Read Bawm Chin Ezra lasuibu 5 Bible Online

Ezra lasuibu 5 - Bawm Chin bible

Ezra lasuibu 5

¹Chu liau chun khuavâng panih Ido fapa Hagai leh Zekariah nih Israel Pathian min hen Juda ram ah mi leh Jerusalem ah um mi tla sinah thu an sim.

²Churawhchun Sealtiel fapa Zerubabel leh Jehozadak fapa Josua nih an thusim chu an theih le, Jerusalem ah Biakin sak chu anna dawmh le, khuavâng panih nih an ṭangpi na.

³Churawhchun Eufretis thlanglei mi Tatenai, Sethar Bozenai leh an hâwi rianṭuantu dang tla Jerusalem ah an kal le, thu an deih na: “Hi Biakin hi a ruakhâu timhtuah hen sak ding âu nih thu an pêk na?” ti hen.

⁴Chu hâwi ber hen Biakin saktu bawmhtu tla khawm an deih na.

⁵Sikhawmsele, Juda ruitu tla chu Pathian nih a vêng na le, Darias sinah lasui an kuat mi, a sângnâk an muh lân lo chu Persia mi hotu tla nih zeitin khawm an ti na lo.

⁶Hi hâwi hen lal lianchem sinah thu an va tlunh:

⁷“Lal lianchem Darias, thlangam tak hen lâirêl hen um rawh.

⁸“Bâwipa, Juda umnâk ram ah kan va kal le, Pathian Biakin rokual chu lung lian tatak leh thing tla hen, a khua kulh tla khawm sak nawlh hen kan va muh ti kan theihtir. Rianṭuan chu zauhkhenhtu zauh vima hen ṭuan asi.

⁹“Churawhchun zapi tla ruitu tla chu, âu nih a ruakhâu timhtuah leh sak nawlh ding hen thuneihnâk an pêk na ti hen kan deih na.

¹⁰Anmah rui natu min khawm nangmah simh ding hen kan deih na.

¹¹“Annih nih an sâng le, ‘Tual leh vân Pathian to-aw tla kan si, a lânah kum tamtak kal rawh mi lakah Israel lal thiltikho tak tla nih a tîrah a ruakhâu timhtuah hen an sak rawh mi kha kan sak nawlh asi.

¹²Sikhawmsele, hawng kan thlâktu tla nih vân Pathian chu a thin an runhtir le, Kaldai lal Babulon ah mi lal Nebukadnezar chu anmah nehtu ah a ruat le, minung tla chu Babulon sal ah a put hep na.

¹³Babulon lalchem Kirus lâirêl a kum khatnâk ah Biakin sak nawlh ding hen thu a suah.

¹⁴Biakin ah mi ngûn leh tangka, bêl leh khêng Nebukadnezar nih Jerusalem Biakin ah mi a lâk le, Babulon ram biakin ah a siah mi chu hawng kan pêk nawlh. Chubang thil-le-rî tla chu Kirus nih Juda ram lâirêltu ah a siah mi a min Sesbazar kut ah a ap.

¹⁵Lal nih chun a sinah a khirh le, Jerusalem Biakin ah kalpi le, a lânah mi muntê ah Biakin chu sak nawlh ding hen a ti.

¹⁶Churawhchun Sesbazar nih lungphûm chu a phûm le, chu thawk hen tutiang sak asi vima le, sikhawmsele Biakin chu dih asi lo rih, an ti.

¹⁷“Tuah nang lal nih rem na ti mi asi chun, Babulon ah mi lal singsiahnâk bu lakah hâwl le, hi thu ah hin lal lianchem Kirus nih Jerusalem sak nawlh ding hen thu a pêk na ma pêk lo hawng kan simh le, hi thu ah hin na duh dân zei hâwi asi khawm hawng kan theihtir,” an ti.