Read Bawm Chin ESTHER 9 Bible Online

ESTHER 9 - Bawm Chin bible

ESTHER 9

¹Lal thupêk tuar ding mi Juda tla nih an thuneihnâk tangah siah ding an lungum mi ni Adar thla ni leithum ni chu a hawng tlung rawh.

²Sikhawmsele Juda tla neh na ding hen anna ruat mi lakah ram pumpi khuapi kipah Juda um mi tla chu anmah thah tumtu mêlma tla do ding hen murui anna siam.

³Chu thu lakah chun Mordekai an ṭih ruangah ram ṭhen kipah mi rianṭuantu, ram lâirêltu, ram zauhkhenhtu, lal ruangrûl ah um mi tla nih Juda tla an ṭangpi na.

⁴Ram pumpi mi nih Mordekai chu lal in ah mi thiltikho tak leh thuneihnâk sâng tak neitu asi ti an theih hep.

⁵Churuangah Juda tla nih an mêlma tlûnah an duh duh hen an ti kho na asi, nâmsâu hen an do na le, an thah na.

⁶Susa khuapi lak ko ah Juda mi tla nih mi zanga an thah na.

⁷Chu lak chun Juda mêlma Hamedatha fapa Haman fapa parâ thah sih an si: Parsandatha, Dalphon, Aspatha, Poratha, Adalia, Aridatha, Parmasta, Arisai, Aridai leh Vaizatha. Sikhawmsele râllâk sum lam chu lâk hen a um lo.

¹¹Chu ni ah chun Susa khuapi ah an thah mi minung zat chu lal sinah an sim.

¹²Churawhchun lal nih lalnu Esther sinah, “Susa khuapi lakah ko Juda tla nih minung zanga, Haman fapa tla parâ an thah sih, ram ṭhen tla lakah zei vial dek an thah na! Tuah zei na duh rih? Na tawng kho lai, a dang zei na duh rih, hawng ka simh na tawng kho lai,” a ti.

¹³Esther nih a sâng le, “Lal nih rem na ti mi asi chun, tusûn ah an thah na mi hâwi hen thâi khawm ah thah nawlh na sele, Haman fapa parâ khawm chu thlâi na sele,” a ti.

¹⁴Chu hâwi ti ding hen lal nih rem a ti piak le, Susa ah chu thu chu an phuang le, Haman fapa parâ ruak chu zapi mitmuh hen an thlâi.

¹⁵Susa mi Juda tla nih Adar thla a ni leili thla ah a dang mi zathum khuapi ah an thah nawlh. Sikhawmsele chu liau khawm râllâk sum chu an lâk lo.

¹⁶Ram ṭhen lakah um mi Juda tla khawm nih anmah vêngnâk ding hen murui an siam bâk. Anmah huatu tla lakah him ding hen sîng sarih leh sângnga an thah na. Sikhawmsele râllâk sum chu an lâk lo.

¹⁷Chu chu Adar thla ni leithum ni ah an thah mi asi. A thâituan a ni leilinâk ah lam chun thahnâk a um lo rawh le, lâwmnâk puai tuahnâk ni ah an mang.

¹⁸Susa mi Juda tla nih chun an mêlma tla ni leithum leh ni leili an thahnâk thawk hen chun ni leinga ni ah chun lâwmnâk ni ah an mang le, anna dîn.

¹⁹Churuangah Juda tla khua tênâu ah um mi khawm nih ni leili Adar thla chu lâwmnâk ni ah mang hen puai an tuah le, thilthawt pêk tla anna pêk tawnh.

²⁰Mordekai nih hi hâwi thurîn hi, Juda tla lam nâi ah mi leh lam lât mi tla, Persia ram sungah mi zawzawng a kuat na.

²¹Adar thla ni leili ni leh leinga ni chu kum siar lawmhnâk ni ah mang ding asi ti hen a simh na.

²²Hi ni hi Juda tla an mêlma lakah mi ruang an suak ni asi le, chu thla ah chun an ngaihsiatnâk leh an lawksawngnâk chu lâwmnâk leh lâwptlonâk ah a hawng a chang ruangah chu ni chu puai einâk leh a murui hen thilthawt a pêk tawnh hen, mipâm tla rangah thilthawt pêk tla pêk na ding hen a simh na.

²³Churawhchun Mordekai thusim chu an zûl le, kum siar mang ding hen dân ah an nei.

²⁴Agag thlâk Hamedatha fapa Haman nih chamchawhnâk a siam mi (‘purim’, an ti mi chu) Juda tla veih dep na ding hen a tum mi ni asi le; an chi mih dep na ding a tumnâk asi.

²⁵Sikhawmsele, Esther chu lal sinah a va kal le, Haman nih Juda tla rangah thah na ding a tum mi chu lal nih amah leh a fapa tla rangah thlâinâk leh thihnâk ding hen thu a suah.

²⁶Churuangah lawmhnâk ni chu Purim an ti. Mordekai lasuirîn leh an lakah thil a hawng um mi ruangah,

²⁷Juda tla nih an rangah leh an thlâk tla leh Juda hawng si mi âu rang zawngah chu kum lakah chu ni nih kar chu Mordekai nih a simh na mi hâwi hen khuah tak hen mang vima ding hen an ruat.

²⁸Juda dâwngsungkhur leh nûnthâi ah thlâk a hawng um ding mi ram ṭhen kipah mi nih Purim ni tla a hawng um ding mi mang ding hen theihkumza rawh ding hen ruat asi.

²⁹Lalnu Esther, Abihail fanu, Mordekai sinah mi khawm nih lasui a rîn le, chu Purim thu a lânah Mordekai nih a rîn mi lakah thuneihnâk sâng tak hen a rîn bâk.

³⁰Chu lasuirîn chu Juda tla zawzawng sinah kuat asi le, Persia ram, ram ṭhen zâ leh kul leh pasarih lak khawmah an kuat.

³¹Chu ni ah chun Juda tla chu thla a ngamh hen a hum, an thlâk tla nih Purim ni chu dân an siam mi hâwi hen a tik takah mang hen ulh vima ding hen thu an pêk na. Chu chu Mordekai leh Esther an panih thupêk asi.

³²Lalnu thupêk Purim dân birhtir hen lasuibuzual lakah rîn asi.