Read Bawm Chin ESTHER 1 Bible Online

ESTHER 1 - Bawm Chin bible

ESTHER 1

¹Persia lalchem Zerzes nih a khuapi Susa thawk hen ram 127 lakah lâi a rêl le, India ram thawk hen Sudan ram tiang a uap hep.

³A lal kum thumnâk ah a rianṭuantu leh ram zauhkhenhtu rangah puai a pêk na. Persia leh Media kawrsen tla khawm an um, ram lâirêltu leh milian tla khawm an um.

⁴Thla ruk sung chu a lal in ah a neih a siah leh a rokualnâk leh a lalnâk a zauhtir na.

⁵Chu nûn chun lal nih Susa khuapi ah um mi zawzawng minei leh mipâm tla rangah bang ver hen puai a pêk na. A lal in kulh sungah zarhkar khat puai ei anna tâwk.

⁶A inkulh chu puan dumpâwl, ango mi hen ṭialh puanzâr tla chu, larual senduk lungvâr tung lakah mi tangka bing lakah an sih. Dinhnâk ngûn leh tangka hen siam mi chu kulh sungah an siah, chu chu lungvâr feldspar sen, lung chêu, turquose dumpâwl tla hen phah asi.

⁷Dinnâk hâi tla chu ngûn asi, hâi panih chu anna dang vevê asi. Uain hâng khawm zât dang dang asi, uain chu lal nih a duh tâwk hen a din.

⁸A din mi lakah a zât a um lêm lo. Lal nih to-aw tla chu mikip puai eitu tla rangah an duh zat zawng pêk na ding hen thu a pêk na.

⁹Chu liau chun lalnu Vasti nih lal in sungah nunau rangah puai a pêk na bâk.

¹⁰Lal nih puai a pêk na mi ni sarihnâk ah chun lal chu nuam ti tak hen uain a din. A bîk hen amah to-aw mi tilkhei pasarih Mehuman, Biztha, Harbona, Biktha, Abaktha, Zethar leh Karkas a kawh na.

¹¹Lalnu Vasti a lallukhuh khuh bû hen a sinah kalpi ding hen thu a pêk na. Lalnu Vasti chu mi mêlṭha tak asi, churuangah lal nih chun a rianṭuantu tla leh a mi sâwm zawzawng zauhtir na a duh.

¹²To-aw tla nih lalnu Vasti chu lal thupêk hâwi hen an simh le, a kal duh loh, churuangah lal chu thungâi hen a rothawk.

¹³Lal nih krai a khâinâk thilti ding dân theihtu tla sinah an ngaihdân deih chu lal ti dân asi.

¹⁴Krai a khâi chem na mi tla chu Karsena, Sethar, Admatha, Tarsis, Meres, Marsena, leh Memukan, Persia leh Media ram ah rianṭuantu pasarih, lalram, sungah rianṭuannâk mun sângchem luahtu tla an si.

¹⁵Chu minung tla sinah lal nih, “Kei, Zerzes nih lalnu Vasti keimah thupêk hen ka to-aw tla ka fial na le, a êl thlo! A tlûnah thilti ding hen dân lakah zei hâwi a um?” ti hen a deih na.

¹⁶Churawhchun Memukan nih lal leh a rianṭuantu tla sinah thu a sim, “Lalnu Vasti nih lal cho a siarlo mi asi lo.

¹⁷Lalnu thilti dân a ram sungah nunau nih an theih chun an pasal leh zeikhawm an siar na ding asi lo, lalnu Vasti khawm nih lalchem Zerzes nih a kawh liauah a êl khateh,” an ti lai.

¹⁸Persia leh Media lal rianṭuantu nupi tla khawm nih lalnu umdân chu an theih lai le, hi puai lîm lân khawmah an pasal tla rangah an simh ver kho na lai. Munkip ah mi nunau tla nih an pasal zahnâk an nei lai lo le, pasal a chang mi tla chu an nupi tlûnah an ro a thawk lai rawh.

¹⁹Lal nih a duhzia asi chun Vasti chu lal mâika ah hawng a langh lo rawh ding hen thu suah. Persia leh Media ram dân bu ah thupêk le, zeiliau khawmah lêt lo rawh ding hen. Churawhchun nunau dang a ṭha dauh mi a lalnu sinâk mun ah siah.

²⁰Churawhchun na thupêk tla ram pumpi an theih tikah chun nunau kip nih an pasal tla chu a pâm mi khawm a nei mi khawm nih an zah lai rawh.

²¹Chu ngaihdân chu lal leh a rianṭuantu tla nih thungâi an duhzia le, lal nih Memukan nih a sim mi hâwi hen a ti rawh.

²²Lalram mun kipah thuchah chu lasuirîn anmah hawlh chiau hen a kuat na le, pasal chu insungkhur ah sîntirtu leh thuneihtu chem asi ding asi ti hen thu a sim.