Read Bawm Chin EXODUS 21 Bible Online

EXODUS 21 - Bawm Chin bible

EXODUS 21

¹“Israel mi tla rangah hi dân tla hi pêk na:

²Hebrai lakah mi sal nan châwk chun kum ruk nan rian a ṭuan lai. A kum sarihnâk ah chun tlanh lo hen a suak ding asi.

³Sal asi liauah nupi nei lo mi asi chun, a suak tikah a nupi put lo hen a mah lâwng hen a suak lai; nan sal chu nupi nei chia asi chun a nupi a suakpi kho lai.

⁴A nupi chu a pu nih a ṭhît piak mi asi chun, fanu fapa tla ring khawmsele a nu leh a fa tla chu a pu tâ asi, amah lâwng a suak ding asi.

⁵Chu sal nih chun a pu, a nupi leh a fa tla a siang lo hen suak ding a duh lo chun,

⁶a pu nih Pathian sawnhnâk mun ah a kalpi ding asi. Chunah kawtkâ mawh kawtkâ tung kiangah dîrtir sele, a nâ vih seh. Churawhchun san tlum hen a sal asi lai rawh.

⁷“Mi nih a fanu sal ah a zuar chun, mipa sal si mi tla hâwi hen a suak ding si loh.

⁸Nunau chu nupi rangah mang ding hen duhtu sinah zuar asi hen, a mipa nih a duh nawlh lo chun, a pa sin lîlâ ah zuar nawlh ding asi; a pu nih ramdang mi sinah a zuar kho lai lo, dawh lo tak hen a mang ruangah.

⁹Mi nih a fapa rangah sal nunau a châwk chun, fanu hâwi hen a zauh ding asi.

¹⁰Mi nih nupisûn nei khawmsele, a lânah mi hâwitê hen ei leh bar leikâng leh ni leh puan leikâng khawm a nupi masa hen thuneihnâk bang cho a pêk na ding asi.

¹¹Hi hâwi hen a lakah thil ti ding hâwi a ti lo chun, a man zeikhawm tawng lo hen a suah ding asi.

¹²“Mi a vuak hen thahtu chu, amah khawm thah bâk ding asi.

¹³Sikhawmsele, palh sual mi asi hen thah a tum mi asi lo chun, ruangsuahnâk ding hen ka ruat mi mun ah a him kho lai.

¹⁴Sikhawmsele, mi nih thinthawk hen midang a thah êu chun, amah khawm thah bâk ding asi, him ding hen ka mâichâm ah kal khawmsele a âwl lai loh.

¹⁵“Âuzawng a nu leh pa vuaktu chu thah ding asi.

¹⁶“Âuzawng nih sal ah zuar ding hen mawh siah ding hen mawh minung a fîr asi chun a fîrtu chu thah ding asi.

¹⁷“A nu mawh a pa mawh siatbarhtu chu thah ding asi.

¹⁸“Mi anna sual hen mi pakhat nih kut tum hen mawh lung hen mawh a vuak hen a thah lo chun chu minung chu rêp ding asi lo, a vuak mi chu rîl thlo hen,

¹⁹a nehnûn ah a thawk kho hen lênglei ah kal kho asi chun, a vuaktu pa nih a ngawr kar zawzawng a zauhkhenh hen a ni lawh a rulh ver ding asi.

²⁰“Mi nih vuakfung hen a sal a vuak chun, nunau mawh mipa mawh khawm si sele, a thi chun chu minung chu rêp asi lai.

²¹Sikhawmsele sal chu ni khat mawh ni nih mawh a dam rih chun, a vuaktu chu rêp ding asi lo, a neih a vei mi chu amah rêpnâk asi ko.

²²“Mi anna sual hen nunau a râi mi rangah ngânfâk an pêk hen a fa a siat chun, chu nunau chu a dêngkhuai lah khawmsele, ngânfâk pêktu nih chun chu nunau pasal nih a hauh zat zawng a châwi ding asi, lâirêltu tla remtinâk hen.

²³Sikhawmsele, chu nunau chu liamh asi chun thih ruangrûl ah thih,

²⁴mit ruangrûl ah mit, ha ruangrûl ah ha, kut ruangrûl ah kut, kezaphah ruangrûl ah kezaphah,

²⁵duahtu chu duah bâk ding, liamhtu chu liamh bâk ding, thisen suahtu chu thisen suah bâk ding.

²⁶“Mi nih a to-awnu mawh a to-awpa mawh a mit ah a vuak hen, a râwk chun, a mit man ruangrûl ah sal asi nâk ah mi a suak ding asi.

²⁷A hâ tlawng rel a chumh chun, a hâ man ruangrûl ah sal asi nâk lakah mi a suak ding asi.

²⁸“Chawchal nih âumawh thi thlo hen suk sele, chu chaw chu thi thlo hen seh ding asi, a sâ khawm ei ding asi lo; a dâwngpu lam chu rêp ding asi lo.

²⁹Sikhawmsele, chu chaw chu a râng hen minung suk mang asi chun, a dâwngpu chu simh lemang hen kilkâwi hen a rêng duh lo hen midang rangah thi thlo a suk chun chu chaw chu lung hen thi thlo seh ding asi, a dâwngpu khawm thah bâk ding asi.

³⁰Sikhawmsele, amah nungnâk hum ding a châwi asi chun, a châwi ding zat chu a pêk ding asi.

³¹Chawchal nih mipa ngâksia mawh nunau ngâksia mawh a thah chun, chu dân hâwitê hen rêl ding asi.

³²Chawchal nih sal nunau mawh sal mipa mawh a thah chun, chaw dâwngpu nih sal dâwngpu rangah tangka sâwmthum a chawih ding asi, chawchal chu thi thlo seh ding asi.

³³“Mi nih khur sinh a awng hen mawh, khur a chawh le, a khâr lo hen chawchal mawh sanatung mawh a tlâ chun,

³⁴Chu ran man chu a châwi ding asi. Ran dâwngpu rangah a man a pêk lai le, ran a thi mi â ting kho lai.

³⁵Âu chawchal nih mawh midang chawchal a thah chun a nung mi chu zuar na sele, a tangka chu a ṭhen na seh, ran a thi mi meh khawm a ṭhen na seh.

³⁶Chu chaw chu suk mang asi ti theih ko hen a dâwngpu nih a kilkâwi hen a rêng lo chun a thi mi ruangrûl ah a suktu chawchal a nung mi a châwi lai le, a thi mi ruak chu â ting lai.