Read Bawm Chin EXODUS 37 Bible Online

EXODUS 37 - Bawm Chin bible

EXODUS 37

¹Bezalel nih thingrî thing hen Thudântuk Bâwm a siam le, a dung dâwng nih leh a tan, a vâng chu dâwng khat leh a tan, a sâng lei chu dâwng khat leh a tan hen.

²A sung a lêng ngûn hen a luanh, a tlâng hêl dak hen ngûn hen a luanh.

³A zawnhnâk rang dingah ngûn kual pali a siam le, a kê pali ah a thlaih, a sîr leiah panih vevê hen.

⁴A zawnhnâk ding hen thingrî thingtluan a siam le, ngûn hen a luanh.

⁵Chu bâwm sîrah mi ngûn kual ah tleng dak hen a thul vevê.

⁶A sinh chu ngûn karo hen a siam, a dung chu dâwng nih leh a tan, a vâng chu dâwng khat leh a tan.

⁷Ngûn hen thilsiam thla nei panih a siam;

⁸a sinh dawng ah khatlei khatlei vevê ah a sinh hen sa khat ding hen a siam.

⁹Mâichâm sinh khatlei dawng ah mâitawnh hen thilsiam thla nei chu an um, an thlazâr nih a khuh.

¹⁰Thingrî thing hen dawhkân, a dung dâwng nih a vâng dâwng khat, a sâng lei dâwng khat leh a tan hen a siam.

¹¹Ngûn karo hen a luanh, a tlâng tla khawm ngûn hen a luanh.

¹²A tlâng kâwm hêl dak hen zabawk tia hen a siam le, ngûn hen a luanh.

¹³Ngûn kual a zawnhnâk ding hen pali a siam le, a kî zâwn ah a kê kipah a thlaih.

¹⁴Dawhkân chu zawnhnâk ding hen thingtluan sawhnâk dingah a kî kipah ngûn kual chu a tlâng kâwmnâk kiangah an thlaih.

¹⁵Thingrî tluan chu ngûn hen a luanh.

¹⁶Dawhkân ah siah ding hen ngûn khêng, hâi tla, tisâwknâk hâi, khêngkûm, uain apnâk mang ding mi tla a siam.

¹⁷Ngûn hen meichêu a siam. A tohnâk leh a tung chu ngûn asi; a chawmpâr tla, a kukulul, a pâr tla sa khat hen a siam.

¹⁸A ṭeng paruk sîr khat leiah pathum vevê.

¹⁹A ṭeng paruk nih chawmpâr pathum almon chawmpâr hâwi a kukulul leh a pâr um hen a siam.

²⁰Chu meichêu nih chun almon chawmpâr pali a kukulul leh a pâr a nei.

²¹A ṭeng bawp thum tang kipah a kukulul a um.

²²Chu a kukulul, a ṭeng, a meichêu chu ngûn sa khat ver hen siam mi asi.

²³Chu meichêu chu pasarih hen a siam, a châicheh leh vachâm siahnâk chu ngûn karo asi.

²⁴Chu meichêu leh a ruakhâu zawzawng siamnâk ding hen ngûn karo kilogramme sâwmthum pangâ a mang.

²⁵Rimthâw duahnâk ding hen thingrî thing hen mâichâm a siam. A dung a vâng tia cho hen, a dung dâwng khat a vâng dâwng khat, a sâng lei dâwng nih hen a siam. A kî mi a kê chu sa khat hen siam asi.

²⁶A tlûn a khuh le, a sîr pali, a kê tla chu a sîr hêl dak hen ngûn hep asi.

²⁷A zawnhnâk ding hen ngûn kual panih a siam, a sîr nih ah a tlâng tang tê ah a thlaih, zawnh tikah thingtluan chu a kua lakah sawh ding hen.

²⁸Chu a zawnhnâk thingtluan chu thingrî thing ngûn hen luanh mi asi.

²⁹Chulh ding mi sariak thenhlimh leh rimthâw chawmh mi a siam: