Read Bawm Chin EXODUS 17 Bible Online

EXODUS 17 - Bawm Chin bible

EXODUS 17

¹LALPA thupêk hen Israel mi tla nih chun Sin ramkaro chu an mâk le, munkhat thawk hen mun dang dang ah anna ṭhial vima. Rephidim ah um mun an khuar le, sikhawmsele tî din ding a um lo.

²Mosi tlûnah an chipchiar le, “Tî din ding hawng kan pêk,” an ti. Mosi nih a sâng na le, “Zeirangah nan chipchiar? Zeirangah LALPA chu nan nik?” a ti.

³Sikhawmsele mi zapi tla chu an tî a hâl tuktarâi ruangah Mosi tlûnah an chipchiar nget rih. “Zeirangah Aigupta ram ah mi na kan suakpi hen kan fa le kan ran tla tîhâl hen na kan thihtir awt?” an ti.

⁴Mosi nih lungnâwng tak hen LALPA sinah thla a cham le, “Hi zapi minung tla hi zeitin ka ti na awt? Lung hen an hawng ka seh awt rawh hi,” a ti.

⁵LALPA nih Mosi sinah, “Israel ruitu lakah zeimaw mi tla chu na sinah kalpi na le, mi zapi mâilei ah nangmah kal le, Nile tiva na vuaknâk ṭhianṭhunh kha put.

⁶Sinai Tlâng ah mi lungpi tlûnah na mâika ah ka dîr lai, lungpi chu vuak le, zapi minung din ding tî a hawng suak lai,” a ti. Mosi nih Israel ruitu tla mâika ah chu hâwi hen a ti rawh.

⁷Chu mun chu a min ah Massah leh Meribah[6] ti hen an sak. Israel tla nih LALPA chu, “Kan sinah a um mawh umlo rêng mawh?” ti hen niknâk dingah a tlûnah an chipchiar ruangah.

⁸Amalek mi tla nih Israel tla chu Rephidim mun ah an do na.

⁹Mosi nih Josua sinah, “Thâi ah Amalek mi tla do ding hen minung zeimaw zat thîm na. Pathian nih put hawng ka ti mi ṭhianṭhunh put hen tlâng tlûnah ka dîr lai,” a ti.

¹⁰Josua chu Mosi nih thu a pêk mi hâwi hen Amalek do ding hen a suak le, chu liau chun Mosi, Aron leh Hur chu tlâng tlûnah an va kâi.

¹¹Mosi nih a bân a phar kar vial chu Israel mi tla nih an neh na. Sikhawmsele, a bân a thlâi chun Amalek mi tla nih an neh na.

¹²Mosi bân chu a zê le, Aron leh Hur nih lung a tonâk ding lung an hawng put le, khat lei sîr vevê ah an dîr le, a bân zangh tar hen an tleih, nî tlâk tiang hen bir tak hen an tleih.

¹³Hi hâwi hen Josua nih Amalek mi tla a neh dep na.

¹⁴Churawhchun, LALPA nih Mosi sinah, “Hi nehnâk thu hi theihkumzanâk ding hen rîn rawh. Amalek mi tla chu ka veih dep na awt ti hen Josua rangah simh,” a ti.

¹⁵Mosi nih mâichâm a siam le, a min ah, “Jehova-Nissi’’ (LALPA chu ka rangah nehnâk puanzâr asi) a ti.

¹⁶“LALPA nehnâk puanzâr chu sâng tak hen thlâi u, LALPA nih Amalek chu a do kumza lai” a ti.