Read Bawm Chin EXODUS 19 Bible Online

EXODUS 19 - Bawm Chin bible

EXODUS 19

¹Israel mi zapi tla chu Rephidim an mâk le, Aigupta an suak nûnah thla thumnâk a ni khat ni ah Sinai ramkaro an va tleng. Chunah Sinai Tlâng bul ah mun an khuar le,

³Mosi chu Pathian hen a tawng ding hen Sinai Tlâng ah a kâi. LALPA nih a sinah tlâng thawk hen a kawh le, Jakob thlâk Israel tla sinah thu sim ding mi tla a simh:

⁴“Kei LALPA nih Aigupta mi tla lakah ka thilti zia leh mupi tla nih a thla tlûnah a fa tla a put hâwi hen hinah ka sinah kan put na mi tla na muh.

⁵Tuah ka thu nan lung hen ka dân thu tla nan zûl chun keimah mi tak nan si lai. Tual pumpi hi ka tâ asi, nannih lam chu ka mi thîm nan si lai.

⁶Ka sin cho ah â pêk mi minung nan si, bâwlpu tla hâwi hen ka rian nan ṭuan lai,” a ti na.

⁷Churawhchun Mosi chu a ṭum le, mi zapi hotu tla chu a pumh na le, LALPA nih a sinah thu a pêk mi tla a simh na.

⁸Churawhchun mi zapi tla chu a rual hen an sâng le, “LALPA nih a sim mi zawng chu kan ti lai,” an ti. Chun, Mosi nih LALPA sinah a lanh rawh.

⁹LALPA nih Mosi sinah, “Sûm sah tak lakah ka hawng lai le, mi zapi tla nih kan sawnh mi an theih lai le, tu thawk hen an lung lai rawh,” a ti. Mosi nih mi zapi tla nih an sâng mi chu LALPA a simh le,

¹⁰LALPA nih a sinah, “Kal le, Israel fa tla chu hawng ka sawnh ding hen tusûn leh thâi ah anna thianh ding hen simh na. An puan tla suk hen

¹¹kip ah anna tîm ding asi. Chu ni ah Sinai Tlâng tlûnah ka hawng ṭum awt, chunah chun mi zawzawng nih an hawng ka muh kho lai.

¹²Chu tlâng chu hêl dak hen niri siam u, mi zapi nih an kanh lonâk ding hen singsiah na seh. Tlâng hawng kâi lo ding hen a kiangkam khawm naih lo ding hen simh na. Âuzawng nih a lamh chun thah asi lai;

¹³âu kut hen khawm tawngh lo hen, lung hen seh mawh chanhtiang hen kah mawh asi lai. Chu chu ran leh minung bang cho hen thah ding asi. Sikhawmsele, tâwtawrâwt an tum tikah mi zapi tla chu tlâng leiah an kâi ding asi,” a ti.

¹⁴Churawhchun, Mosi chu tlâng thawk hen a hawng ṭum le, mi zapi tla chu Pathian sawnh ding hen a tîm ding hen a simh na. Churawhchun an puan tla an suk le,

¹⁵Mosi nih an sinah, “Kip chu a râlring ule, chu ni chu nu le pa khawm anna theih ding asi lo,” a ti.

¹⁶A ni thum ni zîng ah chun, khuarît leh mîmthlalek a hawng um le, sûm sah tak tlâng tlûnah a hawng lang, tâwtawrâwt hâu fâk tak tum mi chu theih asi. An umnâk mun ah mi zapi tla chu thungâi an ṭih le, an thir rawh.

¹⁷Mosi nih an umnâk mun mi chu Pathian hen a tawng ding hen mi zapi tla chu a suakpi na le, tlâng bul ah an dîr.

¹⁸Sinai Tlâng pumpi chu meikhû nih a tuam pang, LALPA chu mei hen a hawng ṭum ruangah. Meikhû chu meialhpî lakah mi meikhû hâwi hen a kâi le, zapi minung tla chu thungâi an thir.

¹⁹Tâwtawrâwt hâu chu a fâk dadauh. Mosi nih thu a sim mi chu Pathian nih khuarît hâu hen a sâng.

²⁰LALPA chu Sinai Tlâng tlûnah a hawng ṭum le, Mosi chu tlâng tlûnah a kawh. Mosi chu a va kâi le,

²¹LALPA nih a sinah, “Va ṭum le, mi zapi tla kha hawng ka zauh ding hen niri an hawng kanh lo ding hen simh na; an hawng kanh chun mi tamtak an thi lai.

²²Bâwlpu tla hawng ka naihtu khawm anna thianh ding asi, chu hâwi asi lo chun ka rêp na awt,” a ti.

²³Mosi nih LALPA sinah, “Mi zapi tla chu an hawng kâi kho ding asi lo, tlâng thenhlimh chu niri siam hen singsiah ding ti hen thu na kan pêk ruangah,” a ti.

²⁴LALPA nih a sâng le, “Va ṭum le, Aron kha na sinah hawng kîrpi. Bâwlpu tla leh zapi minung tla nih ka sinah hawng ding hen niri kanh lah na seh, chu lo chun rêp an tawng lai,” a ti.

²⁵Mosi chu mi zapi tla sinah a va ṭum le, LALPA nih a sim mi vial chu a simh na.