Read Bawm Chin ESTHER 6 Bible Online

ESTHER 6 - Bawm Chin bible

ESTHER 6

¹Chu zân chun lal chu a it kho lo le, ram lakah rianṭuan singsiahnâk bu a sinah put hen rêl ding hen thu a pêk na.

²A khing an rêl liauah lal kardang vêngtu mi tilkhei panih Bikthan leh Teres lal thah ding anna thluk mi thu Mordekai nih a phuang mi a hawng lang.

³Lal nih, “Chu thu ruangah Mordekai chu zei hâwi hen kan chawnglawmh, zei hâwi hen lâwmman kan pêk?” ti hen a deih na. A to-aw tla nih, “A rangah zeikhawm ti piak asi lo,” an ti.

⁴Lal nih, “Lal in ah ka rianṭuantu âutal an um ma?” ti hen a deih na. Chu liau chir chun Haman chu kulh sungah a hawng lût, Mordekai thlâinâk chu lîm asi rawh ti lal simh ding hen a hawng mi asi.

⁵Churawhchun to-aw tla nih an sâng le, “Hinah Haman chu nangmah muh duh hen an ngâk ko,” an ti. Lal nih, “Hawng lûttir u,” a ti.

⁶Churawhchun Haman chu a hawng lût le, a sinah, “Minung âumawh zahkâi tak hen siam ding ka duh, chu minung rangah chun zei hâwi ti sele a ṭha lai?” ti hen a deih. Haman nih a thinlung hen, “Lal nih chu hâwi tluk hen zahkâi hen siam ding a duh mi chu âu me si lai, keimah ka si ngelchel lai,” ti a ruat.

⁷Churawhchun lal chu a sâng le, “Chu minung rang chun lal thuam lâk le, nangmah tak nih thuamh, nangmah lal rang ngelchel tonâk dingah thuamh le,

⁹churawhchun na mi lakah a lianchem mi chu thuamtir le, rang tlûnah chuanh hen khuapi ṭawlpi seh. An kal liauah chu ruitu milian nih chun, “Zauh u, lal nih zahkâi tak hen siam ding a duh mi chu hi hâwi mi asi!” a ti.

¹⁰Churawhchun lal nih Haman sinah, “Mawhsareh hen lal thuam leh rang va lâk le, Juda mi Mordekai rangah chun zahkâi tak hen siamnâk chu va pêk, nangmah nih na sim mi hâwitê hen amah tlûnah va ti rawh, lal in tualmâi ah to hen na va muh lai,” a ti.

¹¹Churawhchun Haman nih lal thuam chu a lâk le, Mordekai chu lal thuam hen a thuamh. Mordekai chu rang tlûnah a to le, Haman chu mâi leiah a kal le, khuapi sung an ṭawlpi le, an ṭawlpi liauah mi zapi sinah: “Lal nih zahkâi tak hen siam ding a duh mi minung chu, zauhnik u, hi hâwi mi asi!” ti hen a phuang vima.

¹²Mordekai chu lal in tualmâi leiah a kîr liau chun, Haman chu a mêl ningzakkâi tak put bû hen in leiah a kîr rawh.

¹³A nupi leh a hâwi tla zawzawng chu a lakah thil a hawng tlung mi chu a simh na. Churawhchun a nupi leh a hâwi mifing tla nih a sinah, “Mordekai ruangah na vei mi rawh. Anih chu Juda mi asi, na neh kho ding asi lo, an neh ding nget,” an ti.

¹⁴Chu thu an ruat liau chir chun lal in ah mi mi tilkhei chu Esther puai ah Haman kalpi ding hen a hawng tleng sawm.