Read Bawm Chin NEHEMIAH 10 Bible Online

NEHEMIAH 10 - Bawm Chin bible

NEHEMIAH 10

¹A masachem hen min rîntu ding mi tla chu: Lâirêltu Hakaliah fapa Nehemiah, chu sangtu chu Zedekiah. Hi bang tla khawm nih an min an rîn:

²Bâwlpu tla: Seraiah, Azariah, Jeremia, Pasur, Amariah, Malkijah, Hatus, Sebaniah, Maluk, Harim, Meremoth, Obadiah, Daniel, Ginethon, Baruk, Meshullam, Abijah, Mijamin, Maaziah, Bilgai, Semaiah.

⁹Levi tla: Azaniah fapa Jeshua, Henadad chi Benui Kadmiel, Sebaniah, Hodiah, Kelita, Pelaiah, Hanan, Mika, Rehob, Hasabiah, Zakur, Serebiah, Sebaniah, Hodiah, Bani, Beninu.

¹⁴Mi zapi ruitu tla: Parosh, Pahath, Moab, Elam, Zatu, Bani, Buni, Azgad, Bebai, Adonijah, Bikvai, Adin, Ater, Hezekiah, Azur, Hodiah, Hasum, Bezai, Harib, Anathoth, Nebai, Mikpiash, Meshullam, Hezir, Mesezabel, Zadok, Jadua, Pelatiah, Hanan, Anaiah, Hoshea, Hananiah, Hasub, Halohesh, Pilha, Sobek, Rehum, Hasabnah, Maaseiah, Ahiah, Hanan, Anan, Maluk, Harim, Baanah.

²⁸Kannih, Israel mi tla, Bâwlpu tla, Levi tla, Biakin vêngtu tla, Biakin tumphung tumtu tla, Biakin rianṭuantu tla, leh Pathian Dân zûl hen kan ram ah phundang um mi le tla lakah kanna thlei mi tla nih kan nupi leh kan fa lungfiang tâwk mi tla hen,

²⁹hawng kan ruitu tla hen hi thutiamnâk lakah thurual hen Pathian nih a to-aw Mosi mang hen Dân hawng kan pêk mi zûl ding hen LALPA kan LALPA nih thu hawng kan pêk mi zawzawng leh a herh phung kan zûl lo hen chu siat chu kan buar chun a mawh chu kan lakah um seh.

³⁰Ramdang minung kan ram ah um mi tla hen umhnâk kan nei lai lo rawh.

³¹Ramdang minung nih fâng mawh zei thil tal Dinhni ah mawh, ni thenhlimh dang ni ah mawh hawng kan zawrh khawmsele, kan châwk ding asi lo. A kum sarihnâk kum ah ram lakah lo kan tuah lai lo, kan lakah anna bat mi tla khawm kan veih lai.

³²Kum siar hen Biakin zareh rangah tangka grammes nga vima kan khawlh hen kan pêk lai.

³³Hi bang tla hi Biakin ah Pathian sawnhnâk rangah kan voh lai; sangtlêp thenhlimh, nisiar sang ap mi, nisiar hen bâwlnâk ah ran tla duah ding mi, Dinhni ah thil ap thenhlimh, Thla Thar Kût leh kût dang tla, thil ap thenhlimh dang, Israel mi tla sual veihnâk ding hen ap leh Biakin rang dingah thil herh tla.

³⁴Kannih, mi zapi tla, bâwlpu tla, Levi tla nih a zei mi phun nih LALPA kan Pathian sinah bâwlnâk ap mi duahnâk ding hen tih ding mi thing pêk ding asi awt ti theihnâk ding hen kum siar hen chamchawhnâk dân ah a herh hâwi hen kan nei lai.

³⁵Kum siar hen kan fâng thar kan ât masachem mi leh kan thingthei rah masachem mi Biakin ah kan put lai.

³⁶Kan lakah fapa tîr âuzawng nih Biakin ah bâwlpu sinah kan put lai le, Dân lakah a herh mi hâwi hen Pathian sinah kan ap lai. Kan chawpê pinu nih a ring masachem mi a chaltuai khawm kan ap lai le, kan dawrâ leh kan kêl lakah mi an fa masachem mi khawm kan ap lai.

³⁷Kumsiar hen fathar ât masachem mi sang leh uain, oliv sariak, theirah chi dang dang tla chu Biakin Bâwlpu sinah kan put lai. Kan khua phâisen ah mi fâng parâ lû pakhat khawlh mi chu Levi sinah kan pêk lai. Kan ram ah fâng kan tawng mi zawzawng parâ lû ah pakhat kan tawng mi khawm.

³⁸Aron thlâk bâwlpu tla, Levi hen munkhat um ding asi, Levi tla nih parâ lû ah pakhat an khawlh mi lakah mi chu Biakin ah mang ding hen a siahnâk mun ah parâ lû ah pakhat an kalpi ding asi.

³⁹Israel tla leh Levi tla nih sang leh uain leh oliv sariak khawlh mi chu a siahnâk mun Biakin khêng leh bêl leh bâwlpu rianṭuannâk mun, Biakin vêngtu leh Biakin ah lasaktu murui umnâk ah an put ding asi. Kan Pathian in chu kan thlawrhthlâu lai loh.