Read Bawm Chin EXODUS 10 Bible Online

EXODUS 10 - Bawm Chin bible

EXODUS 10

¹Chun, LALPA nih Mosi sinah, “Kal le, lalchem chu va zauhnik, an lakah thilchê ka ti khonâk ding leh

²nan fa le nan tu le tiang nan sim ding hen lalchem leh a rianṭuantu tla chu an lung ka khungtir na le, Aigupta mi tla khawm chu thilchê ka ti liauah chun â tak hen ka siam na zia kha. Kei LALPA chu ka si ti nan theih ver ding hen,” a ti.

³Churawhchun, Mosi leh Aron nih lalchem sinah, “LALPA, Hebrai tla Pathian nih, ‘Zeitiang riamruam me ka sinah na hawng a pêk ding hi na êl awt? Ka minung tla suah na, an hawng ka sawnh khonâk ding hen.

⁴Na êl nget asi chun thâi ah na ram ah khâubawk ka hawng tir awt.

⁵An tam awt tuk ruangah tual an khat zat awt. Rial nih a râwk lo mi tla zawzawng leh thing tla a râwk bang zawzawng an ei hep lai.

⁶Na mun leh na rianṭuantu leh na mi tla in zawzawng a khat ver lai. Nan thlâktu tla nih an muh mi zawng lakah a ṭha lo chem mi asi lai, a ti,” an ti. Lalchem chu â her le, a kal rawh.

⁷Chun, lalchem rianṭuantu tla nih lalchem sinah, “Zeitiang riamruam me hi minung nih hawng kan nawktir awt? Israel mi tla hi suaktir na ko, LALPA an Pathian chu an va sawnh khonâk ding hen. Aigupta ram a râwk dep mi hi na theih lo ma?” an ti.

⁸Churawhchun Mosi leh Aron chu lalchem sinah an hawngpi na le, lalchem nih an sinah, “LALPA nan Pathian sawnh ding hen nan kal kho lai rawh, sikhawmsele a kal ding mi chu âu tla me an si?” a ti.

⁹Mosi nih a sâng le, “Kan ektê hen kan kal awt, kan fa tla leh tar tla khawm. Kan fapa leh kan fanu tla, kan kêl leh dawrâ tla, kan ranrual tla hen LALPA sinah kût ding kan si ruangah,” a ti.

¹⁰Lalchem nih chun, “LALPA min hen siat ka sirh, nan nunau leh nan fa tla rerêng kan puttir na awt lo, hel nan tum ti a lang rawh.

¹¹Nan kalpi kho na rîlmâl lai loh: nan duh êu mi asi chun, mipa lâwng kal ule, LALPA chu va sawnh u,” a ti. Churawhchun, Mosi leh Aron chu lalchem sin thawk hen an nar ving na.

¹²Churawhchun, LALPA nih Mosi sinah, “Aigupta ram lakah khâubawk tlung ding hen na kut phar rawh. Khâubawk tla an hawng lai le, thil a kho mi tla, rial nih a râwk bang an ei lai,” a ti.

¹³Mosi nih a ṭhianṭhunh a lirh le, LALPA nih saklei thawk hen ram lakah ni tlâk leh khuadei hen thli a rângtir rawh; a thâizîng ah chun khâubawk an hawng tlung rawh.

¹⁴A hûtum hen an hawng le, ram pumpiluk ah an hawng fû rawh. An tam dân chu a lân leh hi nûnthâi khawm a um lai lo rawh ti ding rê hen an tam.

¹⁵Tual dum chuk rê hen an khat zit, chu tla nih chun rial nih a relh mi tla thil zeizawng thing rah tla an ei hep. Aigupta ram zawzawng ah thing leh thlâi a ring mi pakhat khawm an zuah lo.

¹⁶Lalchem nih mawhsareh hen Mosi leh Aron chu a kawh na le, “LALPA nan Pathian tlûnah leh nanmah tlûnah ka sual asi.

¹⁷Tu veikhat chu ka sualnâk hawng ka ngaihdam ule, LALPA nan Pathian sinah ka lakah thihnâk rê hen rêpnâk hi hawng ka lâk piak ding hen thla hawng ka cham piak u,” a ti.

¹⁸Mosi nih lalchem chu a kaltâk le, LALPA sinah thla a cham rawh.

¹⁹LALPA nih saklei thli chu thlanglei thli chak tak hen a thleng le, chu nih chun khâubawk tla chu Tipi Sen likâwlneng ah a ranh phin na. Aigupta ram ah khâubawk pakhat khawm a um lo rawh.

²⁰Sikhawmsele LALPA nih lalchem thinlung chu a khauhtir le, Israel tla chu kaltir ding a siang na lo.

²¹Churawhchun LALPA nih Mosi sinah, “Vân leiah na kut phar le, Aigupta ram khuh ding hen mûi sah tak a hawng um lai,” a ti.

²²Mosi nih a kut chu vân leiah a phar le, Aigupta ram pumpi ah mûinâk fâk tak ni thum kar a hawng um.

²³Aigupta mi tla chu anna muh kho lo le, âukhawm nih chu liau zawng chun an in an kaltâk kholo, sikhawmsele Israel tla umnâk chu a chêu kumza.

²⁴Lalchem nih Mosi a kawh le, a sinah, “Kal ule, LALPA chu va sawnh u, nan nunau leh nan fa tla khawm nan sinah nan kalpi kho lai. Sikhawmsele, nan dawrâ tla leh nan kêl tla leh ranrual tla chu hinah an um ding asi,” a ti.

²⁵Mosi nih a sâng le, “LALPA, kan Pathian sinah bâwlnâk ding hen ran tla leh duah phung ap ding na hawng kan pêk ding asi.

²⁶Kan ran tla kan sinah kan put awt, pakhat khawm kan dunglei ah mâk ding asi lo. LALPA, kan Pathian sawnhnâk ding hen kanmah ngelchel nih ran chu kan thîm awt. Chunah kan va tlung lân lo chu zeitin mi ran me a sinah bâwlnâk kan mang awt kan theih loh,” a ti.

²⁷LALPA nih lalchem chu a lung a khungtir le, a kaltir duh na lo.

²⁸Mosi sinah, “Ka mitmuhnâk ah mi kal ving! Ka mêl hawng ka muh lah rawh! Na ka muh bâk chun na thi ngelchel lai,” a ti.

²⁹“Na ti mi chu a dik asi, na ka muh pawt lai lo rawh,” ti hen, Mosi nih a sâng.