Read Bawm Chin Ezra lasuibu 3 Bible Online

Ezra lasuibu 3 - Bawm Chin bible

Ezra lasuibu 3

¹A thla sarihnâk ah chun Israel tla chu mah khua chiauah an um rawh. Jerusalem ah anna pum ver le,

²Jehozadak fapa Josua, a hâwi bâwlpu tla leh Sealtiel fapa Zerubabel leh a unau tla hen Israel Pathian mâichâm chu an dirh nawlh, chu lakah chun Pathian mi Mosi Dân sîntirnâk rîn mi hâwi hen duahphung bâwlnâk tla an pêk khonâk ding hen.

³Sikhawmsele sal tâng hawng kîr mi tla nih chun a lânah mi mâichâm munah mâichâm an siam nawlh mi ruangah chu ram ah um mi tla chu thungâi an ṭih na. Churawhchun zînglei leh zânlei duahphung bâwlnâk chu khuah tak hen anna dawmh nawlh rawh.

⁴Dân hâwi hen Basâ Kût an mang le, nisiar hen bâwlnâk a herh zia hâwi hen an ap.

⁵Chu lo khawmah bâwlnâk duah mi leh Thla Thar Kût ah ap ding mi leh LALPA sawnhnâk pumhpi zawzawng zâwnah an ap le, mah duh thu hen LALPA sinah thil ap ding mi zawzawng khawm an ap.

⁶Mi zapi tla nih Biakin sak ding dawmh lo rih khawmsele, thla sarihnâk a ni khat ni ah chun bâwlnâk duah mi chu LALPA sinah pêk anna dawmh rawh.

⁷Mi tla nih lung leiah rianṭuantu leh thing leiah rianṭuantu rangah tangka pêk ding asi, din ding, ei ding leh oliv sariak tla Tura khuapi leh Sidon khuapi ah Lebanon tlâng ah sidar thing Jopa khua leiah tipi ah hawng lawngh ding mi thlengnâk ding hen kuat asi. Chubang zawng tla chu Persia lal lianchem Kirus thu hen ti mi hep asi.

⁸Churawhchun chu kum khat a thla nih nûnah chun Jerusalem Biakin mun ah an hawng kîr hep rawh le, rianṭuan chu anna dawmh rawh. Zerubabel, Josua leh an ram mi minung zawzawng, bâwlpu tla leh Levi, sal tâng Jerusalem ah hawng kîr mi zawzawng tla nih an ṭuanpi na. Levi murui lakah kum kul thawk hen tlûnlei mi vial chu Biakin sak nawlhnâk rianṭuan lakah hotu an si.

⁹Levi mi Josua leh a fapa tla, a unau tla, Kadmiel leh a fapa tla, (Hodaviah thlâk tla) nih a rual hen Biakin sak leikângah an ho na. (Henadad thlâk Levi tla nih an bawmh na.)

¹⁰Lalchem David san liauah sîntirnâk pêk mi hâwi hen Biakin lungphûm anna dawmh rawh chun, bâwlpu tla khawm anmah munah tâwtawrâwt put hen an um le, Asap thlâk Levi chi tla khawm chêngchêng put hen an dîr le, LALPA an sawr.

¹¹A la nawlhnâk sak hen LALPA chu an sawr: “LALPA chu a ṭha le, Israel rangah a dâwtnâk chu zungzâl asi,” ti hen. Mikip an hâu chelh ri hen an âu le, Biakin lungphûm chu phûm anna dawmh ruangah LALPA chu an sawr.

¹²Bâwlpu upa dauh Levi murui chi lakah lukhâi dauh tla nih a lânah Biakin muhtu an si le, chu Biakin lungphûm chu an phûm rawh chun an ngaihsia le, an ṭap rawh. Sikhawmselei midang lam chu lâwm hen an âu.

¹³Âukhawm nih lâwm hen âu mi leh an ṭap mi chu theihthiam kho asi lo, an hâu a fâk tuktarâi ruangah râllâtpi thawk hen theih kho asi ruangah.