Read Bawm Chin ESTHER 7 Bible Online

ESTHER 7 - Bawm Chin bible

ESTHER 7

¹Churawhchun lal leh Haman chu Esther sinah puai ei ding hen a veinihnâk an va kal.

²Uain an din thluh rawh chun lal nih Esther sinah, “Lalnu Esther, tuhin zei na duh? Hawng ka simh le, ka ram khingkhuai tiang khawm kan pêk lai,” a ti.

³Lalnu Esther nih a sâng le, “Lal nih, nâu tak hen ka nan ngiar mi na siang asi chun, kei leh ka mi tla nung khonâk ding asi.

⁴Kei leh ka mi tla chu thah ding hen zuar asi rawh. Sal ah zuar mi ngâk hen a fâk dauh rawh, chu thu ruangah nangmah nawktir lo hen dâisip hen um ka tum le, sikhawmsele veih dep ding leh mih dep ding kan si ruangah dâisip hen um kho asi lo!” a ti.

⁵Churawhchun lalchem Zerzes nih Esther sinah, “Chu hâwi tluk thilti ngamhtu chu âu me si? Chu minung chu zeiah a um?” a ti.

⁶Esther nih a sâng le, “Kan mêlma, hawng kan nehsawhtu chu hi misual Haman hi asi!” a ti. Haman nih lal leh lalnu chu ṭih bû hen a zauh na rawh.

⁷Lal chu a thinthawk bû hen a thawk le, inkardang ah mi chu a suak le, lênglei lal dûm ah a kal. Haman nih chun lal nih hawng ka rêp ding nget rawh ti theih hen, lal a suak nûnah lalnu Esther rangah a nungnâk zuah ding hen a ngiar.

⁸Chu dûm ah mi lal chu in sungah a hawng lût rawh chun, Haman chu Esther tonâk kiangah khuaruatnâk deih ding hen a rîl thlo. Lal nih chu chu a muh rawh chun, “Kha minung kha, ka lal in ah lalnu tleihrêm ding na maw a tum?” a ti. Lal nih chu thu a sim kâ hen, mi tilkhei nih Haman lû chu a khuh sawm.

⁹Churawhchun minung pakhat a min Harbonah an ti mi nih, “Nangmah lal rangah a nan humtu Mordekai thlâinâk ding hen a in ah Haman nih a timhtuah zet rawh, a sâng lei chu feet 75 tluk asi!” a ti. Lal nih, “Chu lakah chun Haman thlâi u!” ti hen thu a pêk na.

¹⁰Churawhchun Haman chu Mordekai thlâinâk a timhtuah mi lakah amah chu an thlâi rawh. Churawhchun lal thinthawknâk chu a reh rawh.