Read Bawm Chin EXODUS 4 Bible Online

EXODUS 4 - Bawm Chin bible

EXODUS 4

¹Churawhchun Mosi nih LALPA rangah a sâng le, “Israel tla nih an ka zumh lo hen ka thusim tla khawm an ngâi lai lo dahmawh. Na sinah Pathian â langh lai lo an hawng ka ti chun zeitin ka ti lai rawh ne?” a ti.

²Churawhchun, LALPA nih, “Na put mi kha zei?” a ti. “Ṭhianṭhunh” ti hen a sâng.

³LALPA nih, “Tual ah lawnh,” a ti. Chun, Mosi nih tual ah a lawnh rawh chun rûl ah â chang le, a lâwn.

⁴Churawhchun, LALPA nih Mosi sinah, “Kûn le a mei ah tleih le thlîr,” a ti. Mosi chu a kûn le, a tleih le, ṭhianṭhunh ah â chang fâwn.

⁵LALPA nih, “A dik ti theihnâk ding hen Israel fa tla sinah LALPA, an thlâktu tla Pathian, Abraham Pathian Isak leh Jakob Pathian chu na sinah â langh ti theihnâk ding hen hi hi ti rawh,” a ti.

⁶LALPA nih Mosi sinah thu a sim nawlh le, “Na kawrdawh sungah na kut thuh,” a ‘ti. Mosi nih chu hâwi hen a ti le; a kut a hawng thuak le, a kut chu phâr hen vûr hâwi hen a vâr.

⁷Chun, LALPA nih, “Tuah na kawrdawh sungah na kut thuh nawlh” a ti. Chu hâwi hen a ti le, a hawng thuak nawlh rawh chun a dam tleng le, a lânah a taksa hâwi hen a um nawlh rawh.

⁸LALPA nih, “An lung lo hen thilchê masachem na ti mi lakah khawm an theihthiam lo chun, hi pakhat lakah chun an theih lai rawh.

⁹Thilchê panih lakah an lunglo nget rih hen na thusim khawm an pawm lo nget rih asi chun, Nile tiva mi ti lâk le, thlêt. Tî chu thisen ah â chang ko lai” a ti.

¹⁰Sikhawmsele, Mosi nih, “Silo, LALPA, hawng ka fial lah. Thusim thiam mi ka silo, na hawng ka sawnhnâk thawk hen khawm mi hawlh ring thiam ka silo. Mi hawlh ring thiam lo tak ka si, ka hawlh a fûm hen ka hawlh a hak,” a ti.

¹¹LALPA nih a sinah, “Minung mûr le kâ pêktu âu? Âu nih minung nâ a sêttir hen a hawlh kholo tir? Âu nih minung muhnâk a pêk hen a mit a châwtir? LALPA keimah ka si.

¹²Tuah kal ko! Thusim ding hen kan ṭangpi lai, na thusim ding mi kan simh lai,” a ti.

¹³Sikhawmsele, Mosi nih a sâng le, “Silo, LALPA, zângfahtê hen midang âumawh fial râu rawh,” a ti.

¹⁴Churawhchun, LALPA chu Mosi tlûnah a thinrun le, hi hâwi hen a ti; “Na unaupa Aron Levi mi teh? A nih chu ṭha tak hen a hawlh kho ti ka theih. Tuah nangmah tawng ding leh muh ding duh hen a hawng lai, chun a nan muh lai le, â lâwm thlo lai.

¹⁵A sinah thusim ding mi vial na simh kho. Nan panih hen sim ding hen kan ṭangpi na lai le, nan panih hen ti ding mi tla kan simh na lai.

¹⁶Nangmah ruangrûl ah thusimtu asi lai le, na ruangrûl ah zapi minung sinah thu a sim lai. Churawhchun nang chu Pathian hâwi hen sim ding mi zawzawng amah chu na simh lai.

¹⁷Hi ṭhianṭhunh hi na sinah put le, hi hen thilchê tla na ti lai,” a ti.

¹⁸Churawhchun, Mosi chu a pu Jethro sinah a kîr le, a sinah, “Zângfahtê hen Aigupta ram ah ka unau tla an dam mawh, va zauh na ding hen hawng ka kaltir rawh,” a ti. Jethro nih, “Kal ma a, dam tak hen,” a ti.

¹⁹Mosi chu Midian ram ah a um liauah LALPA nih a sinah, “Aigupta ram ah kîr rawh, thah ding an duhtu tla an thi rawh,” a ti.

²⁰Churawhchun, Mosi nih a nupi leh a fa tla chu sanatung tlûnah a chuanh na le, Aigupta ram leiah anna thawh rawh. Pathian nih a put ding a ti mi ṭhianṭhunh khawm a put.

²¹LALPA nih Mosi sinah thu a sim fâwn le, “Tuah Aigupta ram leiah na kîr awt rawh le, lalchem mâika ah thilchê ti ding kan pêk mi kha theihkumza rawh. Sikhawmsele, lalchem chu a lung ka khungtir lai le, mi tla chu a suaktir siang na lai lo.

²²Churawhchun, nangnih, Kei LALPA nih ‘Israel chu ka fapa tîr asi,

²³hawng ka sawnh khonâk ding hen ka fapa suaktir ding hen ka nan simh le, sikhawmsele na êl. Tu chun na fapa tîr ka thah awt rawh,’ a ti,” ti hen simh.

²⁴Aigupta ram leiah kalnâk lampi riaknâk mun ah LALPA chu Mosi hen anna tawng le thah a tum.

²⁵A nupi Zipporah nih lung a hâr siar mi a lâk le, a fapa fêm a tan piak le, chu hen chun Mosi kê a va tawngh. Zipporah nih “Kei rangah chun fêmtan ruangah thisen suahtu pasal na si,” a ti. Churuang chun LALPA nih Mosi nungnâk a zuah.

²⁷Chu liau chun, LALPA nih Aron sinah, “Ramkaro ah Mosi hen va a tawng ding hen va kal,” a ti. Churawhchun tlâng thenhlimh ah tawng ding hen a kal rawh; anna tawng rawh chun Mosi chu a châwchawk.

²⁸Churawhchun Mosi nih Aigupta ram ah kîr ding hen LALPA nih a sim mi zawzawng chu Aron rangah a simh hep, thilchê ti ding hen LALPA nih a sim mi zawzawng tla khawm a simh hep.

²⁹Mosi leh Aron chu Aigupta ram ah an va kal le, Israel ruitu zawzawng tla an pumh hep na.

³⁰LALPA nih Mosi rangah a simh mi zawzawng chu Aron nih mipi tla a simh ver na, churawhchun Mosi nih mipi tla mâika ah thilchê tla a ti.

³¹LALPA chu an sinah a hawng mi leh nehsawh hen an um mi a muh na ti an theih rawh chun an lung rawh le, an kûn le, Pathian an sawnh rawh.