Read Bawm Chin ESTHER 3 Bible Online

ESTHER 3 - Bawm Chin bible

ESTHER 3

¹A nehnûn chun lalchem Zerzes nih minung pakhat Haman chu mun sângah lâirêltu lian sinâk a pêk. Haman chu Agag thlâk Hammedatha fapa asi.

²Haman chu an zah ti theihnâk dingah siksidîr hen amah chu mâimûk ding hen a rianṭuantu zawzawng chu thu a pêk na. Mordekai cho lo chu midang zawng nih chun an ti ver.

³Lal rianṭuantu zawzawng nih chun zeitin lal thupêk na ngâi duhlo zia ti hen an deih.

⁴Nisiar hen an simh le, sikhawmsele a ngâi piak duh rêng na lo, anih nih chun, “Kei chu Juda mi ka si, Haman rangah ka mâimûk ding asi lo,” a ti na. Churawhchun chu thu chu Haman rangah an simh le, Mordekai chu a sâithiam lo rawh.

⁵Mordekai nih Haman chu a mâimûk duh loh ti a theih rawh chun a thin a thawk le,

⁶Mordekai chu Juda mi ti a theih rawh chun, Mordekai lâwng rêp ding hen tâwk a ti lo. Persia ram ah Juda um mi zawzawng thah hep na ding a tum.

⁷Lalchem Zerzes lâirêl kum leinihnâk thla khatnâk Nisan thla ah (“Purim”) an ti mi chamchawhnâk a thiltum zawh ding hen a ni leh a thla dik theih khonâk ding a siam. Thla leinihnâk Adar thla ni leithumnâk ah ti ding hen ruat asi rawh.

⁸Churawhchun Haman nih lal sinah, “Na ram sung zawzawng ah phun pakhat rek thu hen an um mi an um. Midang ti mi hen banglo tak mi dân an nei. Chu lâwng khawm silo hen ram pumpi dân an zûl duh loh, chubang tla umdân chu na sâithiam kâng asi lai loh.

⁹Na duhzia asi chun, nangmah lal nih thah na ding hen thu suah. Chu hâwi na ti mi asi chun, ram ṭhatnâk ding hen lal sum kilnâk ah tangka nuaithum leh sîngli ngâk a tam siah ding ka tîm,” a ti.

¹⁰Churawhchun lal nih chun a thu suahnâk lakah a pizung chu a lâk le, a deh. Agag thlâk Hamedatha fapa Haman Juda mêlma sinah a pêk.

¹¹Lal nih chun a sinah, “Anmah leh an tangka chu na tâ an si; na duhzia zawng hen ti na,” a ti.

¹²Churawhchun, a thla khatnâk ni leithum ni ah chun Haman nih lal lasuirîntu chu a kawh le, thu suah ding mi chu ram pumpi ah hawlh kipah leh hen rîn ding hen thu a pêk le, chu chu lâirêltu tla ram lakah thuneitu tla, rianṭuantu zawzawng sinah kuat ding hen. Lalchem Zerzes thu hen suah asi le, a pizung hen deh ver asi.

¹³Lasui ṭhentu tla nih ram pumpi sungah ram ṭhen tla kipah an kalpi. Chu thusuah lakah mi thu chu Adar thla ni leithum ni khat lakah Juda mi zawzawng upa ngâksia, nunau leh an fa tla thah hep na ding asi. Khuaruatnâk neilo hen thah na hen an thilneih zawzawng khawm lâk hep ding asi.

¹⁴Chu thu phuang ding hen rîn mi tla chu ram then kipah zatlâng sinah theihtir ding asi, a ni a hawng tlung tikah mikip anna râlring khonâk ding hen.

¹⁵Lal thupêk hen chu thu chu Susa khuapi ah siam asi, lasui ṭhentu tla nih ram ṭhen kipah an kalpi rawh. Susa khuapi a lawksawng liau chun lal leh Haman chu din leh ei hen an um.