Read Bawm Chin JOB 14 Bible Online

JOB 14 - Bawm Chin bible

JOB 14

¹Ṭangpi herh leh chak lo hen suak mi ver kan si. Kan damsung ni tla khawmah nawknâk â bang ver.

²Chawmpâr hâwi hen kan uai sawm le; kan tlâu ving.

³Pathian, na ka zauh hen lâirêlnâk leh niknâk na nei kumza awt ma?

⁴Zei thil tal minung a nâwm mi thawk hen chun thil thiang a suak dah loh.

⁵A lân pakan hen a dam ding ni tla chu ruat chia asi. A dam zat ding thla tla khawm. Nangnih na ruat rawh mi chu thleng nawlh kho asi lo.

⁶Zauhtâu le, amah lâwng hen siah. A tikho mi asi chun, har tak hen a dam kar lawmhtir.

⁷Thing chu hâu rawh menza khawmsele lungum a kâi rih. A nung hen a hawng chawrh nawlh kho.

⁸A ram tla a tar kho le, hâu mi a bul chu thi khawmsele,

⁹tî nih a chiah mi chu a tuai a hawng chawrh nawlh lai.

¹⁰Sikhawmsele, minung chu a thi chun a dawnghnâk asi ko rawh. A thi mi chu kha zeiah a um rawh ne?

¹¹Tî luang â dîn mi hâwi hen leh, tili a kang mi hâwi hen,

¹²minung tla chu an thi le, an thawknawlh lo rawh. Vân a um kar zawng chu an meng lai lo rawh le, an ihmun ah mi khawm an thawk nawlh lai lo rawh.

¹³Laikulh thihnâk ah mi hawng ka thuh ving le ka duh a! Na thinthawk reh lân lo hawng ka thuh ving le, na ka theihkumza ding hen tik ruat nawlh.

¹⁴Mi a thi chun a nung nawlh kho mazei? Kei lam nih chun tik ṭha ka ngâk le, hi nawknâk hun lîm ding hi ka ngâk ko.

¹⁵Na ka kawh lai le, ka sâng lai le, na thilsiam keimah lakah hin na lâwm lai;

¹⁶Churawhchun ka kê kâr tla hi na zauh set lai le, ka sualnâk tla chu na chek set lai loh.

¹⁷Nangnih na ngaihdam hen na lawnh ving lai le; thilsual ka ti mi zawng na thenh peng lai.

¹⁸Tlâng a chim mi tik a hawng tlung. Tual kak tla a chim ver.

¹⁹Tî nih lungpi tla a ṭhial le, ruah tukpi nih tual tla a fenh lai, chu hâwi hen minung nih nung ding a tum mi chu na veih.

²⁰Minung chu na neh tuktarâi le, na nâutir ving le; a mêl chu thihnâk lakah veih hen a um.

²¹A fa le tla nih a min chu an putso le, sikhawmsele anih nih a theih lo le, an mualphonâk khawm a theihpi na lo.

²²Amah taksa nganfâk leh a thinlung fâk cho a theih.