Read Bawm Chin NEHEMIAH 1 Bible Online

NEHEMIAH 1 - Bawm Chin bible

NEHEMIAH 1

¹Hi hi Hakaliah fapa Nehemiah nih rianṭuan a lîmnâk thu asi. Persia lal lianchem Artakzerzes a lalnâk kum kul a tlingnâk Kislev thla ah Susa khuapi ah ka um.

²Ka unau tla lakah pakhat Hanani chu midang tla hen Juda ram thawk hen an hawng le, Jerusalem thâwngthâng leh Babulon ah sal tâng kîr mi thu ka deih na.

³A thibang an ram leiah tlung mi tla chu thungâi anna hamh, an kiangkam ramdang minung um tla nih thungâi an zauhnawmh ti an ka simh. Jerusalem kulh khawm râwk chia hen a um nget ko rih le, a kulh kawtkâ khawm an duahnâk thawk hen remh asi lo rih ti an ka simh.

⁴Hi bang zawng thu ka theih rawh chun ka to le, ka ṭap rawh. Ni zeimaw zat chu ka lungfâk tuk ah tî-le-râwl ka ei lo. Pathian sinah thla ka cham,

⁵“LALPA, vân ah mi Pathian! Nang chu na rokual le, kannih chu nangmah ṭih hen kan um ko. Nangmah dâwttu leh na thupêk hâwi hen thil titu sinah chun na Thudântuk lakah rinhsanh tlâk na si.

⁶LALPA, hawng ka zauh le, na to-aw Israel mi tla rangah a sûn a zân hen thla ka cham mi hi hawng ka ngâi piak. Kannih Israel mi tla nih kan sualnâk tla ka hawng phuang asi. Hawng ka thlâktu leh kei nih thilsual kan ti rawh asi.

⁷Sual tak hen na lakah thil kan ti le, na thupêk tla hâwi hen thil kan ti lo. Na to-aw Mosi mang hen Dân na kan pêk mi tla khawm kan zûl lo.

⁸Tuah Mosi sinah thu na sim mi kha theihkumza rawh: ‘Nannih Israel mi tla, ka lakah zumhkâilo hen nan um chun phundang tla nâwngah kan rekrâwitir na awt.

⁹Sikhawmsele, ka sinah nan hawng kîr nawlh hen thu ka nan pêk na mi tla hâwi hen thil nan ti chun, keimah nan ka sawnhnâk mun ding ka thîm mi mun ah tual dawnghnâk ah rekrâwi hen um rawh menza khawm ule, ka nan kîrpi nawlh na lai, na ti mi kha.

¹⁰“LALPA, hi bang tla hi nangmah to-aw leh mi tla an si. Na thiltikhonâk leh na chaknâk hen ruang na suah na.

¹¹Kei leh na to-aw dang nangmah ṭih leh zahtu tla thlachamnâk zawzawng hi tuah hawng kan ngâi piak rawh. Tusun ni ah hin dingchangnâk hawng ka pêk le, lal lianchem chu ka lakah khuaruattir,” ti hen. Chu liauah chun lal lianchem uain pêktu ka si.