Read Bawm Chin ESTHER 4 Bible Online

ESTHER 4 - Bawm Chin bible

ESTHER 4

¹Mordekai nih thil zeizawng an ti ver rawh mi a theih rawh chun a lawksawng tukah a nipuan a thlêk. Salâpuan â aih le, a lû ah vachâm a phulh le, ngaihsia tak hen a ṭap bû hen khuapi a ṭawl le,

²lal in tualmâi tleng khet hen a va kal. Salâpuan aih hen in sungah âukhawm siang asi lo ruangah in sung chun a lût lo.

³Ram ṭhen zawzawng ah lal thusuah theihnâk mun zawng chu Juda tla lakah hâu fâk tak suah hen ṭapnâk a tlung. Buh an ngei le, an ṭap le, thungâi an tuar rawh, mi tamtak salâpuan aih hen vachâm nâwngah an rîl.

⁴Esther chu a to-aw nungâk leh mi tilkhei tla nih Mordekai umdân chu an simh le, thungâi a lawksawng. Mordekai chu salâpuan aih lo hen nipuan aih ding a pêk le, sikhawmsele a duh lo.

⁵Churawhchun Esther nih amah lal in mi mi tilkhei Esther to-aw rangah a ruat mi Hathak a kawh le, Mordekai sinah kal hen zei thil me a hawng tlung, zei zia me si ti va deih ding hen a fial.

⁶Hathak chu khuapi sungah lal in tualmâi mi Mordekai sinah a va kal rawh.

⁷Mordekai nih thil zeizawng a hawng um mi tla leh Juda mi thah hep an si chun Haman nih lal tangka siahnâk mun ah tangka siah ding hen thu a tiamh mi tla a simh.

⁸Juda tla rangah thah ding hen Susa ah thu an suah mi lasui tla chu Hathak rangah a pêk. Mordekai nih Hathak sinah chu lasui chu Esther sinah pêk hen thil umdân zawzawng simh hen Juda tla tlûnah lal nih khuaruat ding hen lal sinah kal hen ngiar ding hen a chah.

⁹Chu hâwi hen Hathak nih a ti le,

¹⁰Esther nih chun Mordekai sinah va tlunh nawlh ding hen Hathak rangah thu a chah:

¹¹“Âuzawng mipa mawh nunau mawh, lal kawhnâk umlo hen kulh sungah lûttu chu thah ding asi, chu dân chu ram ṭhen kipah lal krai pêktu tla nih zapi tla sinah theihtir mi thu asi, chu sungah lût kho ding hen dân pakhat cho a um; lal nih a ngûn fung a leknawh mi minung cho zuah an si. Sikhawmsele lal nih hawng ka kawhnâk hen thla khat cho asi rih,” a ti.

¹²Mordekai nih Esther thuchah a theih rawh chun,

¹³hi hâwi hen râlringnâk thu a chah; “Lal in ah um mi na si ruangah Juda tla zawzawng an thi ver chun, nang khawm âwl ding hen a ruat lah.

¹⁴Tu na umdân hen, dâisip na um chun, vân lei thawk hen Juda tla rangah ṭangpinâk a hawng um lai le, him hen an um lai le, sikhawmsele, nang leh na pa dâwngsungkhur chu a dawnghnâk asi lai rawh, lalnu na sinâk hi tuhun rangah na si mi khawm asi kho,” a ti.

¹⁵Esther nih Mordekai sinah a sângnâk thu a chah:

¹⁶Juda zawzawng Susa ah pumh ver na le, ka rangah buh ngei hen thlacham u. Ni thum leh zân thum chu buh ei leh tî dinlo hen um u. Ka to-aw nungâk leh kei khawm nih chu hâwi kan ti bâk lai. Chu tikah dân si lah khawmsele lal sinah ka va kal lai, churuangah thi ding asi âwk le, ka thi ko lai,” a ti.

¹⁷Churawhchun Mordekai chu a kal le, Esther nih a simh mi hâwi hen zeizawng a ti rawh.