anih chu ram khat ah lal zawzawng Jordan Va thawk hen Eufretis Tivaa, Philistia ram leh Aigupta ramri tiang lakah mi tlûnah lâirêltu lalchem asi.

²⁷Lal asi liau chun tangka chu Jerusalem ah lung tluk cho ah ngaih asi, sidar thing khawm a tam tuktarâi le, Juda tlâng ram ah theipi kûng hâwi cho ah ngaih asi.

²⁸Solomon nih Musri thawk leh ram dang thawk hen rang tla a lâk lût.

²⁹Lalchem Solomon thâwngthâng a bul thawk hen a dawngh tiang hen Nathan khuavâng thâwngthâng, Siloh khua mi Ahijah thusim, leh khuavâng Iddo muhnâk rînnâk bu ah rîn asi. Israel lalchem Jeroboam lâirêlnâk tla zawzawng hen.

³⁰Solomon nih Israel zawzawng tlûnah Jerusalem ah lâi a rêl kar zawzawng chu kum sâwmli asi.

³¹A thi le, David khuapi ah an vûi le, a fapa Rehoboam chu a ruangrûl ah lal ah a um.