Read Bawm Chin JOB 10 Bible Online

JOB 10 - Bawm Chin bible

JOB 10

¹Nung ka nêngtawr, ka vûirâmnâk fâk tak hawng ka ngâi piak.

²Pathian hawng ka mawhtir lah. Zei ka palhnâk hawng ka simh.

³Ṭhatlo sâng hi na rangah a dik ma? Nangmah nih na ti mi chu zauhnawmh asi lai ma? Misual tla thiltum chu nihsanh ding asi awt lo ma?

⁴Kanmah nih kan muh mi hâwi hen thil tla na muh ma?

⁵Kanmah hâwi hen na sân a tâwi mazei?

⁶Asi chun, zeirangah ka sualnâk tla chu na zâwt hen, ka thilti diklo tla chu na chek.

⁷Ka palh lo ti na theih le, na lakah mi chu âukhawm nih an ka hum kho lo.

⁸Na kut hen tuah le siam mi ka si le, tuah chu kut lîlâ hen na ka veih.

⁹Sunhtlung valei hen na ka siam mi chu theih le, valeidip ah na ka siam awt nawlh ma?

¹⁰Ka pa chu hawng ka ring ding hen chaknâk na pêk le, ka nu pawsung thawk hen na ka ṭhangtir.

¹¹Ka taksa chu ruh leh thari hen na siam le, ruh tla chu tît leh vun hen na khuh.

¹²Nungnâk leh dâwtnâk dawng lo na ka pêk, nangmah zauhkhenhnâk hen nungdam hen na ka kilkâwi.

¹³Sikhawmsele, tuah chubang zawzawng tla chu keimah nganfâk pêk ding hen a thup hen na ruat mi ver asi.

¹⁴Ka sual ding mi muh ding hen na ka ngâk rêt le, churawhchun nangnih ngaihdam ding na ka duhlonâk ding hen.

¹⁵Ka sual ka hen nangmah lakah lawksawngnâk ka nei le, sikhawmsele thil dik ka ti liau khawmah thangṭhatnâk tawng ka nei lêm lo. Vânduai hen ka um le, ningzaknâk hen ka khat.

¹⁶Chubang lakah dingchang hen um khawmsele, chakeibaknei hâwi hen na ka pêl le, keimah nganfâktir ding hen thilchê na ti.

¹⁷Ka tlûn thu ah theihpitu na nei kumza le; ka lakah na thinthawknâk a zual dadauh. Rêpnâk thar na ruat tâwn.

¹⁸Pathian, zeirangah ka nu pawsung ah mi na hawng ka suaktir? Âukhawm muhlo hen ka thi ving ding mi.

¹⁹Dam kumza ngâk hen chun nu pawsung ah suak hen thlân khur sungah lût chawlh a ṭha ko.

²⁰Ka san chu a dawng dêng rawh asi lo ma? Keimah lâwng hen hawng ka mâk ko! Ka suaktâk ding mi ni hawng ka lawmhtir.

²¹Ka kal tuan awt rawh, ka hawng kîr ding asi lo rawh. A mûi mi leh thim sahnâk ah ka kal lai le,

²²ram mûinâk ah leh dâidul leh nawknâk ram ah, chunah chun chêunâk khawm mûinâk hep a sinâk ram ah.