Read Bawm Chin Ezra lasuibu 9 Bible Online

Ezra lasuibu 9 - Bawm Chin bible

Ezra lasuibu 9

¹Chubang zawzawng ti thluh asi rawh chun Israel mi leh ruitu tla chu an hawng le, zapi tla, bâwlpu leh Levi tla chu an kiangkam ram ah mi Amon, Moab, Aigupta, Kanaan mi, Hit mi, Periz mi, Jebus mi leh Amor mi tla lakah anna thliar loh ti thu an hawng ka simh. Chubang minung tla hâwi hen thil fihnungkâi an ti.

²Juda mi tla chu ramdang mi tla hen anna umh le, churuangah Pathian mi thenhlimh tla chu an nâwm rawh. Ruitu tla leh rianṭuantu tla chu buartu lakah a lukhâi an si rawh.

³Chu thu ka theih rawh chun ka lungfâk tukah ka nipuan tla ka thlêk le, ka sam leh ka khamul tla ka phâwi le, ngaihsiat bû hen ka to thlo.

⁴Chunah chun ngaihsia tak hen zânlei bâwlnâk tik tiang ka to. Zapi tla, sal tâng hawng kîr mi tla sualnâk Israel Pathian nih a sim mi ruangah ningṭihtu zawzawng ka kiangkam ah an hawng a pûm chiam.

⁵Zânlei kâng bâwlnâk tik asi rawh chun, ngaihsia tak hen ka um mi mun thawk hen ka thawk le, ka nipuan thlêk mi ruk bû hen bân phar hen ka siksidîr le, LALPA Pathian sinah thla ka cham.

⁶A sinah, “Pathian, na mâika ah ka lû tung ding khawm thungâi ka ningzak. Kan sualnâk chu kan dung ngâk sâng hen â pawng. Vân tawngh khet hen a sâng rawh.

⁷Hawng kan thlâktu san liau thawk hen tutiang kannih na mi tla nih sual rokual tak kan ti asi. Kanmah leh kan lal leh kan bâwlpu tla sualnâk ruangah ramdang mi lal tla kut ah tleih hen kan um le, thah leh râwk hen sal ah put hen kan um. Tusûn ni tiang hen ningzakkâi dawnghnâk hen kan um.

⁸Tuah sâwtlotê rang dingah LALPA kan Pathian kan lakah vêl na nei le, mi zeimaw zat chu sal ah mi hawng kan suah le, hi mun thenhlimh ah na hawng kan umtir rawh. Sal si rawh menza khawmsele nunchan thar na hawng kan pêk rawh.

⁹Sal sikhawmsele sal na kan sitir kumza lo. Lal lianchem chu kanmah sunhsaktu ah na siam le, anih nih Biakin â râwk rawh mi sak nawlh ding hen leh Jerusalem leh Juda ram ah um mun him tak hen nei kho ding hen kal ding hawng kan siangtir.

¹⁰“Sikhawmsele, Pathian, tuah chu hâwi hen thil a hawng um rawh mi chu kannih nih zei thu kan sim lai rawh?

¹¹Na to-aw khuavâng tla mang hen thu na kan pêk mi tla khawm kan ngâilo fâwn rawh, kan luah ding mi ram chu a luahtu minung tla thil nâwmtâm leh fihnungkâi titu tla nih khatlei dawng thawk hen khatlei tiang an luah ti hawng kan simh ruangah.

¹²Chu ram ah chun kan thlâk tla lâwm tak hen um kumza ding kan duh asi chun, chubang mi tla hen nupi pasal a umh lo hen anmah tla vânṭhatnâk ding hen kan bawp hen kan ṭangpi na ding asi lo ti hawng kan simh.

¹³Kan lakah kan sual ruangah leh diklonâk ruangah thil a hawng tlung mi ruang khawmah kan lakah rêpnâk a hawng tlung mi khawm, kan Pathian nih na kan rêp mi asi ti kan theih, kan ruat ngâk a nêm hen a thibang na kan zuah nget rih.

¹⁴Chu hâwi asi ruangah, zeitin na thupêk siarlo hen hi bang misual tla hen kanna umh nawlh zia lai? Chu hâwi kan ti chun na thin a thawk lai le, pakhat khawm zuah lo hen na kan veih dep lai.

¹⁵LALPA Israel Pathian, nang chu na rep le, na kan zuah. Kan sualnâk na sinah kan phuang asi, na mâika ah hawng kal khonâk kan nei lo,” a ti.