Read Bawm Chin Ezra lasuibu 7 Bible Online

Ezra lasuibu 7 - Bawm Chin bible

Ezra lasuibu 7

¹Kum tamtak nûnah, Artakzerzes chu Persia lalchem asi liauah minung pakhat Ezra a um. Bâwlpu lianchem Aron amah thlâktu a lânah mi thu hi hâwi hen a zâwt. Ezra chu Seraiah fapa asi, Seraiah chu Azariah fapa asi, Azariah chu Hilkiah fapa asi.

²Hilkiah chu Salum fapa asi, Salum chu Zadok fapa asi, Zadok chu Ahitub fapa asi,

³Ahitub chu Amariah fapa asi, Amariah chu Azariah fapa asi. Azariah chu Meraioth fapa asi,

⁴Meraioth chu Zerahiah fapa asi, Zerahiah chu Uzi fapa asi, Uzi chu Buki fapa asi,

⁵Buki chu Abisua fapa asi, Abisua chu Phinehas fapa asi, Phinehas chu Eleazar fapa asi, Eleazar chu Aron fapa asi.

⁶Ezra chu LALPA Israel Pathian nih Mosi sinah a pêk mi Dân zawzawng theihtu asi. Ezra chu LALPA a Pathian nih mal a sâwm ruangah a deih mi zawng chu lal nih a pêk. Artakzerzes lâirêl kum sarihnâk ah Ezra chu Israel zapi minung tla, bâwlpu tla, Levi tla, Biakin tumphung leikâng tumtu murui, Biakin vêngtu leh rianṭuantu murui tla hen Babulon thawk hen an suak le, Jerusalem ah an kal.

⁸Babulon ah mi chu a thla khatnâk a ni khatnâk ah an suak le, Pathian ṭangpi hen a thla nganâk a ni khat ni ah Jerusalem ah an tlung.

¹⁰Ezra chu LALPA Dân sîn leikângah â pêk mi minung asi le, dân zawzawng pêk ding hen Israel mi tla a sîntir na.

¹¹Lal lianchem Artakzerzes nih hi hâwi hen theihtirnâk lasuirîn chu Ezra bâwlpu, LALPA dân leh thupêk, Israel tla sinah a pêk na mi zawzawng theihtu sinah a pêk:

¹²Lal lianchem Artakzerzes nih Ezra bâwlpu Vân Pathian Dân theihtu sinah lasuikuat:

¹³“Ka ram sung zawzawng ah Israel um mi zawzawng, bâwlpu tla, Levi tla, Jerusalem ah kal duhtu zawzawng rangah kal ding siang asi.

¹⁴Ka sinah mi remruattu pasarih tla hen Jerusalem leh Juda ram ah thil umdân tla nan sinah thu ka nan pêk na mi hâwi hen nan Pathian Dân hâwi hen thil an zûl ma zûl lo deihfiang ding leh zauhfiang ding hen ka nan fial na.

¹⁵Kei leh ka remruattu tla nih Israel Pathian Jerusalem ah amah Biakin pêk ding kan duh mi hâwi hen ngûn leh tangka ap ding mi khawm nan put ding asi.

¹⁶Babulon ram sung zawzawng ah ngûn leh tangka khawlh mi tla leh Israel mi leh an bâwlpu tla nih Jerusalem ah an Pathian rangah an pêk mi zawzawng hen nan put ver ding asi.

¹⁷“Hi bang tangka tla hen thiamthih tak hen chawchal tla, dawrâ chal tla, dawrâ fa tla, fâng tla, uain tla nan châwk lai le, Jerusalem Biakin ah mi mâichâm ah ap u.

¹⁸A leifuan tla nan nei mi chu nan hâwi le tla hen nan Pathian duhzia hâwi hen nan mang kho lai.

¹⁹Khêng leh bêl zawzawng Biakin ah rianṭuannâk ah an pêk na mi chu Jerusalem ah Pathian sinah nan pêk ding asi.

²⁰Thil dang zeizawng nan herh mi a um chun lal tangka kilnâk lakah mi nan tawng kho lai.

²¹“Eufretis thlanglei ram ah tangka kiltu tla zawzawng chu Ezra, Vân Pathian Dân theihtu nih a nan deih na mi chu a rang kho zia zia hen nan pêk ding asi.

²²Tangka kilogramme 3,400, wheat fâng kilogramme 10,000, uain litre 2,000, oliv sariak litre 2,000 leh chite an herh zat zawng.

²³Vân Pathian Biakin rangah thil herh nan pêk ding mi thu ah a thiamthih u, ka lakah leh ka nehnûnah lâirêltu tlûnah a rothawk sual lai ti theih u.

²⁴Biakin rianṭuantu leikângah kawpkaihtu tla, Levi tla leh bâwlpu, tumphung tumtu tla, Biakin vêngtu tla leh rianṭuantu tla chu siah nan khawlh na ding asi lo.

²⁵Nang, Ezra, Pathian nih finghnâk a nan pêk mi mangtu, Eufretis thlanglei ah um mi tla, na Pathian Dân zûltu tla zawzawng tlûnah zauhkhenhtu ah leh lâirêltu ah ka nan ruat asi, a theih lo mi tla Dân na sîntir na ding asi.

²⁶Âuzawng na Pathian Dân mawh a ram Dân mawh zûl duhlotu chu rêp sawm ding asi, thah hen mawh sal ah tângtir hen mawh, a thil neih tleih piak hen mawh rêngtlâk hen mawh rêp ding asi,” ti hen.

²⁷Ezra nih, “Hawng kan thlâktu LALPA Pathian chu sawr hen um seh! Anih nih Jerusalem ah LALPA Biakin zah ding hen lal chu hi hâwi hen a siam ruangah.

²⁸Amah Pathian khuaruatnâk ruangah lal leh a lâirêltu tla, a rianṭuantu thiltikho tak tla dâwt le riahnâk ka tawng, LALPA ka Pathian nih râlṭhatnâk hawng ka pêk le, Israel chi lakah a lukhâi dadauh tla chu ka sinah ka kîrpi kho na asi,” a ti.