Read Bawm Chin EXODUS 28 Bible Online

EXODUS 28 - Bawm Chin bible

EXODUS 28

¹“Na unaupa Aron leh a fapa tla Nadab, Abihu, Eleazar leh Ithamar chu kawh na. Israel mi zapi lakah mi thlei na le, ka sinah bâwlpu rianṭuantu ding hen siam na.

²Na unaupa Aron rangah bâwlpu thuam siam le, rokualtirtu leh dawhtirtu rang dingah pêk.

³Mi zungthiam tla tikhonâk ka pêk mi zawzawng kawh na le, Aron nipuan tla siam ding hen simh na; keimah rianṭuan ding hen bâwlpu ah siam ansi khonâk ding hen.

⁴Bâwlpu ir ah bêk mi, ephod leh bâwlpu kawrdawh fual, thuamh mi kawrdawh, bâwlpu upâwng leh tâisâwm siam ding hen simh na. Chu tla nih chun bâwlpu thuam na unaupa leh a fapa tla rangah siam piak na sele, ka sinah bâwlpu rianṭuan na seh.

⁵Mi zungthiam tla nih chun dumpâwl, senduk, samul lasen, ngûn lazâi, puan mangṭhia an mang ding asi.

⁶“Ephod chu a pâwl, a senduk, samul lasen, ngûn lazâi, leh puan mangṭhia chawih hen thuamh mi an siam ding asi.

⁷Liangbah panih a thlâinâk ding a sîr ah bêk ding asi.

⁸Tâisâwm dawh tak a tah mi a ruakhâu tla hen siam mi chu ephod lakah thlaih ding asi, chu zûn khat lakah um ding asi.

⁹Karnelian lung panih lâk le; Jakob fa leinih min chu lakah rîn rawh;

¹⁰an suak an a sang dân hâwi vima hen, lung khat lakah min ruk, a dang lakah min ruk hen.

¹¹Lungmantam siamtu tla nih chu lung panih lakah Jakob fapa tla min ngûn hen rîn na seh.

¹²Ephod liangbah lakah Israel phun leinih theihnâk ding hen thlaih na seh. Hi hâwi hen Aron nih a liang tlûnah an min tla chu a put vima lai le, churawhchun Kei, LALPA nih ka mi le chu ka theihkumza na lai.

¹³Ngûn lazâi panih phiar le,

¹⁴ngûn karo chikchîn panih rî hâwi hen rual mi, phiar mi lakah thlaih.

¹⁵“Ṭâng bêk, Bâwlpu Lalchem rangah Pathian duhzia thiltum ah mang ding mi siam rawh. Ephod thuamh mi hâwitê hen a ruakhâu hen siam ding asi.

¹⁶Kî li nei hen thuang nih ding asi, a dunglei khâp khat, a vânglei khâp khat tluk asi ding asi.

¹⁷Chunah chun lung sung tlar li hen bêk ding asi, tlar khatnâk ah ruby, topaz, garnet;

¹⁸a tlar nihnâk, emerald, sapphire, diamond,

¹⁹a tlar thumnâk turquoise, agate leh amethyst;

²⁰tlar linâk beryl, karnelian leh Jaspar. Ngûn rirual lakah hi tla hi bêk ding asi.

²¹Hi lung leinih lakah hin Israel phun tla zauhtirnâk ding hen Jakob fapa tla min lung pakhat lakah min pakhat rîn vima ding asi.

²²Ṭâng bêk rangah ngûn chikchîn rualpâwk mi na siam ding asi.

²³Ngûn kual panih siam le, ṭâng bêk a tlûnlei mi kî lakah thlaih.

²⁴Chu ngûn rî panih chu ngûn kual panih lakah sih.

²⁵Ngûn rî panih pâr chu ngûn rî dang panih lakah sih, hi hâwi hen ephod mâilei kâng liangbah ah thlaih ding asi.

²⁶Churawhchun ngûn kual panih chu ephod sangah ṭâng bêk sâr sunglei ah thlaih ding asi.

²⁷Ngûn kual panih dang siam le, tâisâwm dawh tak hen tah mi tlûnlei a liah tawnh mi ṭhîtnâk kiangah, ephod liangbah panih mâilei kâng tanglei dauh ah thlaih.

²⁸Ṭâng bêk kual chu ephod ngûn kual lakah dumpâwl rirual hen sih, tâisâwm tlûnah mi ṭâng bêk chu â lît kho lonâk ding hen.

²⁹“Aron chu Mun Thenhlimh ah a lût tikah Israel phun min rînnâk ṭâng bêk â awih ding asi, chu rawh chun, Kei, LALPA nih ka mi tla chu ka theihkumza lai.

³⁰Ṭâng bêk lakah chun Urim leh Thummim bêk le, chu chu ka umnâk thenhlimh ah Aron a hawng tikah a hawngpi ding asi. Chubang hâwi liau kipah ṭâng bêk chu a awih kumza ding asi. Chu tikah Israel mi tla rangah ka duhzia thil a ti mi asi lai.

³¹“Ephod tlûnah kawrfual chu samul dumpâwl karo hen siam mi asi ding asi.

³²Lû sawhnâk ding hen a kua um ding asi. Chu kua chu tlêk lo ding hen tah mi hen a tlâng kâwm pang ding asi.

³³A tanglei kâng zawzawng hêl dak hen puan sâr ah pomegranate rah lem a pâwl mi, a senduk, samul lasen rawng hâwi mi a karah ngûn khi-îng na thlaih ding asi.

³⁵Aron nih bâwlpu rian a ṭuan kipah hi kawrfual hi â ruk ding asi. Ka sinah Mun Thenhlimh ah a hawng tikah mawh a suak awt liauah mawh chu khi-îng hâu chu theih hen a um lai le, thah hen a um lai lo.

³⁶“Chun, ngûn karo hen thuamhnâk siam le, ‘LALPA sinah ap mi’ ti hen rîn rawh.

³⁷Upâwng lakah mâilei ah rirual pâwl hen sih.

³⁸Aron nih a chal ah â pawnh lai le, churawhchun Kei, LALPA nih Israel tla thilpêk zawzawng leh ka sinah anna pêknâk leh mi zapi tla nih an thil ap lakah palh sualnâk khawmah ka pawm lai.

³⁹“Aron kawrdawh leh upâwng chu puan mangṭhia hen siam le, tâisâwm chu ṭial dawh tak hen siam rawh.

⁴⁰“Rokual leh dawhtir ding hen Aron fapa tla rangah kawrdawh, tâisâwm, lukhuh siam tir na.

⁴¹Hi bang thuam tla hi na unaupa Aron leh a fapa tla thuamhtir na. Oliv thuh na hen ap na le, birhtir na, ka rianṭuan ah bâwlpu si ding hen.

⁴²Puan mangṭhia hen kekawr kaih ding siam piak na le, tâi thawk hen an êl tiang fual hen, an taksa a lang lonâk ding hen.

⁴³Aron leh a fapa tla nih ka umnâk Puanin ah mawh Mun Thenhlimh ah mi mâichâm ah bâwlpu rian an ṭuan tikah anna kaih kumza ding asi. Churawhchun an hawng a langh tikah thah an si lonâk ding hen. Hi hi Aron leh a thlâk tla rangah dân a um kumza ding mi chu asi.