Read Bawm Chin EXODUS 22 Bible Online

EXODUS 22 - Bawm Chin bible

EXODUS 22

¹“Mi nih chawpê mawh a fîr hen a thah mawh a zuar asi chun, chawpê pakhat rûlah pangâ a pêk ding, dawrâ pakhat rûlah pali a pêk ding asi.

²A fîr mi chu a rulh ngelchel ding asi. Zeikhawm a nei lo chun a fîr mi ruangrûl ah amah chu sal ah zuar ding asi. Ran mawh, chawpê mawh, sanatung mawh, dawrâ mawh a fîr mi chu a nung hen a kil ko rih asi chun, pakhat ruangrûl ah panih a pêk ding asi. “Mifir nih zân ah in a rawk hen in dâwngpu nih a thah chun, minung thahtu mawhnâk tingtir ding asi lo. Sikhawmsele sûn lâi vâr ah asi chun mawh hen ngaih kho asi lai.

⁵“Mi nih a ran mi phâisen ah mawh grep dûm ah mawh a thlah hen a thlâi a ei piak asi chun, a vei mi chu amah phâisen ah mi mawh grep dûm ah mi hen mawh a rulh ding asi.

⁶“Mi nih a phâisen a duah hen bua nâwngah mei a tlân hen midang phâisen ah mi a thil chîng tla, a kho liau mi mawh a ât rawh mi mawh a khangh hen a râwk chun, chu minung mei thlahtu nih a râwk mi vial chu a rulh ding asi.

⁷“Mi nih midang tangka mawh, thil sung a kil piak hen a in a mi chu mi nih a fîr chun, chu mifîr chu a tleih kho asi chun a lehnih hen a sam ding asi.

⁸Sikhawmsele, mifîr chu an tleih kho lo chun, thil kiltu pa chu Pathian sawnhnâk in ah an kalpi lai le, chunah chun midang thil ka fîr lo ti hen siat a tleih ding asi.

⁹“thil-leh-rî thu ah nawknâk a um kipah, ran thu ah, sanatung mawh dawrâ mawh, nipuan mawh thil dang rerêng a tlâu mi thu ah chu minung anna el mi panih chu Pathian sawnhnâk in ah kalpi na ding asi. Pathian nih sual hen a ruat mi pa nih a pakhat pa rangah a lehnih hen a rulh ding asi.

¹⁰“Mi nih midang sanatung mawh, chawpê leh dawrâ mawh ran dang kil piak hen, chu ran chu a thi mawh â liam mawh, mifîr nih an lâk hen theihpitu âukhawm an um lo asi chun,

¹¹Chu a zauhtupa chu Pathian sawnhnâk in ah kal hen, midang ran rerêng ka fîr lo ti hen siat a sirh seh. Chu ran chu fîr asi lo chun, a tlâu mi chu a dâwngpu nih a ting ko seh, rulh a herh lo rawh.

¹²Sikhawmsele, chu ran chu fîr mi asi chun, a zauhtupa nih a dâwngpu chu a rulh ding asi.

¹³Chu ran chu sa râng nih a seh mi asi chun, theihnâk ding hen a ei bang a hawng put lai le, sa râng nih a seh mi man chu rulh asi lai loh.

¹⁴“Mi nih, midang ran a lâng hen a dâwngpu muh lo hen a liamh mawh a thi chun, a lângtupa nih a rulh ding asi.

¹⁵Chubang hâwi hen a um liauah a dâwngpu a um mi asi chun, rulh ding a herh lo. Mi nih chu ran chu a man pêk ding hen a lâng mi asi chun, a tlâu mi chu a lâng man hen denh ding asi.

¹⁶“Mi nih, nungâk thenhlimh âukhawm tawnghlo mi a râwk chun, man a manh hen a umpi ding asi.

¹⁷Sikhawmsele, a pa nih umpitir ding a siang lo khawmah, man a manh zat ding chu a pa rangah a pêk nget ding asi.

¹⁸“Zei nunau tal dâwi mangtu chu thah ding asi.

¹⁹“Mipa âuzawng ran pungtu chu thah ding asi.

²⁰“Âuzawng, kei, LALPA lakah silo hen pathian dang sinah bâwlnâk aptu chu thi ding hen mawhtir an si lai.

²¹“Ramdang mi minung nehsawh hen nauneh lah; Aigupta ram ah ramdang mi nan si mi kha theihkumza u.

²²Mi ngâkṭah mawh numei mawh rangah nan nehsawh ding asi lo.

²³Nan nehsawh asi chun, Kei, LALPA sinah ṭangpi deih hen an âu mi chu ka sâng na lai le,

²⁴ka thinthawk lai le, râltuknâk ah kan thah na lai. Nan nupi tla chu numei an si lai le, nan fa tla chu pa neilo an si lai.

²⁵“Ka mi le a pâm mi tla sinah lâng ding tangka nan pêk chun, tangka pûktirtu tla nih a fa an lâk mi hâwi hen lâk lah na u.

²⁶Âu nipuan mawh thil a nan pêk ding mi rûlah na tleih piak chun nî tlâk lânah na khirh nawlh ding asi.

²⁷Chu cho a taksa a lumtirnâk dingah a nei mi asi ruangah. Zei vurh hen a it kho lai rawh? Ṭangpi ding hen hawng ka auh lai le, Kei khuaruattu ka si ruangah ka sâng awt asi.

²⁸“Pathian rangah simsiat lah, na hotu tla khawm siatbarh lah.

²⁹“Pêk ding liauah na uain, na fâng, na oliv sariak tla ka sinah hawng pêk rawh. “Nan fapa tîr tla hawng ka pêk u.

³⁰Nan ranrual leh nan dawrâ a ring tîr mi tla hawng ka, pêk u, a mipa a ring tîr mi chu a nu sinah ni sarih kar a um lai le, a ni riat ni ah ka sinah nan hawng ap ding asi.

³¹“Ka mi tla nan si le, nan ran tla ram sa nih a seh mi rerêng nan ei ding asi lo, chu ngâk hen chun ui tla rang lam pêk dauh na u.