Read Bawm Chin EXODUS 3 Bible Online

EXODUS 3 - Bawm Chin bible

EXODUS 3

¹Nikhat chu a pu Jethro, Midian bâwlpu dawrâ leh kêl rual a vêng le, ranrual tla chu ramkaro a palpi na le, tlâng thenhlimh Sinai Tlâng ah a kalpi na.

²Chunah chun LALPA vânmifial chu thingbû nâwngah meialh hâwi hen â langh. Mosi nih thingbû chu meialh lakah um mi hâwi hen a muh le, sikhawmsele a kâng lo fâwn.

³Chun, Mosi nih a thinlung hen, “A chê chiam e!” a ti. “Zeitin thingbû a kâng lo zia? Ka naih lai le, ka zauhnik lai,” a ti.

⁴LALPA nih Mosi nih a hawng naih mi a muh le, thingbû thawk hen, “Mosi! Mosi!” ti hen a auh. Anih nih, “Hinah ka um, ti hen a sâng.

⁵Pathian nih, “Hawng ka naih lah rawh. Na umnâk kha mun thenhlimh asi ruangah na pheikawk kha lît rawh.

⁶Kei a nan thlâktu Pathian, Abraham Pathian, Isak Pathian leh Jakob Pathian ka si,” a ti. Churawhchun, Mosi nih Pathian chu a zauh ngam lo ruangah a mêl a khuh.

⁷Churawhchun, LALPA nih a sinah, “Ka mi tla Aigupta ram ah an nehsawh na zia ka muh le, anmah rangah Aigupta sal vêngtu tla lakah mi ruangsuah na ding hen an âu hâu khawm ka theih. An tuar zia tla ka theih le,

⁸churuang chun Aigupta ram ah an um mi chu suakpi na hen ram kâu tak pakhat neihnâk ding hen ram ningno tak, Kanaan mi tla, Hit mi tla, Amor mi tla, Periz mi tla, Hiv mi tla leh Jebus mi tla tuah an umnâk leiah kalpi na ding hen ka hawng ṭum asi.

⁹Ka minung tla âu hâu ka theih hen, Aigupta mi nih an nehsawh na mi tla khawm ka muh.

¹⁰Tuah Aigupta lalchem sinah ka nan fial asi, a ram ah mi ka minung tla chu suakpi hen na rui na ding hen,” a ti.

¹¹Sikhawmsele, Mosi nih Pathian sinah, “Kei zeikhawm ka si lo, zeitin lalchem sinah kal hen Aigupta ram ah mi Israel tla ka suakpi kho na lai?” a ti.

¹²Pathian nih, “Na sinah ka um lai le, Aigupta ram ah mi ka mi tla na hawngpi na tikah chun hi tlâng ah hin nan ka sawnh lai. Chu chu keimah nih ka nan fial asi ti theihnâk asi lai,” ti hen a sâng.

¹³Sikhawmsele, Mosi nih a sâng le, “Israel fa tla sinah ka va kal lai le, nan thlâktu Pathian nih nan sinah hawng ka fial ka ti lai le, ‘a min âu?’ ti hen an ka deih lai le, churawhchun an sinah zei ka sim awt?” a ti.

¹⁴Pathian nih, “Keimah ka si a ti mi kha ka si, a ti. ‘Keimah ka si[3] titu nih nan sinah hawng ka fial asi, na ti ding asi,” a ti.

¹⁵Israel fa tla chu, Kei, LALPA an thlâktu Pathian, Abraham Pathian, Isak leh Jakob Pathian nih an sinah ka nan fial mi na si ti na simh na ding asi. Hi hi zungzâl ka min asi; hi hi, hi nûnah thlâk hawng um ding mi tla nih ka min ah an ka kawhnâk ding mi asi.

¹⁶Kal le Israel ruitu tla pumh na le, Kei, an thlâktu tla Pathian, Abraham Pathian, Isak leh Jakob Pathian na sinah ka langh mi tla simh na. An sinah ka hawng mi leh Aigupta mi tla nih an tlûnah an ti na dân ka muh mi tla simh na.

¹⁷Aigupta ram ah nehsawh hen an umnâk ah mi suakpi hen Kanaan mi, Hit mi tla, Amor mi tla, Periz mi tla, Hiv mi tla leh Jebus mi tla umnâk neihnâk leh ram ṭha mun ah kalpi na ding ka tum mi simh na,” a ti.

¹⁸“Ka mi le tla nih an sinah thu na sim mi tla chu an ngâi lai. Churawhchun, Israel ruitu tla hen Aigupta lalchem sinah chun nan va kal lai le, a sinah, ‘LALPA Hebrai Pathian, kan sinah a hawng a langh le, tuah ni thum kal ramkaro ah LALPA kan Pathian sinah bâwl ding hen hawng kan siang piak.’

¹⁹Aigupta lalchem nih chun chu hâwi ti ding hen zângnâwr lo chun an siang na awt lo ti ka theih.

²⁰Sikhawmsele Aigupta ram rêp ding hen ka thiltikhonâk ka mang lai le, chunah chun thil ṭihnungkâi tla ka ti lai. Chu nûnah suak ding hen an siang na lai.

²¹“Aigupta mi tla nih an zah na ding hen ka siam na lai, ka mi le chu kutkaro hen an suak lonâk ding hen.

²²Israel nunau tla chu Aigupta mi nunau an zâwlbâwm tla sinah an va kal lai le, Aigupta nunau a in ah a um mi âutal sinah nipuan leh ngûn leh tangka, lungmantam tla an deih na lai; chubang thil tla chu Israel mi tla nih an fanu leh an fapa tla an ruktir na lai le, Aigupta mi tla neih chu nan kalpi lai,” a ti.