Read Bawm Chin JOB 16 Bible Online

JOB 16 - Bawm Chin bible

JOB 16

¹A lânah chu hâwi thu ka theih mi hâwi hen; thlangamnâk na hawng ka pêk mi chu rêpnâk cho asi.

³Thu na sim awt nget rih na maw? Thu dawnghnâk ma na sim kumza awt?

⁴Nang keimah mun ah, kei nangmah mun ah um sele na thusim zawng chu ka sim kho lai. Theihthiam hen ka lû ka lei lai le, tîlian hâwi mi thu lakah ka nan thlâk ving lai.

⁵Krai pêk hen ka nan chaktir kho, nangmah thlangamh ding hen thu ka sim kho.

⁶Sikhawmsele, ka sim mi zeikhawm a ṭhavaknâk a um lo. Dâisip hen ka um mi nih ka nganfâk a rehtir lêm lo.

⁷Pathian na hawng ka uaitir dep rawh; ka dâwngsung tla chu thah hen na umtir na rawh.

⁸Na hawng ka tleih rawh, nang chu ka mêlma na si. Kei chu ruh leh vun ka si. Mi nih ka sualnâk a fiang rawh mi hâwi hen an ruat.

⁹Pathian nih a thinthawknâk hen ka kut kê tla a thlêk ver. Hua tak bû hen hawng ka zauh.

¹⁰Mi nih an hawng ka sâwi, ka kiangkam ah an hawng a pûm le, ka mêl ah an hawng ka bengh.

¹¹Pathian nih misual kut ah a hawng ka pêk.

¹²Thlangam tak hen ka um le, Pathian nih ka rawm thari ah hawng ka dît, hawng ka vuak le, hawng ka râwk dep. Zuamchawhnâk ah Pathian nih hawng ka mang.

¹³A ker kip thawk hen chanhtiang fung zum hen hawng ka kah. Chu thalzum hen liam hen ka um le; chu khawmah pawi tinâk a nei lo.

¹⁴Hawng ka liamh nûnah a ka liamh nget rih. Kawrsen â a kal rawh mi hâwi hen huat kâi tak hen hawng ka do.

¹⁵Salâpuan aih hen zûn ka ulh. Valeidip lakah ka to le, neh ka si rawh.

¹⁶Ka mêl sen rê hen ka ṭap le, ka mit tla a phing hen a dûl.

¹⁷Ka kut hen zângran hen zei thil khawm ka sual lo, Pathian sinah zumhkâi tak hen thla ka cham.

¹⁸Tual, ka lakah thilsual ti hen a um mi thuh lah; rep tak hen ka âunâk chu bângtir lah.

¹⁹Zeimaw mi vân ah an um le, keimah lei ṭângṭawm hen ka rangah dîr hen an um.

²⁰Ka hâwi le tla nih an hawng ka dehchawh, Pathian sinah ka mitthli a tlâ.

²¹Âu nih mawh Pathian sinah mi nih a hâwi rangah a ngiar piak mi hâwi hen, hawng ka ngiar piak sele ka duh.

²²Ka kum khua chu a lan vima rawh le, kîr lo rawh ding mi lam lakah ka kal.