Read Bawm Chin EXODUS 32 Bible Online

EXODUS 32 - Bawm Chin bible

EXODUS 32

¹Mi zapi tla nih Mosi sâwt tak tlâng ah a um ti an theih rawh chun, Aron sinah an va kal le, “Mosi Aigupta ram thawk hen hawng kan suakpitu lakah zei thil a hawng tlung âukhawm nih kan theih lo; churuangah hawng kan ruitu ding hen pathian hawng kan siam piak,” an ti.

²Aron nih an sinah, “Nan nupi tla, nan fanu tla, nan fapa tla nih anna beh mi ngûn tla kha lâk ule, ka sinah hawng put u,” a ti na.

³Churawhchun, mi zapi tla nih an ngûn nabeh tla an lît le, Aron sinah an pêk.

⁴Chun, nabeh tla chu a lâk le, a êr le, a bûrnâk ah a tawih le, ngûn chawchal lem a siam. Mi zapi tla nih chun, “Israel tla, hi hi kan pathian, Aigupta ram thawk hen hawng kan suakpitu chu asi,” an ti.

⁵Churawhchun, Aron nih ngûn chawchal mâika ah mâichâm a siam le, thu a sim “Thâi chu LALPA chawnglawmhnâk ding hen kût a um lai,” a ti.

⁶A thâizîng zîngtê ah ran tla bâwlnâk ah duah ding mi leh a tlâinâk ding thil ap ei ding mi tla an hawng put. Zû din leh pung-le-lêngnâk leiah pial mi, mi zapi nuamchenhtu tla chu din leh ei ding hen an to rawh.

⁷LALPA nih Mosi sinah, “Va ṭum sawm le, Aigupta ram thawk hen na suakpi na mi tla nih thilsual an ti le, an ka duh lo rawh.

⁸An kalnâk ding lampi ka ruat mi chu an mâk le; ngûn hen chawchal an siam le, an sawnh le, a sinah bâwlnâk an pêk. Hi hi Aigupta ram thawk hen hawng kan suakpitu pathian asi an ti.

⁹Hi minung tla nih simh an ngâi lo zia chu ka theih rawh.

¹⁰Tuah hawng ka khap rîlmâl lah, ka thin an hawng ka thawktir tuk; ka kal lai le, ka veih dep na awt. Churawhchun nangmah leh na thlâk tla phun rokual takah ka nan siam na awt,” a ti.

¹¹Sikhawmsele, Mosi nih LALPA a Pathian chu a ngiar le, a sinah, “LALPA, zeirangah na thiltikhonâk rokual tak hen Aigupta ram ah mi ruang na suah na mi tlûnah ti ti na thin a run?

¹²Aigupta mi tla nih Aigupta ram thawk hen a suakpi na mi chu tlâng ah thah na hen, veih dep na ding a tum mi ma kha a, an ti lai lo mazei? Na thinrun lah; na thinlung lêt le, na mi le tla lakah hi siat leh râwknâk hi tlungtir lah.

¹³Na to-aw tla, Abraham, Isak leh Jakob theihkumza na rawh. An sinah na thutiam vân ah ârfi zat si ding leh zungzâl hen an thlâk tla nih luah ding hen ram na tiamh mi tla theihkumza rawh,” a ti.

¹⁴Churawhchun LALPA nih a thinlung a lêt le, a mi le tla siat leh râwk ding a tum mi chu a lêt.

¹⁵Mosi tlâng tlûnah mi chu a va ṭum le, thupêk rînnâk lungtlêp panih chu a put.

¹⁶Amah Pathian tak nih chu lungtlêp lakah thupêk tla chu a rîn mi asi.

¹⁷Josua nih mi zapi âu hâu a theih rawh chun Mosi sinah, “Riaknâk mun ah râltuk hâu ka theih,” a ti.

¹⁸Mosi nih, “Chu hâu chu râltuk nehnâk hâu mawh a si lai loh; la sak hâu ding asi,” a ti.

