Read Bawm Chin EXODUS 38 Bible Online

EXODUS 38 - Bawm Chin bible

EXODUS 38

¹Thil ap duahnâk dingah thingrî thing hen mâichâm a siam. A dung a vâng tia cho hen, a dung dâwng ngâ, a vâng dâwng ngâ, a sâng lei dâwng thum hen.

²Tlûnlei ah a kî pali kipah a kî fawng pakhat chiau a siam, mâichâm hen sa khat si ding hen. Dâr hen a luanh hep.

³Mâichâm thuamthil zawzawng tla khawm a siam: khêng tla, vachâm rûtnâk, khêngkûm, thîr kuaih leh mei bêl tla, chu zawng ruakhâu chu dâr hen siam asi.

⁴Dâr lên mâichâm tlâng tangah um ding mi a siam, chu chu tlûnlei mâichâm vawmlâi ri ding asi.

⁵Zawnhnâk dingah ngûn kual pali, kî li lakah pakhat chiau a thlaih.

⁶Thingrî tluan zawnhnâk ding hen a siam, chu chu dâr hen a luanh,

⁷mâichâm sîr vevê ah ngûn kual lakah a sawh. Mâichâm chu thing phel asi le, a sung kua ruang hen a siam.

⁸LALPA umnâk Puanin tualmâi ah rianṭuantu nunau tla tâ thlalang hen dâr mâihûm leh a tohnâk ah a siam.

⁹LALPA umnâk Puanin kulhnâk ding hen, puanzâr puan mangṭhia hen a siam. Simlei ah mi puanzâr chu dâwng zâ asi,

¹⁰a birhtirtu ding hen dâr tung kul leh a tohnâk kul, a banhnâk ding leh a zârnâk a tlâng tangkasa hen a siam.

¹¹Marlei kâng kulhnâk khawm chu tia ber hen a siam.

¹²Thlanglei pat ah zâr ding mi chu dâwng sâwmngâ, a tung parâ leh a tohnâk parâ, a banhnak kuaih mi leh a tlâng tangkasa hen siam asi.

¹³Saklei kâng puanzâr a tualmâi khuhnâk chu dâwng sâwmngâ asi.

¹⁴A tualmâi sîr kipah mi puanzâr chu dâwng leingâ asi, a tohnâk pathum leh a tung pathum asi.

¹⁶A kulhnâk puanzâr chu puan mangṭhia hen siam mi hep asi.

¹⁷A tung tohnâk chu dâr hen siam asi le, a banhnâk kuaih mi leh a zârnâk tlâng leh a tung pâr khuhnâk chu tangkasa hen siam mi asi. A kulhnâk tung tla hêl dak hen um mi tla chu a tlâng tangkasa hen siam mi hen â tlâi hep.

¹⁸A tualmâi kulhnâk puanzâr chu puan mangṭhia dumpâwl, senduk, samul lasen hen thuamh mi asi. A sâu lei chu dâwng kul, a sâng lei chu dâwng ngâ asi, a kulhnâk puanzâr zia hen.

¹⁹A tung pali chu a tohnâk dâr nih ah birhtir asi. A banhnâk tla, a tung khuh tla, a zârnâk dâng tla chu tangkasa hep asi.

²⁰puanin kulhnâk kilh zawzawng chu dâr hen siam ver asi.

²¹Thupêk Parâ rînnâk lungtlêp siahnâk LALPA umnâk Puanin rangah thîr an mang mi rînnâk ah mi zat chu hi hi asi. Bâwlpu Aron fapa Ithamar rui hen Levi tla nih rian an ṭuan mi rînnâk ah mi zat chu Mosi thawk hen thupêk mi asi.

²²Bezalel Uri fapa, Hur tupa, Juda phun a mi nih LALPA nih thu a pêk mi hâwi hen zeizawng a siam.

²³Amah ṭangpitu chu Oholiab, Ahisamak fapa, Dan phun a mi chu rîntu, ti dân thiam, puan mangṭhia dumpâwl, senduk, samul lasen tahtu asi.

²⁴LALPA Puanin thenhlimh rangah an hawng pêk mi ngûn zawzawng tla chu kilogramme sâng khat, tahnâk dân hen kilogramme sâng khat rih asi.

²⁵Mi zapi rêl rawh mi thawk hen tawng mi tangkasa vial chu tahnâk dân hen kilogramme sâng thum zali sâwmthum rih asi.

²⁶Minung pakhat nih tahnâk dân hen an pêk mi zat vima hen mi rêlnâk lakah rîn mi zawzawng nih an pêk mi zawzawng fawnh mi chu hi hen â zat asi. Chu mi rêlnâk ah rîn mi kum kul mawh chu ngâk a upa dauh mi vial nuai ruk leh sâng thum leh zangâ leh sâwmngâ an si.

²⁷Tangkasa kilogramme sâng thum leh zali lakah mi chu Puanin thenhlimh tohnâk zâ leh a puanzâr rangah mang asi, a tohnâk pakhat ah kilogramme sâwmthum pali vima asi.

²⁸A lei mi tangkasa sâwmthum hen Bezalel nih a bahnâk tlâng, a banhnâk kuaih mi in tung lakah thlaih ding mi leh a tung khuhnâk ah a mang.

²⁹LALPA rangah dâr ap mi zawzawng tla chu kilogramme sâng nih zali leh kul leh pangâ a tling.

³⁰Chu hen chun LALPA umnâk tualmâi rangah a tohnâk tla a siam, dâr mâichâm leh a dâr lên leh mâichâm thuamthil zawzawng tla a siam.

³¹A tohnâk tla chu Puanin kulhnâk leh a tualmâi kulhnâk ding asi, a kilhnâk zawng khawm chu Puanin leh a kulh kilhnâk asi.