Read Bawm Chin NEHEMIAH 4 Bible Online

NEHEMIAH 4 - Bawm Chin bible

NEHEMIAH 4

¹Sanbalat nih Juda tla nih kulh remh anna dawmh rawh ti a theih rawh chun a thinthawk le, zeikhawm hawng kan siarlo rawh.

²A hâwi murui leh Samari kawrsen murui mâika ah, “Hi Juda mi lawksawng tla nih hin zei ti ding tum hen me thil an ti? Khuapi remh ding hen na maw an tum? Bâwlnâk ap hen ni khat karah dih ding hen na maw an tum? Nâwmtâm salam hen rawh mi lung hen an sak kho awt mazei?” a ti.

³A kiangah Tobiah a dîr mi khawm nih, “Zeitin mi kulh me dirh kho ding hen an awt, kâwlui khawm nih a chimtir rel kho lai,” a ti.

⁴Thla ka cham le, “Pathian, hawng kan siarlo zia hi ngâinik! An hawng kan zauhnawmhnâk chu anmah lû tlûnah tlâktir. An thil-le-rî neih zawzawng mi tla râwktir hep na le, anmah chu ramdang ah sal ah put hen umtir na.

⁵Kan in sak hawng kan kalh ruangah an thilsual ti chu ngaihdam lah le, an thilsual ti philh lah,” ti hen.

⁶Chun, kulh chu kan remh vima le, mi zapi tla chu rianṭuan an tha thawk thlo ruangah kulh chu a sâng lei khingkhuai ding chu kan sangh rawh.

⁷Sanbalat, Tobiah, Arab mi tla, Amon tla leh Asdod mi tla nih Jerusalem chu mavuak tak hen kan remh mi leh kulh a chat mi tla phih asi rawh ti an theih le, thungâi an ro a thawk.

⁸Churawhchun Jerusalem do ding leh nawknâk siam ding hen hawng kal ding anna thluk rawh.

⁹Sikhawmsele, Pathian sinah thla kan cham le, anmah lak thawk hen kan mi tla chu a sûn a zân hen kan vêng na.

¹⁰Juda mi tla nih an la neih chu an sak: “Kan chaklo vima, Chaklo hen thilrit kan phurh, Nâwmtâm lawnh ding thungâi a tam. Tusûn hin kulh zeitin kan siam kho lai?” ti hen.

¹¹Kan mêlma tla nih hawng kan thah ding leh kan rianṭuan bângtir ding an tum mi chu anmah an hawng tleng lân lo chu kan theih lo thlo ding hen an ruat.

¹²Sikhawmsele, kan mêlma tla sinah Juda um mi tla nih zeiliau zawngah hawng kan do mi leh an thiltum tla chu hawng kan simh.

¹³Churawhchun, mi tla chu nâmsâu tla, fei tla, chanhtiang tla ka ap na le, kulh pînleiah dihlo kar chu chunah a chi chi hen um mun ka siam piak na.

¹⁴Mi tla chu ka zauhnâk ah thungâi dî hen ka theih na le, an sinah leh anmah ruitu leh rianṭuantu tla sinah, “Kan mêlma tla chu ṭih na lah u; LALPA rokual zia leh ṭihnungkâi zia theih ule, a ram lakah nan hâwi tla, nan fa tla, nan nupi tla, nan in tla ruangah do u,” ka ti na.

¹⁵Kan mêlma tla nih an thu thlûk leh an thiltum tla chu Pathian nih a neh rawh ti an theih. Churawhchun kan ektê hen kulh remh ding hen kan kal nawlh fâwn.

¹⁶Chu thawk rawh chun a khingkhuai nih rian an ṭuan le, a khing nih râlthuam thuam hen fei leh phaw leh chanhtiang put hen râl an vêng.

¹⁷Hawng kan ruitu tla nih kulh remhtu tla chu chelh ri hen an ṭangpi na. Mi nih kut khiangkhat hen rianṭuan khawmsele, khiangkhat lei hen râlthuam an put;

¹⁸kulh remhtu zawzawng nih an tâi ah nâmsâu pâinâk anna khimh ver. Tâwtawrâwt tumtu chu ka kiangah a um.

¹⁹Mi zapi leh an rianṭuan ruitu tla sinah, “Hi kulh dâi hi a kâu rawh ruangah mun dang dangah a dang chereh hen kan um rawh.

²⁰Tâwtawrâwt hâu nan theih chun keimah leiah hawng a pûm hep u. Kan Pathian nih hawng kan do piak lai,” ti hen ka simh na.

²¹Churawhchun nisiar hen khuadei tîr thawk hen zânlei ârfi langh tiang hen, mi khing nih kulh dâi an remh, mi khing nih fei hen râl vêng hen an dîr.

²²Hi kar vial chu hotu tla chu anmah ṭangpitu tla hen zân ah Jerusalem khua sungah um hep ding hen ka simh na, sûn hâwi hen zân khawmah khuapi chu vêng kho ding hen.

²³Kei leh ka hâwi tla, ka to-aw leh hawng ka vêngtu tla khawm nih kan kawrdawh nipuan zân khawmah kan lît lo, kan kut ah râlthuam chu thlah lo hen kanna put.