Read Bawm Chin ESTHER 5 Bible Online

ESTHER 5 - Bawm Chin bible

ESTHER 5

¹A buh ngeinâk a ni thum ni ah Esther nih a lal thuam hen â thuam le, a va kal le, lal tonâk kardang ah mi laltophah zâwn thap hen lal in kulh sungah a dîr. Lal chu tualmâi lei hawi hen a sungah laltophah lakah a to.

²Lal nih lalnu Esther lênglei ah a dîr mi a muh le, siherhnâk thinlung a nei le, a ngûn fung chu amah leiah a lek. Churawhchun a va kâi le, fung pâr a va tleih.

³Lal nih a sinah, “Lalnu Esther, zei me? Zei na duh? Ka ram khingkhuai khawm na ting kho lai,” a ti.

⁴Esther nih a sâng le, “Lal nih rem na ti mi asi chun, na rangah tuzân ah puai ka timhtuah mi lakah hin, Haman hen hawng ule, ka nan duh na,” a ti.

⁵Churawhchun lal nih Haman chu mawhsareh hen hawng ding hen Esther puai ei ding hen a chah rawh. Churawhchun lal leh Haman nih Esther puai ei ding hen an kal rawh.

⁶Uain an din thluh rawh chun lal nih Esther rangah thu a deih, “Zei na duh hawng ka simh le, na ting ko lai, ka ram khingkhuai men na ka ngiar chun kan pêk lai,” a ti.

⁷Esther nih a sâng le,

⁸“Lal nih ka ngiarnâk hi na ka ruat piak kho ding asi chun, nang leh Haman chu thâi ah puai dang na rangah ka timhtuah ding mi lakah hawng nawlh ule, ka nan duh na. Chu tikah ka duh mi chu ka nan simh na lai,” a ti.

⁹Haman chu puai einâk thawk hen a lâwi le, thungâi a lâwm hen a lungâwi, sikhawmsele lal in tualmâi ah a va kal liauah Mordekai nih a zah ti theihnâk dingah thawk khawm a thawk piak duh lo ruangah Haman chu thungâi a thinrun.

¹⁰Sikhawmsele, in leiah sûm rarâm bû hen a lâwi, churawhchun a hâwi tla a in leiah a sâwm na le, a nupi Zeres chu a hâwi le bawp ding hen a sâwm na.

¹¹A neih leh a siah, fapa tamtak a nei mi tla, lal nih dîrmun sâng tak luahtu ah a siam mi tla, rianṭuantu zawzawng lakah a sâng chem asi nâk tla hen a hâwi leh sinah â sawr.

¹²Haman chu â sawr vima le, “Lalnu Esther nih puai einâk ah kei leh lal cho hawng kan sâwm le, thâi ah mi lak khawm hawng kan sâwm awt fâwn.

¹³Lal tualmâi ah to mi Mordekai ka muh kar vial chu, chubang tla chu kei rangah lâwmnâk zeikhawm asi lo,” a ti.

¹⁴A hâwi leh a nupi khawm nih, “Zeirangah thlâinâk feet 75 sâng hen na tuah lo? Thâizîng ah Mordekai thlâi ding na deih lai le, chu tikah puai ei ding nuam tak hen na kal ko lai,” an ti. Haman nih krai ṭha tak si hen a theih, churuangah thlâinâk a siam rawh.