Read Bawm Chin EXODUS 6 Bible Online

EXODUS 6 - Bawm Chin bible

EXODUS 6

¹LALPA nih Mosi sinah, “Tuah lalchem sinah thil ka ti ding mi chu na muh lai. Ka mi le tla suaktir ngelchel ding hen ka nâwr awt. A ram ah mi chu ka nartir ngelchel awt,” a ti.

²Pathian nih Mosi sinah, “Kei LALPA ka si;

³Abraham, Isak leh Jakob sinah Pathian zeizawng tikho si hen ka langh le, sikhawmsele, LALPA keimah min hen thenhlimh tak hen chun an sinah ka theihtir lo.

⁴Ramdang mi tla hâwi hen an umnâk Kanaan ram pêk ding mi lak khawmah an sinah thudântuknâk ka siam.

⁵Tuah Israel rûm leh âinâk ka theih le, Aigupta mi nih sal ah an siam na mi khawm, ka thutiam khawm ka theihkumza.

⁶Churuangah Israel fa tla chu ‘Kei LALPA nih ruang ka suah na ding mi leh Aigupta sal an sinâk lakah mi ka suah na awt mi chu simh na. An tlûnah rêpnâk ṭihnungkâi tak hawng tlung ding hen ka bân chak ka phar lai le, ruang ka suah na lai.

⁷Ka minung ah kan siam na lai le, Kei nan Pathian ka si lai. Aigupta sal nan si mi ka nan suah na tikah chun, Kei LALPA nan Pathian ka si mi nan ka theih lai rawh.

⁸Abraham, Isak leh Jakob sinah ka tiamh thlir mi ram ah ka nan kalpi na lai le; Kei LALPA nih nanmah tâ si rawh ding hen ka nan pêk na lai,” a ti.

⁹Mosi nih Israel tla chu chu thu a va simh na le, sikhawmsele, sal rêpnâk an tuar mi ruangah an thinlung â râwk le, an ngâi lo.

¹⁰Churawhchun, LALPA nih Mosi sinah,

¹¹Aigupta lalchem sinah va kal le, a ram ah mi Israel tla suaktir na ding hen simh,” a ti.

¹²Sikhawmsele, Mosi nih a sâng le, “Israel tla men ka thu an ngâi duh lo mi, zeitin lalchem nih a ngâi duh lai? Thusimtu nau tak ka si mi,” a ti.

¹³LALPA nih Mosi leh Aron chu thu a pêk na le, “Israel mi tla leh Aigupta lalchem chu nanmah hi Aigupta ram ah mi Israel tla suakpitu dingah ruat nan si mi hi simh na u,” a ti.

¹⁴Reuben, Jakob fapa tîr nih fapa pali a nei: Hanok, Pallu, Hezron, leh Karmi; anmah phun thlâktu tla min an put mi tla chu an si.

¹⁵Simeon nih fapa paruk a nei: Jemuel, Jamin, Ohad, Jakin, Zohar leh Kanaan nunau fapa Shaul; chu tla chu an thlâktu min puttu tla chu an si.

¹⁶Levi nih fapa pathum a nei: Gerson, Kohat leh Merari; chu tla chu an thlâktu tla min puttu tla an si. Levi chu kum 137 ding upa hen a dam.

¹⁷Gerson nih fapa panih a nei: Libni leh Simei; chun thlâk tamtak an nei;

¹⁸Kohat nih fapa pali a nei: Amram, Izhar, Hebron leh Uziel. Kohat chu kum 133 tluk upa hen a dam.

¹⁹Merari nih fapa panih a nei: Mahli leh Mushi, hi tla hi Levi phun leh an thlâk tla chu an si.

²⁰Amram nih a pa farnu Jokebed a umpi le, Mosi leh Aron ringtu asi. Amram chu kum 137 ding upa hen a dam asi.

²¹Izhar nih fapa pathum a nei: Korah, Nepheg leh Zikri,

²²Uziel nih fapa pathum a nei: Misael, Elzaphan leh Sithri tla an si.

²³Aron nih Eliseba a umpi le, Aminadab fanu Nason farnu; anih nih Nadab, Abihu, Eleazar leh Ithamar a ring na.

²⁴Korah nih fapa pathum a nei: Asir, Elkanah leh Abiasap; chu chu Korah phun thlâktu tla anna ṭhêk mi tla chu an si.

²⁵Eleazar Aron fapa nih Putiel fanu a umpi le, Phinehas a ring. Levi chi thlâktu tla lukhâi dauh an si.

²⁶Aron leh Mosi chu LALPA nih, “Israel phun Aigupta ram ah mi suakpi na u,” a ti na mi chu an si.

²⁷Chu tla chu Aigupta lalchem rangah Israel mi tla suaktir na titu tla chu an si.

²⁸LALPA nih Aigupta ram ah Mosi sinah thu a sim liauah,

²⁹“Kei LALPA chu ka si, ka nan simh mi zawzawng hi Aigupta lalchem sinah va sim,” a ti.

³⁰Sikhawmsele, Mosi nih a sâng le, “Thusimtu nâu tak ka si ti na theih, zeitin lalchem nih ka thu a ngâi lai?” a ti.