Read Bawm Chin EXODUS 33 Bible Online

EXODUS 33 - Bawm Chin bible

EXODUS 33

¹LALPA nih Mosi sinah, “Hi mun hi kaltâk ule, nang leh Aigupta thawk hen na hawng suakpi na mi mi zapi hen, Abraham, Isak leh Jakob leh an thlâk tla sinah pêk ding ka tiamh mi ram ah chun kal u.

²Nanmah an ruai natu ding hen vânmifial ka hawng fial lai le, Kanaan mi, Amor mi, Hit mi, Periz mi, Hiv mi, Jebus mi tla ka nar hep na lai.

³Neihnâk leh ram ningno ah nan va kal lai le, kei lam chu nanmah sinah ka hawng awt lo, mi lungkhung tak nan si ruangah lam lakah kan veih na salam lai,” a ti.

⁴Chu chu an theih rawh chun, an thinlung a fâk le, lungmantam tla rêng anna beh lo rawh.

⁵LALPA nih Mosi sinah Israel fa tla chu simh ding hen thu a pêk le, “Nan sinah ka kal chun, mi lungkhung tak nan si ruangah, tu ko ah kan veih dep na lebang lai. Tuah lungmantam lît ule, nan lakah thilti ding mi chu ka thlûk kho lai,” a ti.

⁶Churawhchun, Israel fa tla nih Sinai Tlâng an kaltâk rawh chun lungmantam anna awih lo rawh.

⁷Israel mi tla nih mun an khuarnâk kipah Mosi nih Puanin thenhlimh chu a lâk le, riak mun thawk hen lât dauh ah a siam. LALPA umnâk Puanin ti asi ruangah âuzawng nih LALPA rangah thu deih ding duhtu zawng chu chunah kal ding asi.

⁸Zeiliau zawngah Mosi a suak chun, zapi tla chu an puanin kawtkâ chiauah an dîr lai le, Mosi a lût lân lo ngâk ding asi.

⁹Mosi chu a sungah a va lût rawh chun, sûm dîr chu a hawng ṭum hen LALPA umnâk Puanin kawtkâ zâwnah a um lai le, LALPA nih sûm thawk hen Mosi chu a sawnh lai.

¹⁰Mi zapi tla nih sûm dîr LALPA umnâk Puanin kawtkâ ah an muh kâ hen an buk chiau ding asi.

¹¹LALPA leh Mosi chu mah minung hâwi anna sâwn mi bang hen mâitawnh hen LALPA nih Mosi chu a sawnh lai. Churawhchun Mosi chu riakmun leiah a lâwi lai rawh. Sikhawmsele amah ṭângpitu tlangvâl, Nun fapa Josua chu Puanin ah a um ko ding asi.

¹²Mosi nih LALPA sinah, “Hi zapi minung tla hi ram tiamh ah kalpi na, na ka ti mi hi a dik asi; sikhawmsele, ka sinah na hawng fial awt mi minung âu asi na hawng ka simh lo. Nan ka theih thlo ko, ka lakah nanna lâwm ko na ti.

¹³Tuah chu hâwi na si chun na thiltum hawng ka simh, nangmah duhzia ti vima hen ka nan lawmhtir khonâk ding hen. Hi phun tla hi na rangah na thîm na mi an si ti theihkumza,” a ti.

¹⁴LALPA nih a sinah, “Na sinah ka hawng lai le, nehnâk kan pêk lai,” a ti.

¹⁵Mosi nih a sâng le, “Kan sinah na hawng ding asi lo chun hi mun hi hawng kan mâktir lah.

¹⁶Kan sinah na hawng lo mi asi chun na mi le tla leh ka lakah na lâwm mi âu nih a theih lai? Nangmah kan sinah na um mi nih hin tual tlûnah midang tla hen kanna khat lo ti a langtir asi,” a ti.

¹⁷LALPA nih Mosi sinah, “Nan ka deih mi hâwi hen ka ti lai, nang rang chun kan theih hen, na lakah ka lâwm ruangah,” a ti.

¹⁸Churawhchun Mosi nih, “Zângfahtê hen na umnâk chêu mit ser rê mi hawng ka muhtir,” ti hen a deih.

¹⁹LALPA nih a sâng le, “Ka rokualnâk nan mâika ah ka langh lai le, ka min thenhlimh khawm na sinah ka phuang lai. Kei LALPA ka si, ka thîm mi tla tlûnah zângfahnâk leh siherhnâk suahtu ka si.

²⁰Ka mêl lam chu kan muhtir ding asi loh, ka mêl muh hen âukhawm dam mi an um lo ruangah.

²¹Sikhawmsele, ka kiangah lungpi tlûnah hin dîr rawh.

²²Ka chêunâk rokual a hawng kal tikah lungpi kak lakah ka nan siah lai le, ka lan ving lân lo chu ka kut hen ka nan huh lai.

²³Churawhchun ka kut ka hawng lâk lai le, ka mêl silo hen ka dung lei na muh lai,” a ti.