Read Bawm Chin Ezra lasuibu 4 Bible Online

Ezra lasuibu 4 - Bawm Chin bible

Ezra lasuibu 4

¹Juda leh Benjamin mi tla chu an mêlma tla nih sal ah an tâng mi an hawng kîr hen LALPA Israel Pathian Biakin an dirh nawlh mi thu an theih.

²Churawhchun Zerubabel leh chi lakah a lukhâi dauh tla chu va zauh ding hen an kal le, an sinah, “Kannih khawm nih Biakin sak kan bawmh na lai. Asiria lal lianchem Esarhadon nih hinah um ding hawng kan fialnâk thawk hen nan sawnh mi Pathian kha kan sawnh le, a sinah bâwlnâk tla kan ap,” an ti.

³Zerubabel, Josua leh chi lakah lukhâi dauh tla nih an sinah, “LALPA kan Pathian Biakin sak ding hen nan hawng kan ṭangpi kan herh loh. Persia lal lianchem Kirus nih thu hawng kan pêk hâwi hen kanmah nih kan sak awt,” an ti.

⁴Churawhchun chu ram ah um mi tla nih Juda tla Biakin sak chu thasia ding hen an ṭhih na.

⁵Persia sawrkar rianṭuantu tla khawm an rianṭuan kalh na ding hen an nawh na. Chu hâwi hen Kirus lâirêl kar zawzawng leh Darias lal kar zawzawng ah an ti.

⁶Churawhchun Zerzes, Persia lal lianchem lâirêl dawmh liauah Juda ram leh Jerusalem ah um mi mêlma tla nih anmah kalhnâk lasuirîn an hawng put.

⁷Persia lal lianchem Artakzerzes (Zerze fapa panihnâk) a lâirêl liauah Bislam, Mithredath, Tabeel leh an hâwi murui tla nih lal sinah lasuikuat an rîn fâwn. Chu lasuikuat chu Aramaik hawlh hen rîn asi le, rêl tikah lehsawm ding hen.

⁸Ram ṭhen lakah lâirêltu Rehum leh lasuirîntu Simsai nih Jerusalem thu ruangah Artakzerzes sinah lasui an kuat:

⁹“Lâirêltu Rehum leh ram lakah lasuirîntu Simsai, lâirêlpitu hâwi tla leh rianṭuantu dang a tîr thawk hen Elam ram ah Erek, Babulon leh Susa mi tla nih,

¹⁰mi thiltikho tak leh mi rokual Asurbanipal leh midang tla hen an in thawk hen an suak le, Samari ram khuapi ah leh Eufretis thlanglei ram mun dang dang ah an um mi tla chu lasui kuattu an si,” ti hen.

¹¹Hi hâwi hen Artakzerzes sinah Eufretis thlanglei mi tla nih lasui an kuat:

¹²“Bâwipa, na ram sungah mun dang thawk hen an hawng mi tla chu Jerusalem ah an um le, khuapi sual tak leh hel mang an dirh nawlh.Tuah a vâm tla an siam le, sâwtlotê ah dih ding hen a um.

¹³Bâwipa, hi khuapi hi dirh nawlh asi hen a kulh tla an siam dih rawh chun mi nih na sinah siah an pêk lai lo le, lal siah chu â zûk lai.

¹⁴Chu hâwi thil a hawng tlung ding mi chu an simh lo hen kan um kho lo le,

¹⁵churuangah a lânah thlâktu tla singsiahnâk bu ah hâwltir na ding hen kan simh asi. Chu hâwi na ti chun chu khuapi chu hel mang kumza asi zia leh a lân thawk hen lal leh ram lakah nawktirtu an si zia na muh lai, an minung tla khawm thungâi lâirêl piak an har. Churuangah asi chu khuapi a râwknâk san chu.

¹⁶Churuangah chu khuapi chu an dirh nawlh hen a vâm khua kulh tla an dih rawh chun Eufretis Thlanglei Ram chu na tangah na siah kho na ding asi lo rawh ti kan theih asi,” ti hen.

¹⁷Lal nih sângnâk lasui a kuat: “Lâirêltu Rehum, Simsai, ram bial laisuirîntu leh an hâwi tla Samari ram leh Eufretis ram zawzawng ah um mi tla chibai kan bûk na asi.

¹⁸“Lasui nan hawng kuat mi kha hawlhleh hen an ka rêl piak rawh.

¹⁹Thâwngthâng va deihfiang ding hen thu ka pêk na, Jerusalem khua hi a lânah lal tlûnah heltu ma an si, mihel tla umnâk ma si, nawknâk siamtu tla ma an si tih theihfiang ding hen.

²⁰Lal thiltikho tak tla nih chunah chun lâi an rêl hen Eufretis ram zawzawng lâi an rêl le, siah tla an khawlh na.

²¹Chubang khuapi saktu chu keimah nih thupêk dang ka pêk na lân lo chu a dîn rih ding hen thu suah u.

²²Chu chu a rang kho zia zia hen ti ule, kei rang khawm zeikhawm a pawi lonâk ding hen,” ti hen.

²³Chu Artakzerzes lasuikuat chu Rehum, Simsai leh a hâwi leh nih an rêl rawh chun, Jerusalem ah an kal sawm le, Juda khuapi sak chu zângran ko hen an bângtir na.

²⁴Biakin sak chu an bâng le, Persia lal lianchem Darias lâirêl kum nihnâk tiang hen anna dîn.