Read Bawm Chin NEHEMIAH 5 Bible Online

NEHEMIAH 5 - Bawm Chin bible

NEHEMIAH 5

¹Chu nehnûn chun mi tamtak mipa khawm nunau khawm an hâwi Juda tla lakah chipchiarnâk an nei.

²“Zeimaw mi nih, dâwngsungkhur tamtak kan si le, fâng kan herh,” an ti.

³A dang tla nih, “Kan phâisen tla, grep dûm tla, in tla, pâm-le-mâi ruangah fâng kan khawp tâwk tawng ding hen phâwng ding kan nei,” an ti.

⁴A dang tla nih, “Kan phâisen leh grep dûm siah lal sinah pêk ding hen lâng ding kan duh.

⁵Kannih khawm kan hâwi Juda tla hen phun khat kan si dangâiah. Kannih fa tla khawm anmah fa tla hâwi hen an ṭha bâk lo ma? Kan fa tla chu sal ah kan siam ver na awt rawh. Kan fanu zei mi châng chu sal ah kan zuar ving na rawh. Kan phâisen leh kan grep dûm tla hawng kan lâk piak ving rawh ruangah a ti dân kan thiam lo rawh,” an ti.

⁶Chu an chipchiarnâk tla ka theih rawh chun, ka ro a thawk le, an tlûnah thilti ding ka tum rawh.

⁷Mipi tla lakah, rianṭuantu leh ruitu tla rangah, “Nan unau tla nan nehsawh asi,” ti hen ka châk na. Mi zapi tla thuruat ding hen ka pumh na le,

⁸an sinah, “Hun sâwt tak kan unau ramdang ah mi sinah anna zuar rawh mi kan tlanh na rawh. Tuah nannih chu nan unau tak tla chu nan hâwi Juda sinah nan zuar awt,” ka ti na. Ruitu tla chu a sâng ding an theih lo le, an dâisip.

⁹Churawhchun, kei nih, “Nan thilti dân a dik loh! Pathian nan ṭih hen thil dik nan ti ding asi. Chu tikah kan mêlma Gentel tla chu kanmah hawng kan zauhnawmhtu si ding hen nan pêk na lai loh.

¹⁰Kei leh ka hâwi tla, ka rianṭuantu tla nih zapi minung tla chu fâng leh tangka kan pûktir na. Hawng kan sam ding mi tla kha tuah samlo ding hen kan ruat lai.

¹¹Tangka leh fâng mawh, oliv sariak tla samlo ding hen anna bat mi zawzawng râwk ver u. An phâisen tla, grep dûm tla, oliv keuh tla leh in tla tuah pêk hen khirh sawm na u!” ka ti na.

¹²Ruitu tla nih an sâng le, “Na sim mi hâwitê hen kan ti lai. thil-le-rî tla kan khirh lai le, anna bat mi kan chawh na lai lo rawh,” an ti. Bâwlpu tla chu in sungah ka kawh na le, ruitu tla chu thutiamnâk an mâika ah ka neitir na.

¹³Puan ka menh mi chu ka sût le, ka thing, “Âuzawng nan thutiam zûllotu chu Pathian nih hi hâwi hen thing seh. Pathian nih na in leh na neih zawzawng lâk hep sele, zeikhawm neilo hen an siah seh,” ti hen ka sim. Chunah um mi mikip tla nih, “Amen,” an ti le, LALPA an sawr. Churawhchun ruitu tla nih thu anna tiam rawh.

¹⁴Kum leinih kar Juda ram lâirêltu ka si liauah Artakzerzes a lal kum thawk hen kum sâwmthum leh kum nih asi tiang hen lâirêltu nih anna ting ding mi tî-le-râwl kei khawm nih ka ei lo, ka unau tla khawm nih an ei lo.

¹⁵Keimah lânah lâirêltu zawzawng tla chu mipi tla rangah thilrit tak an si le, ni khat eibâr leh uain rangah tangka sâwmli an hauh. An to-aw men nih zapi minung an nehsawh na. ‘Kei chu Pathian ka ṭih ruangah dang tak hen thil ka ti.

¹⁶Ka ti kho rirî hen vâm tla ka remh le, thil-le-rî zeikhawm ka hauh lo. Ka sinah rian an hawng ka ṭuanpitu tla nih kan remh ding mi lakah hawng ka bawp ver.

¹⁷Kan kiangkam ah phun an hawng mi siarlo hen, buh khêng ka dûmpi na mi vial Juda mi zâ leh sâwmnga leh an hotu tla zeiliau zawngah buh ka pêk na.

¹⁸Nisiar hen chawchal pakhat leh dawrâ ṭha chem mi paruk leh âr tamtak ka timhtuah piak na le, ni râ dan ah uain a thar mi ka pêk vima na. Sikhawmsele, zapi minung tla nih thilrit tak an phurh nget rih ti ka theih le, churuang chun lâirêltu tingvo lawh rerêng ka êng na lo.

¹⁹Pathian, hi bang murui mipi rangah thil ka ti mi zawzawng hi theihkumza ding hen kan ngiar.