Read Bawm Chin EXODUS 27 Bible Online

EXODUS 27 - Bawm Chin bible

EXODUS 27

¹“Thingrî hen mâichâm siam le, kil li hen, a dung dâwng ngâ, a vâng dâwng ngâ, a sâng lei dâwng thum ding asi.

²A tlûnlei kil li ah a kî kipah a fawng na siam ding asi. Chu mâichâm chu sa khat hep hen siam le, a pum hen dâr hen luanh ding asi.

³Vachâm siahnâk bêl leh vachâm rûtnâk, khêngkûm leh sa thurnâk thîr ngawih mi leh mei lâknâk khêng siam ding asi. Hi ruakhâu zawzawng hi dâr hen siam ding asi.

⁴Mâichâm rangah dâr lên siam le, chu lên tlûnlei a kî kipah dâr a nâ pali zawnhnâk ding na siam ding asi.

⁵Dâr lên chu mâichâm tlâng tanglei ah siah le, a tlûnlei ah mâichâm vawmlâi tiang phâk ding hen.

⁶A zawnhnâk ding hen thingrî thing hen siam le, dâr hen luanh.

⁷Zawnh awt liauah mâichâm sîrlei a nâ lakah sawh ding asi.

⁸Mâichâm chu thingphel hen sawng ding, kua hung hen siam, tlâng ah kan zauhtir mi hâwi hen.

⁹“Ka umnâk Puanin kulh chu puan mangṭhia hen puanzâr tla siam. Simlei sîr ah mi puanzâr chu a dung dâwng zâ si seh.

¹⁰Dâr tung kul, a tohnâk dâr kul a thlâinâk ngawih mi leh a fung tangka hen siam mi lakah bah ding asi,

¹¹marlei sîr kulh khawm chu hâwitê si seh.

¹²Tlâklei kâng sîr puanzâr chu dâwng sâwmngâ hen sâu si ding asi, a tung parâ, a tohnâk parâ hen.

¹³Suahlei sîr a tualmâi leikâng puanzâr khawm dâwng sâwmngâ ber ding asi.

¹⁴A tualmâi sîr kipah puanzâr chu dâwng leingâ ding asi, a tung pathum leh a tohnâk pathum hen.

¹⁶A tualmâi vial ah puanzâr chu dâwng kul, puan mangṭhia, a dumpâwl, senduk leh samul lasen hen tah mi dawh tak chawih hen thuamh mi asi ding asi. A tung pali, a tohnâk pali asi ding asi.

¹⁷A kulhnâk tung zawzawng chu tangkasa tluan hen anna tlâi ver ding asi, a bahnâk ngawih mi chu tangkasa hen siam le, a tohnâk chu dâr si seh.

¹⁸A tualmâi kulh chu a dung dâwng zâ, a vâng dâwng sâwmngâ, a sâng lei chu dâwng ngâ si seh, a kulhnâk chu puan mangṭhia si seh, a tohnâk chu dâr si seh.

¹⁹Puanin saknâk ding a ruakhâu zawzawng leh a kilhnâk zawzawng leh puanzâr kilhnâk zawzawng chu dâr ver ding asi.

²⁰“Meichêu hâng rangah oliv sariak ṭha chem hawng put ding hen Israel tla chu thu pêk na le, zânlei siar chêu kho ding hen.

²¹Aron leh a fapa tla nih chu meichêu chu ka umnâk Puanin sung, ka Thudântuk Bâwm mâika ah puanzâr lênglei ah an siah ding asi. Ka umnâk ah chun zânlei thawk hen zînglei tiang an chêu ding asi. Hi thupêk hi Israel tla leh an thlâk tla nih an kil kumza ding asi.