Read Bawm Chin EXODUS 24 Bible Online

EXODUS 24 - Bawm Chin bible

EXODUS 24

¹LALPA nih Mosi sinah, “Nang, Aron, Nadab leh Abihu leh Israel tla ruitu mi sâwmsarih tla hen tlâng ah ka sinah hawng ule, a râltlâng hen hawng ka sawnh hen kûn u.

²Nangmah cho lo chu âukhawm ka kiangah hawng lah na seh. Mi zapi khawm tlâng tlûnah an hawng ding asi lo,” a ti.

³Mosi nih mi zapi zawzawng chu LALPA thupêk mawh dân tla chu a simh na le, mi zapi tla chu a rual hen, “LALPA nih a sim mi zawng kan ti lai,” ti hen an sâng.

⁴Mosi nih LALPA thupêk zawzawng chu a rîn rawh. A thâizîng zîngtê ah Mosi nih tlâng bul ah mâichâm a siam le, Israel fa phun zat, lung leinih a chuanh.

⁵Churawhchun tlangvâl tla a fial na le, LALPA hen kawmhnâk dingah ran hen bâwlnâk duah mi an ap.

⁶Mosi nih ran thî khingkhuai chu a lâk le, khêng ah a siah, a dang a khing chu mâichâm tlûnah a theh.

⁷LALPA thupêk rînnâk thudântuk bu chu a lâk le, hâu fâk tak hen zapi tla sinah a rêl. “LALPA nih thu hawng kan pêk mi chu kanna awi hen kan ti ver lai,” an ti.

⁸Churawhchun, Mosi nih khêng lakah mi thî chu a lâk le, mipi tla a theh na. “Hi thisen hi LALPA nih thu an pêk na liauah a thudântuk singsiahnâk asi,” a ti.

⁹Mosi, Aron, Nadab leh Abihu leh Israel mi ruitu sâwmsarih tla chu tlâng ah an va kâi le, Israel tla

¹⁰Pathian chu an va muh rawh. A kezaphah tang chu saphir lung phah mi hâwi asi, vândâwm hâwi hen a pâwl iam.

¹¹Israel ruitu tla chu Pathian nih zei ngânfâk khawm a pêk na lo, Pathian chu an va muh le, munkhat hen an din hen an ei.

¹²LALPA nih Mosi sinah, “Tlâng ah ka sinah hawng kâi le, hinah na um karah Israel mi tla sîntir na ding ah lungtlêp panih lakah dân tla rîn mi ka nan pêk lai,” a ti.

¹³Mosi leh amah ṭangpitu Josua chu anna tîm le, Mosi chu tlâng thenhlimh ah a kâi rawh.

¹⁴Mosi nih Israel ruitu tla sinah, “Kan hawng kîr lân lo chu hi mun ah hin hawng kan ngâk ko u. Aron leh Hur khawm nan sinah an um hi; âutal nih thunawk sim ding nei khawm ule an sinah nan va kal kho,” a ti.

¹⁵Mosi chu Sinai Tlâng ah a va kâi le, sûm a zîng pang rawh.

¹⁶Mit ser rê mi chêu LALPA mâika mi chu tlâng tlûnah a hawng ṭum rawh. Israel mi tla mitmuh ah tlâng tlûnah mei a kâng mi chêu hâwi asi. Ni ruk kar chu tlâng chu sûm nih a khuh pang, a ni sarih ni ah chun LALPA nih Mosi chu sûm thawk hen a kawh.

¹⁸Mosi chu tlâng tlûnah sûm lakah a kâi rawh. Chunah chun ni sâwmli leh zân sâwmli a um.