Read Bawm Chin EXODUS 15 Bible Online

EXODUS 15 - Bawm Chin bible

EXODUS 15

¹Churawhchun, Mosi leh Israel tla nih hi la hi LALPA sinah an sak rawh: “LALPA chu rokual tak hen nehtu asi ruangah a sinah la ka sak lai; rang leh a tlûnah chuantu tla chu tipi lakah a lawnh na rawh.

²LALPA chu hawng ka vêngtu chak tak asi; amah chu ruang hawng ka suahtu asi. Amah chu ka Pathian asi, ka sawr lai; ka pa Pathian asi, rokualnâk la ka sak lai.

³LALPA chu râltuk thiam asi; a min chu LALPA asi.

⁴“Aigupta kawrsen leh a kari tla chu tipi ah a lawnh na; A hotu ṭha chem tla chu Tipi Sen lakah a thlâk na.

⁵Tipi thûk tak nih a nîm na le, lung hâwi hen a tawdeng ah an tlâ.

⁶“LALPA, na vawrhlei bân chu thiltikhonâk hen a chak; mêlma tla chu a mân dip na.

⁷Lal nehnâk hen na mêlma tla chu na neh na. Na thinthawknâk hen na sêm phin na le, fapawn hâwi hen na duah na.

⁸Tipi chu na sêm le, tlûn luai hen â pâwng; vâm hâwi hen â sawng dun; tipi thûknâk chem chu tual hul a hawng si ving.

⁹Mêlma tla nih, ‘Ka ṭhâwl na lai le, ka tleih na lai; an neih tla chu ka ṭhen zâr lai le, ka duh mi vial ka lâk lai; ka nâmsâu ka phâwi lai le, an neih zawzawng ka lâk hep lai,’ an ti.

¹⁰Sikhawmsele, LALPA nangmah thaw khat thli nih chun Aigupta mi tla tî ah a piltir na; tî ṭihnungkâi lakah suan hâwi hen an pil.

¹¹LALPA, pathian tla lakah nang hâwi âu me um? Thenhlimhnâk leikângah chê tak mi nang hâwi âu me um? ‘Nangmah hâwi hen mi chak leh thilchê tikho âu me um?

¹²Na vawrhlei bân na phar le, kan mêlma tla chu tual nih a dawlh hep na.

¹³Na thutiam chu zumh a kâi, ruang na suah mi minung tla chu na rui na; na chaknâk hen na ram thenhlimh ah na ruai na.

¹⁴Phun tla nih an theih le, lâu hen an thir; Philistia mi tla chu lâunâk nih a tlunh na.

¹⁵Edom ram ruitu tla chu an lâu le, Moab ram mi chak tla an thir; Kanaan ram mi tla chu an râl ṭhatnâk a vei dep.

¹⁶Lâunâk leh ningṭihnâk an lakah a tlung. LALPA, na chak zia an muh le, sal na suah mi tla nih varâl lei an kâi thluh lân lo chu lâu leh ṭangpi duh hen an dîr.

¹⁷A sungah na lûtpi na le, an tlâng tlûnah na phun na; nang, LALPA nih na in rangah na thîm mi mun ah chun, Biakin nangmah ngelchel nih na saknâk ah chun.

¹⁸LALPA, nang chu, zungzâl hen lalchem ding mi chu na si,” an ti.

¹⁹Israel tla chu tual hul tlûnah tipi an tan. Sikhawmsele, Aigupta mi kari leh rang tla a khalhtu tla chu tî lakah an tlâ. LALPA nih tî chu a khirh le, a vurh dep na.

²⁰Khuavâng nu Miriam, Aron farnu nih khuangtê a lâk le, nunau zawzawng tla nih an zûl le, khuang tum bu hen an lâm.

²¹Miriam nih la a sak piak na: “Nehnâk rokual tak â ting ruangah LALPA chu sawr u; rang leh a tlûnah a chuantu tla chu tipi lakah a lawnh na rawh,” a ti.

²²Mosi nih Israel mi zapi tla chu Tipi Sen thawk hen Sur ramkaro ah a kalpi na. Ni thum kar ramkaro ah an kal le, tî rerêng an tawng lo.

²³Churawhchun, Marah an ti mi mun chu an tlung le, sikhawmsele chunah mi tî chu a khâ tuktarâi ruangah an din kho lo. Churuangah asi a min ah Marah[4] an tinâk chu.

²⁴Zapi tla chu Mosi tlûnah an chipchiar le, “Zei kan din lai?” an ti.

²⁵Mosi nih semse ngâi tak hen LALPA sinah thla a cham le, LALPA nih thing ṭeng a muhtir le, chu chu tî lakah a lawnh le; tî chu din ding â tawng rawh. Chunah chun LALPA nih an zûl ding hen dân a pêk na, chunah chun anmah a nik na mi khawm asi.

²⁶“Thudik ka ruat mi leh ka thupêk nan zûl hep chun Aigupta tlûnah râi ka tlungtir mi hen kan rêp na lai loh,” a ti. “Kei, LALPA, a nan damh natu ka si,” a ti.

²⁷Chu nûnah chun Elim mun ah an va dung le, chunah chun tinung va leinih leh tûm kûng sâwmsarih a um; chu tî umnâk kiangah chun um mun an khuar.