Read Bawm Chin EXODUS 36 Bible Online

EXODUS 36 - Bawm Chin bible

EXODUS 36

¹“LALPA nih Bezalel, Oholiab leh mi zungthiam dang zawzawng tla zungthiamnâk leh theihthiamnâk a pêk na mi, Puanin thenhlimh sak ding dân thil herh zeizawng theihtu tla nih chun LALPA nih thu a pêk na hâwitê hen an siam ding asi,” a ti.

²Mosi nih Bezalel, Oholiab leh mi zungthiam dang tla, LALPA nih tikhonâk a pêk na mi zawzawng leh ṭangpi ding hen duhtu tla chu rianṭuan dawmh rawh ding hen a simh na.

³Israel mi tla nih Puanin saknâk ding thilpêk an hawng put mi chu Mosi thawk hen an tawng ver. Sikhawmsele Israel mi tla nih an thilpêk chu Mosi sinah zîng siar hen an hawng put vima rih.

⁴Churawhchun, mi zungthiam rianṭuantu tla chu Mosi sinah an va kal le,

⁵“LALPA nih ṭuan ding hen thu a pêk na mi rangah mi nih thil herh an hawng pêk mi chu a lei zut rawh,” ti hen an simh.

⁶Churawhchun, Mosi nih riakmun ah mi zawzawng sinah âukhawm nih Puanin rangah zeikhawm khawlh lo rawh ding hen thu a pêk; churuangah mi zapi tla nih zeikhawm an pêk lo rawh.

⁷An hawng pêk mi zawng tla chu rianṭuannâk a tinh nûnah a lei zut.

⁸Chu zawng rianṭuantu lakah a thiam chem mi tla nih LALPA umnâk Puanin chu an siam, Puanzâr parâ, puan mangṭhia a dumpâwl hen tah mi, a senduk, samul lasen, thilsiam thla lem thuamh mi hen an siam.

⁹Puanzâr chu â tia rang asi, a dung dâwng kul leh pariat, a vâng dâwng li asi.

¹⁰puan zûn ngâ chu zûn khat ah suah ding hen an peh, a dang zûn ngâ khawm chu hâwi hen.

¹¹Puan zûn kip lênglei sâr ah a nâ puan pâwl hen an siam.

¹²Puan tawnh mi zûn khat ah a nâ sâwmngâ, zûn khat dang khawm chu a tîr ah mi zâwn cho hen a nâ sâwmngâ an siam.

¹³Ngûn ngawih mi a bahnâk ding sâwmngâ an siam, zûn khat ah a panih hen a peh kho ding hen.

¹⁴Kêl mul hen siam mi puan zûn leikhat Puanin khuhnâk dingah an siam.

¹⁵Tia rang hen a lian a mê, a dung dâwng sâwmthum, a vâng dâwng li seng hen.

¹⁶Puan zûn ngâ chu zûn khat ah an ṭhît le, a dang zûn ruk chu zûn khat dangah an ṭhît.

¹⁷A tîr ah mi lakah a nâ sâwmngâ a sâr ah an thlaih le, a panihnâk lakah khawm a sârah a nâ sâwmngâ an thlaih.

¹⁸Dâr kuaih mi sâwmngâ zûn nih pehtu ding hen an siam, puan zûn khat si ding hen,

¹⁹khuhnâk ding a dang zûn nih an siam, dawrâ chal vun rawng sen ah thlâk mi leh savun ṭha mi zât a lênglei khuhnâk ding hen.

²⁰Puanin kâwpmi tung rangah thingrî thing an siam.

²¹Kâwpmi tung kip a sâu lei chu dawng râ, a lian lei chu dâwng khat leh a tan.

²²A kê panih zâwn cho hen an siam le, kâwpmi tung tla chu anna tlâi dut ding hen. Kâwpmi tung zawzawng nih hi hâwi hen kê an nei chiau ding asi.

²³Simlei kângah tung kul, a

²⁴tohnâk tangkasa sâwmli, kâwpmi tung kip tangah tohnâk panih nih a kê panih birhtir ding hen.

²⁵Puanin marlei kângah kâwpmi tung kul,

²⁶leh a tohnâk tangkasa sâwmli, kâwpmi tung kip tangah panih seng ding hen.

²⁷Puanin thlanglei ah kâwpmi tung ruk,

²⁸leh a kî ah kâwpmi tung nih an siam.

²⁹Hi bang a kî mi kâwpmi tung tla chu a tanglei mi hen anna peh le, a tlûnlei mi tla hen khawm anna tlâi ver. Kâwpmi tung panih a kî panih tla chu hi hâwi hen siam asi.

³⁰Kâwpmi tung pariat leh a tohnak tangkasa leiruk chu kâwpmi tung kip lakah panih vima asi.

³¹Thingrî thing hen a khuahkhang leingâ an siam le, Puanin khatlei sîr rangah kâwpmi tung pangâ,

³²khalei sîr ranh khuahkhang pangâ, thlanglei kângah mi a taw leiah kâwpmi tung rangah pangâ.

³³A lâi mi khuahkhang chu kâwpmi tung tlûnlei kâng a lâi ah an bêk, Puanin khatlei dawng thawk hen khatlei dawng tiang hen.

³⁴Chu kâwpmi tung tla chu ngûn hen an luanh le, a khuahkhang sawhnâk ding hen ngûn kual an thlaih, chu khuahkhang khawm chu ngûn hen luanh mi asi.

³⁵Puanzâr chu puan mangṭhia a dumpâwl, senduk, samul lasen hen tah mi, thilsiam thla lem hen an thuamh.

³⁶Puanzâr tleihtu ding hen thingrî tung li an siam le, ngûn hen an luanh, ngûn ngawih mi an thlaih. Tangkasa a tung tohnâk ding pali a tung tleihdîrtu ding hen an siam.

³⁷Puanin tualmâi rang dingah puanzâr puan mangṭhia, dumpâwl, senduk, samul lasen hen dawh tak ṭialh mi an siam.

³⁸Chu puanzâr rangah a tung pangâ lakah a bahnâk ngawih mi an thlaih, a tung pâr leh a bing thulnâk fung chu ngûn hen an luanh le, dâr hen a tung tohnâk pangâ an siam.