Read Bawm Chin NEHEMIAH 6 Bible Online

NEHEMIAH 6 - Bawm Chin bible

NEHEMIAH 6

¹Sanbalat, Tobiah, Gesem leh kan mêlma zawzawng tla nih kulh chu a chimnâk tla zawzawng khawm remh asi rawh ti an theih rawh; sikhawmsele, lûtnâk kawtkâ lam chu siam asi lo rih.

²Churawhchun Sanbalat leh Gesem nih Ono phâi ah mi khua pakhat ah anmah tla hen a tawng ding hen thu an ka chah. Chu chu keimah râwk ding an duh ruangah an ka perpetnâk asi.

³An sinah thu sim ding hen mifial tla ka fial, “Rian herh tak ka ṭuan le, khanah ka hawng kho lo, nanmah hen a tawng ding hen ka rianṭuan ka bângtâk kho lo,” ti hen.

⁴Chu hâwi karo hen vei li an ka chah le, kei khawm nih a mahmun kumza hen sângnâk ka pêk na.

⁵Churawhchun Sanbalat nih a to-aw rangah thuchah a vei nganâk sim ding hen a hawng fial le, chu chu lasuikuat chârlo mi asi.

⁶Chu lasuikuat lakah chun: “Gesem nih nan kiangkam thawk hen thu ka theihnâk ah nang leh Juda tla nih hel nan tum ruangah kulh an siam mi asi ti hen hawng ka simh. Nangmah khawm lal ah um na tum le,

⁷khuavâng tla na siam na le, Jerusalem ah Juda lal ka si ti hen na phuangtir na ti hen a sim. Lal nih hi thu hi a theih awt nget, churuangah chu thu chu ruat ding hen nang leh kei a tawng ding hen ka nan simh asi,” ti hen.

⁸A sinah sângnâk ka kuat le: “Na thusim chu pakhat khawm a dik mi a um lo, nangmah nih na siam salam mi ver asi,” ti hen.

⁹Kan rianṭuan chu bângtir ding hen hawng kan ṭhih mi asi. Pathian sinah, “Sikhawmsele, Pathian tuhin chak tak hen hawng ka umtir rawh!” ti hen thla ka cham.

¹⁰Chu liau chun Delaiah fapa Semaiah, Mehetabel tupa, a in suaktâk kholo mi pa sinah ka va kal. Anih nih ka sinah, “Nang leh kei chu Biakin Mun Thenhlimh ah a thup hen in a renh khumh ding kan si lai, nangmah thah ding hen an hawng awt ruangah. Zei zân tal ah tuko ah nangmah thah ding hen an hawng kho lai,” a ti.

¹¹“Kei chu tek hen thup salam mi zât ka si loh. Biakin ah ka nungnâk him ding ruangah a thup ding hen ma na ka ruat? Ka ti awt lo zia chu a,” ka ti piak.

¹²Ka ruat ver rawh chun Semaiah sinah Pathian nih thu a sim mi asi lai loh, Tobiah leh Sanbalat nih hi hâwi thusim ding hen an nawh si ding hen ka ruat.

¹³Keimah sualtir ding hen hawng ka lauh ding hen an mang le, keimah min siattir ding leh nâutir ding an hawng ka duh ruangah asi.

¹⁴Pathian sinah thla ka cham le, “Pathian, Tobiah leh Sanbalat thilti chu theihkumza le, rêp na. Nunau Nodiah leh khuavâng dang hawng ka ṭhih tumtu tla khawm theihkumza na,” ti hen.

¹⁵Rianṭuan chu ni sâwmnga leh ni nih nûnah Elul thla, ni kul leh ni nga nâk ah kulh dâi chu a ektê hen lîm asi rawh.

¹⁶Kan kiangah mi phun mêlma zawzawng nih kan dih mi an theih rawh chun, Pathian ṭangpi hen rianṭuan chu lîm asi rawh ti mikip nih an theih le, an mâi a mûi rawh.

¹⁷Chubang kar zawzawng chu Juda ruitu leh Tobiah chu lasui hen karo anna kuat.

¹⁸Asan chu Tobiah tupa Sekaniah, Arah fapa chu Juda mi asi le, churuangah Juda ram ah mi tamtak chu Tobiah leiah anna bêk. Chu lo khawm, Tobiah fapa Jehohanan nih Berekiah fapa Meshullam fanu a umpi ruangah asi.

¹⁹Ka mâika ah Tobiah thil ṭha ti zawzawng an sim le, ka thusim zawzawng khawm amah sinah an sim bâk. Keimah ṭhih ding tum hen lasui hawng ka kuat kumza.