Read Bawm Chin ESTHER 8 Bible Online

ESTHER 8 - Bawm Chin bible

ESTHER 8

¹Chu ni ah chun lalchem Zerzes nih lalnu Esther rangah Haman Juda tla mêlma thilneih zawzawng chu a pêk. Esther nih Mordekai chu amah taksa tlâi asi zia chu lal rangah a simh. Chu thawk hen Mordekai chu lal mâika ah va lût ding hen siang asi rawh.

²Lal nih amah pizung singsiahnâk (Haman sinah a pêk mi chu a lâk le,) Mordekai sinah a pêk. Esther nih Mordekai chu Haman thilneih zawzawng hotu ah a siam.

³Churawhchun Esther chu lal kebul ah a rîl thlo le, thu a simh le, a ṭap. Agag thlâk Haman nih phiarnâk ṭhalo tak Juda tlûnah a siam mi chu veih ding hen a ngiar.

⁴Lal nih ngûn fung chu amah leiah a hawng lek le, churawhchun a dîr le, a sinah,

⁵“Lal nih na duh kâng asi hen, hum ding na hawng ka duh hen thudik ah na ruat chun, zângfahtê hen Haman, Hamedatha fapa Agag thlâk ah mi nih ram pumpi mi Juda tla veih na ding hen thu a suah mi lakah kan himnâk ding hen thu na suah ding hen ka nan ngiar.

⁶Ka mi tla tlûnah siatnâk a hawng tlung ding mi leh keimah taksa tlâi tla thah ding chu zeitin ka tuar kho lai?” a ti.

⁷Lalchem Zerzes nih lalnu Esther leh Mordekai sinah, “Zauh u me, Juda tla a phiar na ruangah Haman ka thlâi mi leh Esther rangah a thilneih zawzawng ka pêk mi hi.

⁸Sikhawmsele lal min hen lal singsiahnâk hen deh mi thusuah chu râwk nawlh kho asi loh, zei hâwi zawng Juda tla sinah lasuikuat nan rîn kho, chu chu ka min rîn hen lal singsiahnâk nan deh kho,” a ti.

⁹Chu thu chu a thla thumnâk Sivan thla, ni kul leh ni thum ni ah ruat mi asi. Mordekai nih lal lasuirîntu a kawh le, thupêknâk lasuikuat chu Juda mi tla leh lâirêltu tla leh rianṭuantu tla ram ṭhen zâ leh kul leh pasarih lakah mi India thawk hen Sudan tiang hen a pêk na. Chu lasuikuat tla chu ram ṭhen kipah anmah hawlh chiau hen rîn asi le, Juda tla lakah anmah Juda hawlh hen leh a dân hâwitê hen rîn asi.

¹⁰Mordekai nih chun lal min hen lasuikuat rîn tla chu a pumh le, lal singsiahnâk a deh vima le, lal in thawk hen lasuikuat ṭhentu chu an pêk le, rang a chak chem mi tlûnah anna chuan rawh.

¹¹Chu lasuikuat tla lakah chun Juda tla chu anmah khuapi chiauah a vêngtu murui siam ding hen lal nih siang asi ti thu â rîn. Zei phun leh zei ram mi khawm nih riam leh nâm hen an do na chun, annih khawm nih do na bâk hen an nupi leh an fa tla tiang khawm veih dep kho an si, an dâwngsung pakhat khawm âk lo hen an thah na mi chu an neih khawm anna ting kho.

¹²Chu thusuah chu Persia ram pumpi ah Juda tla thah hep ding hen an ruat mi ni, thla leinihnâk Adar thla ni leithum ni asi.

¹³Chu thuphuang chu dân hâwi hen ram then kipah phuang asi le, chu mi ni a hawng tlung tikah Juda mi tla chu an mêlma lakah lehrûl sam ding hen anna timhtuah khonâk ding hen.

¹⁴Lal thupêk hen lal rang tlûnah totu tla nih chun a chak kho rirî hen an rang chu an tektir. Chu thusuah chu Susa khuapi khawmah phuang asi.

¹⁵Mordekai chu lal thuam, a pâwl mi leh a ngo mi thuam hen, kawrfual senduk, ngûn lukhuh rokual tak khuh bû hen lal in thawk hen a suak rawh. Churawhchun Susa khuapi chu lawmhnâk leh chawnglawmhnâk hâu hen a tlirhkhâwng.

¹⁶Juda tla chu anna lâwm hen an ngan a dam rawh, nehtu an si hen an lâwptlo.

¹⁷Lal thusuah a tlengnâk ram ṭhen kipah Juda tla nih lâwmnâk puai an tuah le, thungâi an lâwptlo. Chu hâwi a hawng si ruangah mi tamtak anmah ṭih ruangah Juda phun ah anna siam.