Read Bawm Chin JOB 1 Bible Online

JOB 1 - Bawm Chin bible

JOB 1

¹Uz ram ah minung pakhat a um le, a min chu Job asi, amah chu Pathian sawnhtu leh mi zumhkâi tak asi. Mi ṭha tak asi le, thilsual lakah â thiamthih.

²Fapa pasarih leh fanu pathum a nei.

³Dawrâ sâng sarih, sangâwngsâu sâng thum, ranrual sâng khat leh sanatung zanga a nei. To-aw tamtak a nei le, saklei mi minung lakah chun a nei chem mi asi.

⁴Job fapa tla nih a leh leh hen puai an tuah le, chu an puai lakah chun an far pathum tla leh midang tla an sâwm kumza na.

⁵Chu puai lîm nûn zînglei kipah Job chu zîngtê ah a thawk le, a fa tla thenhlimhnâk ding hen bâwlnâk a pêk tâwn. A fa tla lakah zeimaw mi nih thilsual an ti lai dahmawh ti hen a nei kumza tâwn.

⁶Vân minung tla LALPA mâika ah langh ding ni a hawng tlung le, Setan khawm an sinah â tel bâk.

⁷LALPA nih Setan sinah, “Zei me na ti?” a ti. Setan nih a sâng le, “Hi bang leh khi bang ah ka kal le, tual ka ṭawl,” a ti.

⁸LALPA nih Setan sinah, “Ka to-aw Job na muh ma? Hi tual tlûnah amah hâwi hen âukhawm zumhkâi an um lo. Keimah hawng ka sawnh le, thilsual ti lakah thungâi â thiamthih,” a ti.

⁹Setan nih a sâng le, “Zeikhawm neilo sele, Job nih an sawnh lai mazei?

¹⁰Nangmah nih amah leh a dâwngsung tla na zauhkhenh kumza le, thil zeizawng na neitir. A thilti zeizawng ah mal na sâwm piak le, ram khat rê hen ranrual na pêk.

¹¹Sikhawmsele tuah a neih zawzawng lâk piak nik, na mâichâng ah an sâwi lai!” a ti.

¹²LALPA nih Setan sinah, “Asi ma chu, a thilneih zawzawng chu na duhzia zawng hen ti, sikhawmsele amah Job chu nganfâk na pêk ding asi lo,” a ti. Churawhchun Setan nih a kaltâk rawh.

¹³Nikhat chu Job fa tla an upachem in ah puai an tuah liauah

¹⁴thu thanhtu Job sinah a va kal, chu nih chun, “Kannih chu chawchal hen phâisen kan nâwn le, sanatung tla chu kan kiangah an tlawng,

¹⁵lâkkhatko ah Sabe mi tla an hawng le, an fîr hep. Na to-aw zawzawng keimah cho lo chu an thah hep na. Nangmah sinah kei cho hi thusim ding hen ka âwl asi,” a ti.

¹⁶A thusim dawngh lânah to-aw dang pakhat a hawng le, “ṭêk a tlâ mi nih dawrâ leh a vêngtu tla a thah hep na. Keimah cho hi a nan simh ding hen ka dam,” a ti.

¹⁷Chu thu a sim mi dawngh lân chun, to-aw dang a hawng fâwn le, “Kaldai murui nih hawng kan rûn le, sangâwngsâu an lâk hep le, na to-aw an thah hep na. A nan simh ding hen keimah cho ka âwl,” a ti.

¹⁸Chu thu a sim mi dawngh lântê ah, to-aw dang a hawng fâwn le, a sinah, “Na fa tla a upachem mi, in ah puai an tuah le,

¹⁹thlipi ramkaro thawk hen a hawng râng le, chu thli nih in a thlûk le, an thi hep. A nan simh ding hen keimah cho ka âwl,” a ti.

²⁰Job chu a thawk le, a ngaihsia tukah a nipuan tla a thlêk, a lû a mêt rel le, tual ah a rîl thlo.

²¹“Ka nu pawsung thawk hen takkaro hen ka hawng suak le, takkaro hen ka thi lai. LALPA nih hawng ka pêk le, tuah a lâk rawh. A min chu sawr hen um seh!” a ti.

²²Thil a hawng tlung mi zawng lakah Job nih a simsâwi hen a sual lo.