¹⁹Mosi chu riaknâk mun ah a va tleng le, chawchal lem leh zapi minung lâm mi a muh le, thungâi a thinthawk rawh. Chu tlâng bul ah chun lungtlêp a put mi tla chu a puak le, a kuai dip.

²⁰An chawchal lem an siam mi chu a lâk le, a zawrtir le, sangvut hâwi hen a rial dip le, tî hen a chawmh dip. Churawhchun Israel mi zapi tla chu a dintir na.

²¹Aron sinah, “Hi bang hâwi sual ṭihnungkâi titir ding hen hi minung tla nih hin zeitin a nan ti?” a ti.

²²Aron nih a sâng le, “Ka tlûnah na thinthawk ding asi loh, hi minung tla hi thilsual leikâng ti tumtu an si ti na theih ko khateh.

²³Ka sinah, “Mosi Aigupta ram thawk hen hawng kan suakpitu tlûnah zei thil a hawng tlung ti âukhawm nih kan theih lo. Churuangah hawng kan ruitu ding pathian hawng kan siam piak,” an ka ti.

²⁴Kei nih an sinah nan ngûn nabeh hawng put u ka ti na le, a neitu tla vial nih an lît le, an hawng ka pêk, chu nabeh tla chu mei ah ka êr le, chawchal lem ah ka bûr ko,” a ti.

²⁵Mosi nih mi zapi tla chu Aron nih a zauhkhenh neh na lo zia leh an mêlma tla mâika ah â tak hen a siam na mi chu a muh rawh.

²⁶Churawhchun, an riaknâk mun kawtkâ ah a dîr le, “LALPA leikângah ṭângtawmtu vial hinah hawng u,” ti hen a âu le, churawhchun, Levi tla chu a kiangah an hawng a pûm le,

²⁷an sinah, “LALPA Israel Pathian nih nan ektê hen nan nâmsâu lâk ule, khatlei mi riak mun kawtkâ thawk hen khatlei mi kawtkâ tiang nan unau tla, nan hâwi tla, nan zâwlbâwm tla thah na ding hen LALPA Israel Pathian nih thu a nan pêk na,” ti hen a simh na.

²⁸Levi tla nih anna âwi le, chu ni ah chun mi sâng thum an thah na.

²⁹Mosi nih Levi tla sinah, “Tusûn ni chu, nan fapa, nan unau tla thah hen LALPA rianṭuantu bâwlpu ah zarh thil ah nanna siam rawh le, churuang chun LALPA nih a malsâwmnâk a nan pêk na,” a ti.

³⁰A thâituan chun Mosi nih mi zapi tla sinah, “Sual ṭihnungkâi tak nan ti rawh. Sikhawmsele, tlâng ah LALPA sinah tuah ka va kâi nawlh lai; nan sual mi ruangah ngaihdâmnâk ka tawng lai mawh,” a ti.

³¹Mosi chu LALPA sinah a kal nawlh le, a sinah, “Hi mi zapi tla nih sual ṭihnungkâi tak an ti rawh. Ngûn hen pathian an siam le, an sawnh rawh.

³²Zângfahtê hen an sual ngaihdam râu rawh; na ngaihdam na awt lo asi chun, na mi tla min rînnâk lasuibu lakah mi ka min kha lawnh ving,” a ti.

³³LALPA nih a sâng le, “Ka lakah sualtu min cho ka lasuibu lakah mi ka lawnh awt.

³⁴Tuah ka nan simh mi mun ah mi zapi tla chu kalpi na ko. Ka vânmifial nih a nan ruai vima ding mi kha theihkumza le, sikhawmsele, ka mi le tla an sual ruangah ka rêp na ding mi tik chu a tlung teh lai,” a ti.

³⁵Churawhchun, LALPA nih mi zapi nâwngah râi a fial, Aron rangah ngûn chawchal lem siam ding an nâwr ruangah.